संक्रमण बढ्दै, छैन सावधानी- कर्णाली - कान्तिपुर समाचार

संक्रमण बढ्दै, छैन सावधानी

ज्योति कटुवाल

दैलेख — स्थानीयले सुरक्षा सावधानी नअपनाउँदा दैलेखमा कोरोना संक्रमण बढेको छ । परीक्षण गराएकामध्ये आधा व्यक्तिमा कोरोना देखिएको स्वास्थ्य सेवा कार्यालयले जनाएको छ ।

कार्यालयका अनुसार निषेधाज्ञा खुकुलो भएपछि स्थानीयहरू जथाभावी हिँडडुल गर्दा कोरोना संक्रमण बढेको हो । एक साताको अवधिमा ९९ जनाको स्वास्थ्य परीक्षण गर्दा ५० जनामा कोरोना देखिएको निमित्त स्वास्थ्य सेवा व्यवस्थापक थीरप्रसाद रेग्मीले बताए । ‘निषेधाज्ञा जारी हुँदा केही समय संक्रमित घटे, तर लकडाउन खुल्नासाथ संक्रमण दर आधा बढ्यो,’ उनले भने, ‘दैनिकजसो संक्रमित बढे नियन्त्रण गर्न गाह्रो हुन्छ ।’

संक्रमण दर मात्रै होइन, दैलेखमा दुई सातायता मृत्युदर पनि बढिरहेको छ । गत आइतबार कांग्रेस दैलेखका पूर्वसभापति जगजंग थापाको कोरोना संक्रमणबाट मृत्यु भयो । त्यसको ३ दिन नबित्दै बुधबार डुगेश्वर गाउँपालिका–२ लाँकुरीका ६१ वर्षीय वडा सदस्य तेजबहादुर थापाले ज्यान गुमाए । संक्रमितको धमाधम मृत्यु भएपछि ग्रामीण क्षेत्रमा त्रास छाएको छ । ‘त्रास बढ्यो तर सावधानी भएन,’ रेग्मीले भने, ‘भीडभाड बढेपछि धमाधम संक्रमित थपिन थाले ।’ उनका अनुसार अहिलेसम्म जिल्ला अस्पतालको आइसोलेसनमा मात्रै २७ जना कोरोना संक्रमितले ज्यान गुमाएका छन् । जिल्लामा शुक्रबारसम्म संक्रमितको संख्या ३ हजार ३ सय ६१ पुगेको छ ।

संक्रमितहरू आइसोलेसनमा नबस्दा संक्रमण फेरि बढ्न थालेको नारायण नगरपालिका–१ का मनोज थापाले बताए । ‘लकडाउन हुँदासम्म स्थानीयहरू बाहिर निस्कनसमेत डराउँथे,’ उनले भने, ‘अहिले त संक्रमित नै खुलमखुला हिँडिरहेका छन् ।’

संक्रमित व्यक्तिले नै लापरबाही गर्दा जोखिम बढेको जिल्ला प्रहरी कार्यालयका प्रहरी निरीक्षक अनुप श्रेष्ठले बताए । ‘धमाधम मृत्यु बढे पनि सावधान भएन,’ उनले भने, ‘बजार क्षेत्रमा जथाभावी हिँड्नेलाई कडाइ गरिरहेका छौं ।’

उनले मास्क लगाएर र स्वास्थ्य सुरक्षा मापदण्ड अपनाएर मात्र अत्यावश्यक काममा निस्कन स्थानीयलाई आग्रह गरिएको बताए । संक्रमित बढेपछि जिल्ला प्रशासनले असार १७ गतेदेखि विवाह, व्रतबन्ध, मृत्यु संस्कारलगायत धार्मिक तथा सामाजिक कार्यमा बढीमा १५ जना मात्रै सहभागी हुन पाउने सूचना जारी गरेको छ ।

प्रकाशित : असार २६, २०७८ ११:३८
प्रतिक्रिया
पठाउनुहोस्

७३ दिनदेखि स्वास्थ्यकर्मी धर्नामा

ज्योति कटुवाल

सुर्खेत — वीरेन्द्रनगर नगरपालिकामा कार्यरत स्वास्थ्यकर्मी ७३ दिनदेखि धर्नामा छन् । कोरोना महामारीकै समयमा नगरपालिकाले आफूहरूलाई हाजिर नदिएको भन्दै ४६ स्वास्थ्यकर्मी धर्नामा बसिरहेका हुन् ।

सुर्खेतको वीरेन्द्रनगर नगरपालिका कार्यालयअघि ७३ दिनदेखि धर्नामा बसेका स्वास्थ्यकर्मी । तस्बिर : ज्योति/कान्तिपुर

स्वास्थ्य मन्त्रालयबाट सरुवा भई आएका उनीहरूलाई नगरपालिकाले केही पद रिक्त भएको भन्दै सहमतिपत्र दिएको थियो । पत्रमा तत्काल हाजिर भई कामकाज गर्न उल्लेख गरिएको छ । सबै कर्मचारी समायोजन मिलनसम्बन्धी मापदण्ड–२०७७ बमोजिम नै सरुवा भई आएका हुन् । ‘यहाँ स्वास्थ्यकर्मीको दरबन्दी थिएन भने किन हामीलाई दरबन्दी खाली छ भन्दै पठाइयो ?,’ जनस्वास्थ्य निरीक्षक चर्तुभुज गौतमले भने, ‘खाली भएको सिफारिस दिएर अहिले दरबन्दी छैन भनिएपछि आन्दोलन गर्न बाध्य भएका हौं ।’

उनले ७३ दिनदेखि नगरपालिका अगाडि पीपलचौतारामा धर्ना बसिरहेको बताए । उनी वैशाख ६ गते लेकबेंसीबाट रमाना लिएर वीरेन्द्रनगरमा हाजिर हुन आएका हुन् । स्वास्थ्यकर्मीअनुसार नगरपालिकाले चैत २७ गतेसम्म दरबन्दी पद रिक्त भएको भन्दै सिफारिसपत्र दिएको थियो । ‘हामी कार्यरत रहेको स्थानीय तह र नगरपालिकाको सहमतिअनुसार नै यहाँ आएका हौं,’ दैलेखको गोगनपानीबाट सरुवा भएर आएकी अनमी निशा रिजालले भनिन्, ‘स्वास्थ्यकर्मीको अभाव रहेकै बेला हामीलाई काम गर्न दिइएन ।’

कोरोना महामारीकै अवस्थामा पनि आफूहरू कामविहीन बन्नुपरेको उनले गुनासो गरिन् । आन्दोलनरत स्वास्थ्यकर्मीले ३ महिनासम्म तलब खान नपाएको गुनासो गरेका छन् । चाहिनेभन्दा बढी कर्मचारी आएपछि काममा लगाउन समस्या भएको नगरपालिकाका प्रमुख प्रशासकीय अधिकृत टीकाराम ढकालले बताए । ‘अहिले यहाँ कार्यरत कर्मचारीलाई पनि तलब खुवाउन समस्या छ,’ उनले भने । उनका अनुसार नगरपालिकामा ३८ स्वास्थ्यकर्मीको दरबन्दी छ । अहिले थप ५३ स्वास्थ्यकर्मी सरुवा भएर आएपछि समस्या भएको उनले सुनाए । नगरपालिकाले सहरी स्वास्थ्य क्लिनिकका लागि १६ जना माग गरेकोमा ५३ जनालाई पठाइएको ढकालको भनाइ छ ।


प्रकाशित : असार १८, २०७८ ०९:००
पूरा पढ्नुहोस्
प्रतिक्रिया
पठाउनुहोस्
×