खोपको प्राथमिकतामा शिक्षक- कर्णाली - कान्तिपुर समाचार

खोपको प्राथमिकतामा शिक्षक

हरि गौतम

रुकुम पश्चिम — आठबीसकोट नगरपालिकाले खोपको पहिलो प्राथमिकतामा शिक्षकलाई राखेको छ । अरू उमेर समूह र जोखिम समूहमा रहेकाहरूसँगै नगरपालिकाले शिक्षकलाई पनि खोप लगाइरहेको हो । 

छिट्टै विद्यालय सञ्चालन गर्नुपर्ने भएकाले शिक्षकलाई पनि पहिलो प्राथमिकतामै राखेर खोप लगाउने काम भइरहेको नगरपालिकाले जनाएको छ । नगरपालिकामा रहेका झन्डै ४ सय शिक्षकमध्ये आधाले खोप लगाइसकेको स्वास्थ्य संयोजक मणिराज शाहले बताए । उनका अनुसार केहीले दोस्रो मात्राको खोप लगाइसकेका छन् । ‘ज्येष्ठ नागरिकलाई खोपको मात्रा लगभग पूरा भएकाले शिक्षकलाई प्राथमिकतामा राखेका हौं,’ उनले भने, ‘पछिल्लोपटक खोप लगाउनेमा शिक्षककै संख्या बढी छ ।’

नगरपालिकाका अनुसार अहिलेसम्म २ हजार ४ सय ७२ जनाले खोप लाएका छन् । जसमध्ये २ सय ३७ जना शिक्षक छन् । त्यस्तै ६२ उमेर माथिका १ हजार ६ सय ६९ र २ सय ९६ जनप्रतिनिधि, कर्मचारी तथा स्वास्थ्यकर्मीलाई खोप दिइएको छ । २ सय ७० जना व्यवसायी र पत्रकारलाई पनि खोप दिइएको शाहले बताए । उनका अनुसार १ देखि ६ नम्बर वडामा सबै विद्यालयका

सबै शिक्षकले खोप लगाइसकेका छन् । ७ देखि १३ नम्बर वडाका शिक्षकलाई खोप लगाउन अभियान सञ्चालन भइरहेको उनले जानकारी दिए ।

एक सातायता शिक्षकहरूलाई खोप लगाउन विभिन्न वडामा अभियान सञ्चालन गरेको नगरप्रमुख गोर्खबहादुर केसीले बताए । ‘हरेक दिन भीडभाड र धेरैको सम्पर्कमा जाने शिक्षकहरू नै हुन्,’ उनले भने, ‘यसैले शिक्षकलाई प्राथमिकतामा राखेर खोप दिइरहेका हौं ।’ अवस्था सहज हुनबित्तिकै विद्यालय सञ्चालन गर्नुपर्ने भएकाले शिक्षकलाई प्राथमिकतामा राखिएको उनले बताए 

जिल्लाका अन्य ५ स्थानीय तहका शिक्षकले पनि खोपको माग गरिरहेका छन् । नेपाल शिक्षक महासंघ र अन्य संघसंगठनका तर्फबाट शिक्षकलाई खोप नभएसम्मका लागि विद्यालय खोल्न नसकिने भन्दै सरोकारवालालाई ज्ञापनपत्र बुझाइएको छ । विद्यालय खोल्नुपूर्व खोपको विकल्प नभएको बाल कल्याण माविका शिक्षक टोपबहादुर हमालले बताए । ‘भीडभाड भएकै कक्षामा जानुपर्ने भएकाले विद्यार्थी र शिक्षक दुवैबाट एकअर्कालाई कोरोना संक्रमणको जोखिम छ,’ उनले भने, ‘खोपका लागि ध्यान दिनुपर्नेमध्येको एउटा मुख्य क्षेत्र शिक्षा भए पनि बेवास्ता भइरहेको छ ।’

प्रकाशित : असार ३०, २०७८ ०९:३९
प्रतिक्रिया
पठाउनुहोस्

नगरपालिकाको केन्द्र सार्ने निर्णय

७२ जनामध्ये ४८ जनाले ५ नम्बर वडाको सेरीगाउँमा केन्द्र राख्ने पक्षमा मतदान
हरि गौतम

रुकुम पश्चिम — मुसीकोट नगरपालिकाको केन्द्र अब ५ नम्बर वडाको सेरीगाऊँमा बन्ने भएको छ । नवौं नगरसभाले बिहीबार मतदानबाट वडा नं. १ स्थित जिल्ला सदरमुकाममा रहेको केन्द्रलाई सेरीगाउँमा सार्ने निर्णय गरेको हो ।

रुकुम पश्चिमको मुसीकोट नगरपालिकाको केन्द्र फेर्ने निर्णयको पक्षमा मतदान गर्दै सभाका सदस्यहरू । तस्बिर : हरि गौतम/कान्तिपुर

सभामा ७२ जनामध्ये ४८ जनाले ५ नम्बर वडाको सेरीगाउँमा केन्द्र राख्ने पक्षमा मतदान गरेका थिए । २४ जना अनुपस्थित थिए । विपक्षमा मत खसेन । कांग्रेसबाट निर्वाचित सभाका सदस्यले नगरसभा बहिष्कार गरेका थिए । माओवादी केन्द्रबाट निर्वाचित सबैले पक्षमा मतदान गरे । सभाको संख्या ७५ हो, जसमध्ये २ जना जिल्ला समन्वय समितिमा गइसकेका छन् । एक सदस्यले राजीनामा दिएपछि सभामा ७२ जना छन् ।

स्थानीय तहको पुनर्संरचनाको क्रममा १ नम्बर वडामा नगरपालिकाको केन्द्र तोकिएको थियो । सुरुमा साबिकका खलंगा र साँख गाविस तथा पछि चौखावाङ, छिवाङ र भलाक्चा गाविस मिलाएर नगरपालिका बनाइएको थियो । यो निर्णय अब प्रदेश हुँदै संघीय सरकारमा जानेछ । संघीय सरकारले निर्णय गरेपछि बल्ल यसको कार्यान्वयन हुनेछ । स्थानीय तहको निर्वाचनपछि कार्यालय सञ्चालन भने ५ नम्बर वडाबाटै हुँदै आएको छ । १ नम्बर वडाको कार्यालय साँघुरो भएपछि ५ नम्बर वडास्थित जिल्ला कृषि विकास कार्यालयको भवनबाट नगरपालिकाले सेवा प्रवाह गर्दै आएको छ । नगरप्रमुख देवीलाल गौतमले सबैको केन्द्रबिन्दु पर्ने गरी केन्द्र बनाउने निर्णय गरिएको बताए ।

१ नम्बर वडा र ५ नम्बर वडामा कार्यालय रहेको दूरी डेढ किलोमिटर मात्रै टाढा भएकाले यसले खासै असर नपर्ने उनको भनाइ छ । ‘सबै वडावासीलाई लक्षित गरी नगरसभाबाट यो निर्णय गरिएको छ,’ उनले भने, ‘यसले नगरपालिकालाई आवश्यक संरचना निर्माण गर्न र कार्यसम्पादन गर्न सहज हुनेछ ।’ नगरको केन्द्र फर्ने निर्णयप्रति कांग्रेसले भने आपत्ति जनाएको छ । नगर सभापति महेन्द्र केसीले विज्ञप्तिमार्फत गलत ढंगबाट नगरको केन्द्र सार्ने निर्णय गरिएको बताए । ‘कसैको व्यक्तिगत स्वार्थको कारण सबैलाई पायक पर्ने ठाउँबाट केन्द्र अन्यत्रै सार्नु राम्रो होइन,’ उनले भनेका छन् । यसअघि सबै राजनीतिक दल ४ नम्बर वडाको ठाराढुंगामा केन्द्र राख्न सहमत भएका थिए । त्यतिबेला पनि कांग्रेसले मानेको थिएन । ठाराढुंगा हाल केन्द्र कायम गर्ने निर्णय गरिएको सेरीगाउँ भन्दा २ किलोमिटर टाढा पर्छ ।

प्रकाशित : असार २७, २०७८ १०:०५
पूरा पढ्नुहोस्
प्रतिक्रिया
पठाउनुहोस्
×