कोरोनामा खेतीपातीको चटारो- कर्णाली - कान्तिपुर समाचार

कोरोनामा खेतीपातीको चटारो

कान्तिपुर संवाददाता

मुगु — मुगुमकार्मारोङ गाउँपालिका तलमागीकी छिटोल तामाङको मनमा कोरोनाको डर त छ तर उनलाई खेती नगरी सुख छैन । त्यसैले उनी एकाबिहानै परिवारका सदस्य र छिमेकीसँग कुटोकोदालो बोकेर पाखोबारीतिर जान्छिन् । ‘कोरोनाको डर हुन्छ भन्छन्, तर काम नगरी खान पाइँदैन,’ उनी भन्छिन्, ‘खेतीको बेला जे रोग आए पनि हामी बस्न पाइँदैन ।’

उनीजस्तै अन्य गाउँलेहरू अहिले खेतबारीमा लागेका छन् । पुरुषहरू खेतबारी खनजोत गरी सिमी, फापर, आलु लगाउन व्यस्त छन् । महिलाहरू कोदो, कागुनो, चिनु गोडमेल गर्न व्यस्त देखिन्छन् । सोही गाउँपालिकाअन्तर्गत पापु गाउँका कन्नबिरे बुढाले रोगभन्दा पनि भोकको चिन्ताले सताउने गरेको बताए ।

उनका अनुसार गाउँका केही व्यक्तिहरू ज्वरो आउने, टाउको दुख्ने समस्याले बिरामी परेका छन् । स्थानीयवासीहरू बिरामी परे पनि खेतीपातीमा जाने गरेका उनको भनाइ छ । ‘बिरामी मान्छेहरू ज्वरो अलिकति कम हुनेबित्तिकै उठेर बारीतिर गइहाल्छन्,’ उनले भने, ‘कोरोना हो कि अरू रोग हो औषधिमूलो पनि हुँदैन ।’ सोरु गाउँपालिका–४ की धनसरा मल्ल र उनका श्रीमान् ज्वरोको बिरामी हुन् । तर उनीहरू पानीमा भिज्दै रोपाइँ गर्न खेतमा गइरहेका छन् । ‘कोरोनाको डरले पहिलाजस्तो गाउँका मान्छेहरू खेतमा सहयोग गर्न आउँदैनन्,’ उनले भनिन्, ‘आफैं खेतमा नगए त बाली लाग्दैन, पछि के खाने ?’




प्रकाशित : असार ११, २०७८ ०९:१९
प्रतिक्रिया
पठाउनुहोस्

चालु वर्षकै भएन गाउँसभा

अवधेशकुमार झा

राजविराज — अन्य पालिकाहरू आर्थिक वर्ष २०७८/७९ को नीति तथा कार्यक्रम र बजेटसहितको नगर तथा गाउँसभा गरिरहँदा सप्तरीको छिन्नमस्ता गाउँपालिकामा भने चालु आवकै सभा हुन सकेको छैन ।

गाउँपालिका अध्यक्ष सूर्यनारायण मण्डल र अन्य जनप्रतिनिधिबीचको विवादले गत वर्षको असार १० गते नै हुनुपर्ने गाउँसभा अझै हुन नसकेको हो ।

गाउँसभा नहुँदा चालु आर्थिक वर्षमा विकास निर्माण र ससर्त अनुदानसम्बन्धी रकम खर्च हुन सकेको छैन । लेखापाल बालगोविन्द साहका अनुसार कर्मचारीको तलब र सामाजिक सुरक्षा भत्ताबाहेक कुनै पनि रकम भुक्तानी भएको छैन । उनका अनुसार चालु आर्थिक वर्षको ससर्त अनुदानको ३ करोड रुपैयाँ फ्रिज हुने अवस्था छ । ‘गत वर्ष नै हुनुपर्ने चालु आर्थिक वर्षको नीति तथा कार्यक्रम र बजेटसहितको गाउँसभा अझै हुन सकेको छैन,’ लेखापाल साहले भने, ‘आगामी आर्थिक वर्षको कुरा त के गर्नु ?’ उनले नयाँ प्रमुख प्रशासकीय अधिकृत आएकाले केही गर्न सक्ने अपेक्षा गरे ।

गाउँसभा नहुनुमा गाउँपालिका अध्यक्ष मण्डल र अन्य जनप्रतिनिधिहरू भने एकअर्कालाई दोषारोपण गर्छन् । ‘गाउँसभा गराउन अध्यक्ष नै जिम्मेवार छैनन्,’ गाउँपालिका उपाध्यक्ष उषाकुमारी मण्डलले भनिन्, ‘कार्यपालिकाको बैठक बोलाउँछन् तर गाउँसभा गर्नेबारे कुरै गर्दैनन् ।’ अध्यक्ष मण्डलले गाउँसभा गर्नुपर्ने आफ्नो मात्र जिम्मेवारी नरहेको बताए । ‘परिषद् एक्लै अध्यक्षले मात्र गर्ने हो कि वडाध्यक्षहरूले पनि ?’ उनले भने, ‘म आफ्नो जिम्मेवारीमा पछाडि छैन ।’ उनले सभा नहुनुको कारण वडाध्यक्षहरूलाई सोध्नुपर्ने बताए । ‘दारु, मासु र पैसा लिएर चुनाव जितेकाहरू कसरी जनताको समस्या पहिचान गर्न सक्छन् त ?’ अध्यक्ष मण्डलले भने, ‘किन सभा हुन सकेन पत्ता लगाउनुपर्छ ।’

गाउँसभा नभए पनि अध्यक्ष मण्डलले पालिकाभित्रका विभिन्न योजनाको डीपीआर गरिएको भन्दै डेढ करोडभन्दा बढी रकम भुक्तानीका लागि निर्णय गर्न उपाध्यक्षसहित वडाध्यक्षहरूलाई दबाब दिएका छन् ।

उनले एकल आदेशमा घोडदह नदीको पुल, स्वास्थ्य चौकी, विद्यालय र सडकहरूको डीपीआर गरिएको भन्दै उक्त रकम भुक्तानीका लागि निर्णय गरिदिन दबाब दिएका हुन् । ‘गाउँसभाबिना कसरी डीपीआर गरिएको भुक्तानीको निर्णय गर्नु ?’ उपाध्यक्ष मण्डलले भनिन् ।

प्रकाशित : असार ११, २०७८ ०९:१५
पूरा पढ्नुहोस्
प्रतिक्रिया
पठाउनुहोस्
×