शिक्षक र कर्मचारीले ७ महिनादेखि तलब पाएनन्- कर्णाली - कान्तिपुर समाचार

शिक्षक र कर्मचारीले ७ महिनादेखि तलब पाएनन्

कर्णाली स्वास्थ्य विज्ञान प्रतिष्ठानद्वारा जाजरकोटमा फार्मेसी कार्यक्रमको पठनपाठन बन्द गर्ने तयारी
भीमबहादुर सिंह

जाजरकोट — कर्णाली स्वास्थ्य विज्ञान प्रतिष्ठानअन्तर्गत सञ्चालन भएको ‘डिप्लोमा इन फार्मेसी’ कार्यक्रमका शिक्षक तथा कर्मचारीले ७ महिनादेखि तलब पाएका छैनन् । फार्मेसी कार्यक्रमले शिक्षक र कर्मचारीहरूलाई ७ महिनाको झन्डै ३६ लाख रुपैयाँ तलब भुक्तानी दिन बाँकी छ । 

जाजरकोटस्थित भेरी ज्ञानोदय क्याम्पसमा सञ्चालन भएको ‘डिप्लोमा इन फार्मेसी’ कार्यक्रममा अध्ययनरत विद्यार्थी । तस्बिर : भीमबहादुर/कान्तिपुर 

भेरी ज्ञानोदय क्याम्पसमा २०७६ सालदेखि फार्मेसी कार्यक्रम सञ्चालन गरिएको थियो । उक्त क्याम्पसमा ३१ जना विद्यार्थीले फार्मेसी अध्ययन गरिरहेका छन् । कार्यक्रमका लागि ९ शिक्षक र ४ कर्मचारी भर्ना गरिएको क्याम्पसले जनाएको छ । प्रतिष्ठानले पूर्णकालीन शिक्षकको व्यवस्था गर्न नसकेपछि आंशिकको भरमा कार्यक्रम चलिरहेको शिक्षक जनक केसीले बताए । ‘प्रथम वर्षको कोर्स पूरा गरेर विद्यार्थीले दोस्रो वर्ष प्रवेश गरिसके,’ उनले भने, ‘तर शिक्षक र कर्मचारीले अझै तलब पाएनौं ।’ विद्यार्थीबाट झन्डै ५०/६० लाख शुल्क रकम असुलेर पनि तलब नखुवाउनु प्रतिष्ठानको चरम लापरबाही भएको उनको भनाइ छ ।

फार्मेसी कार्यक्रमका लागि आवश्यक पर्ने बजेटको व्यवस्था गर्न नसक्दा शिक्षक र कर्मचारीलाई तलब भुक्तानी गर्न ढिलाइ भएको प्रिन्सिपल रवीन्द्रकुमार रोकायले बताए । कार्यक्रम सञ्चालन गर्नुअघि आवश्यक बजेट जिल्लाबाटै जुटाउने सहमति भए पनि सरोकारवालाले वास्ता नगर्दा समस्या भएको उनको भनाइ छ । ‘सञ्चालन तथा व्यवस्थापन खर्च र शिक्षक कर्मचारीको तलबलगायत खर्च जिल्लास्तरबाटै व्यहोर्ने गरी जाजरकोटमा डिप्लोमा इन फार्मेसी कार्यक्रम सुरु भएको हो,’ उनले भने, ‘तर विद्यार्थीको शुल्कबाहेक अरू रकम जुट्न सकेन ।’

सम्बन्धित संस्थामा बजेटको व्यवस्था हुन नसकेपछि प्रतिष्ठानमार्फत तलब खुवाउन पहल थालिएको रोकायले बताए । उनका अनुसार विद्यार्थीहरूबाट अहिलेसम्म ५० प्रतिशत मात्र शुल्क लिइएको छ । विद्यार्थीहरूले ३ वर्षे फार्मेसी कार्यक्रम अध्ययनका लागि करिब ४ लाख रुपैयाँ तिर्नुपर्ने उनले जानकारी दिए ।

कर्णाली स्वास्थ्य विज्ञान प्रतिष्ठानले भने जाजरकोटमा फार्मेसी कार्यक्रमको पठनपाठन बन्द गर्ने तयारी गरेको छ । चिकित्सा शिक्षा आयोगले सीटीईभीटीबाहेकका संस्थाले डिप्लोमा फार्मेसीलगायत शैक्षिक कार्यक्रम सञ्चालन गर्न नपाउने नियम बनाएपछि प्रतिष्ठानले उक्त कार्यक्रम बन्द गर्ने तयारी गरेको हो । कार्यक्रम बन्द हुने भएपछि घर छेउमा डिप्लोमा तहको प्राविधिक विषय पढ्न पाउने आशा बोकेका विद्यार्थी निराश बनेका छन् । ‘जाजरकोटमा फार्मेसी कार्यक्रम हात्ती आयो, हात्ती आयो फुस्साजस्तै भयो,’ विद्यार्थी कल्पना बुढाले भनिन्, ‘एक ब्याजबाहेक अरू पढाइ नहुने भएपछि विद्यार्थीलाई मर्का परेको छ ।’

प्रकाशित : असार २९, २०७८ १०:११
प्रतिक्रिया
पठाउनुहोस्

चार वर्षदेखि खानेपानी आयोजना अधुरै

सदरमुकामवासी खोलाको धमिलो पानी पिउन बाध्य
भीमबहादुर सिंह

जाजरकोट — सदरमुकामस्थित खलंगा सहलगानी खानेपानी आयोजनाको काम चार वर्षदेखि अधुरै छ । सदरमुकाम खलंगाका बासिन्दालाई खानेपानी सुविधा पुर्‍याउन थालिएको आयोजना बजेट अभावले अलपत्र परेको हो । 

जाजरकोटको खलंगा सह–लगानी खानेपानी आयोजनाको रानागाउँस्थित पानी प्रशोधन केन्द्र र पानी ट्यांकीलगायतका संरचना । तस्बिर : भीमबहादुर/कान्तिपुर

अहिलेसम्म आयोजनाको झन्डै ८५ प्रतिशत काम पूरा भएको छ । तर सवा करोड बजेट नपुग हुँदा खानेपानी आयोजना अलपत्र परेको हो । समयमै आयोजना सम्पन्न नहुँदा वर्षौंदेखि खानेपानीको अभाव झेल्दै आएका खलंगावबासी खोलाको धमिलो पानी पिउन बाध्य छन् । सदरमुकामका १ हजार घरधुरीलाई दैनिक ८ लाख लिटर शुद्ध खानेपानी वितरण गर्नका लागि आयोजना सुरु भएको हो ।

खलंगामा पानीको अभाव बढेपछि १० किमि टाढाको पोखरा, ५ किमि दूरीको बुद्बुदी र ३ किमि टाढाको भेरी नदीबाट पानी ल्याउने गरी आयोजनाको डिजाइन स्वीकृत भएको थियो । आयोजनाले दुई वर्षभित्र काम सक्ने गरी ठेक्का सम्झौता गरेको थियो । आयोजनामा ७५ प्रतिशत सरकारी लगानी र २५ प्रतिशत उपभोक्ताले व्यहोर्नुपर्नेछ ।

उपभोक्ताले व्यहोर्नुपर्ने १ करोड १९ लाख रुपैयाँ नपुग हुँदा निर्माण अलपत्र परेको उपभोक्ता समितिका अध्यक्ष वसन्तप्रसाद शर्माले बताए । उनका अनुसार आयोजनाका लागि ६ वटा ट्यांकी, पोखरा–बुदबुदी पाइपलाइन, प्रशोधन केन्द्रलगायतको काम पूरा भइसकेको छ । पाइपलाइन वितरण र धारा जडानलगायतको काम पनि सकिएको उनले जानकारी दिए । आयोजनामा अहिलेसम्म १२ करोड ७९ लाख रुपैयाँको काम भइसकेको छ ।

आयोजनामा करिब १९ करोड रुपैयाँ प्रस्ताव गरिएको छ । पहिलो चरणको काम सकिएको निर्माण कम्पनी लुम्बिनी/केशव शाह जेभीले जनाएको छ । उपभोक्ताले ३ करोड १८ लाख रुपैयाँ व्यहोर्नुपर्नेमा अहिलेसम्म उपभोक्ताबाट ३३ लाख र अन्य निकायबाट डेढ करोड रुपैयाँ बजेट जुटेको कम्पनीले जनाएको छ । थप १ करोड १९ लाख रुपैयाँ जुट्न नसक्दा आयोजना लथालिङ्ग भएको उपभोक्ता समितिका अध्यक्ष शर्माले बताए ।

आयोजना नबन्दा खानेपानी समस्या चुलिएको भेरी नगरपालिका–३ थाप्लेकी सुष्मा शाहले बताइन् । ‘कहिलेकाहीँ आउने पानी पनि धमिलो हुन्छ, खोलाको पानी नछानेरै डाइरेक्ट धारोमा खसाल्दा खान समस्या भयो,’ उनले भनिन्, ‘त्यस्तो धमिलो पानी कसरी पिउने ?’ अब आयोजनामा पानी वितरण लाइन विस्तार र फिटिङ घेराबारको काम मात्र बाँकी रहेको अध्यक्ष शर्माले बताए ।

उपभोक्ताले आयोजनामा लगानी गर्न नसक्दा र अन्य निकायले सहयोग नगर्दा आयोजना अलपत्र परेको उनको भनाइ छ । आयोजनामा उपभोक्ताका तर्फबाट लगानी नहुँदा समस्या भएको संघीय खानेपानी आयोजना फिल्ड कार्यालयका इन्जिनियर रामसुन्दर चौधरीले वताए । ‘आयोजनाको डिजाइन र बजेटको तालमेल नहुँदा पनि काम अलपत्र पर्‍यो,’ उनले भने, ‘डिजाइनमा वितरण टंकी राख्ने स्थान यकिन नहुँदा पनि समस्या छ ।’ उनका अनुसार पहिलो चरणको काम हस्तान्तरण भएपछि दोस्रो चरनको काम सुरु हुनेछ । दोस्रो चरणमा भेरी नदीको पानी पम्पिङ गरी खलंगामा पुर्‍याउने उल्लेख छ ।

प्रकाशित : असार २२, २०७८ १०:१६
पूरा पढ्नुहोस्
प्रतिक्रिया
पठाउनुहोस्
×