सल्यानमा असार १० सम्म निषेधाज्ञा
सल्यान — सल्यानमा पाँचौ पटक निषेधाज्ञा थपिएको छ । जिल्लाका सबै पालिकामा कोरोना संक्रमण तथा मृत्युदरमा पूर्णरुपमा नियन्त्रणमा नआएको भन्दै एक साताका लागि पाँचौ पटक निषेधाज्ञा थप गरिएको हो ।
जिल्ला कोभिड १९ व्यवस्थापन केन्द्र सल्यानको मंगलबार बसेको बैठकले असार ३ गते बिहान १ बजेदेखि असार १० गते राति १२ बजेसम्मका लागि निषेधाज्ञा थप गरिएको प्रमुख जिल्ला अधिकारी लक्ष्मीदेवी होमागाईले बताइन् । उनका अनुसार बैठकले जिल्लामा रहेका बैंकहरु स्वास्थ्य सुरक्षा मापदण्ड पालना गरी दैनिक सञ्चालन गर्न पाउने र सरकारी कार्यालय कर्मचारी आलोपालो गरी सञ्चालन गर्ने निर्णय गरेको छ । सार्वजनिक एवं निजी सवारीसाधन सञ्चालनमा पूर्णरुपमा रोक लगाइएको उनले जानकारी गराइन् ।
सरकारी कार्यालय तथा बैंक, टेलिकमका सवारीसाधन बिहान ८ देखि १० बजेसम्म र बेलुकी ५ देखि ७ बजेसम्म कार्यालयमा आउजाउ गर्न पाउने र अन्य अत्याबस्यक सवारी साधनमा ब्यानर राखेर सञ्चालन गर्न पाउने प्रमुख जिल्ला अधिकारी हुमागाईले बताइन् । ‘बैठकले गरेको निर्णय अनुसार तरकारी, फलफूल, माछामासु, दाना, एग्रोभेट, डेरी, खाना पकाउने ग्यास तथा खाद्यान्न पसल दैनिक बिहान ६ बजेदेखि ११ बजेसम्म मात्र सञ्चालन गर्न पाउने छन्’ उनले भनिन् ।
कोरोना महामारी पुर्ण रुपमा नियन्त्रण नभएकाले अनिबार्य काम बाहेक अन्य समयमा घरबाट बाहिर ननिस्कन तथा घरबाट बाहिर निस्कन पर्दा अनिवार्य रुपमा मास्क तथा स्वास्थ्य सचेतना अपनाइ आउजाउ गर्न उनले आग्रह गरेकी छन् । कोरोनाको संक्रमण बढदै गएपछि वैशाख १९ देखि जिल्लामा निषेधाज्ञा सुरु गरिएको थियो ।
प्रकाशित : असार १, २०७८ १६:०५
