सहुलियतको चामल लिन घुइँचो- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

सहुलियतको चामल लिन घुइँचो

कम्पनीले एक सातादेखि प्रतिकिलो २० प्रतिशत छुट दिएर नुन र चामल बिक्री गरेको छ
तुलाराम पाण्डे

कालीकोट — सरकारले निषेधाज्ञा अवधिभरि खाद्य व्यवस्था तथा व्यापार कम्पनी लिमिटेडको चामलमा २० प्रतिशत छुट दिने घोषणा गरेपछि चामल लिनेको घुइँचो लाग्न थालेको छ । झन्डै एक महिनादेखिको निषेधाज्ञाका कारण विपन्न नागरिकलाई जीविकोपार्जनमा समस्या भएपछि चामल लिनेको भीड लागेको हो ।

सहुलियतको चामल लिन कालीकोटको मान्मस्थित खाद्य व्यवस्था तथा व्यापार कम्पनी लिमिटेडमा आएका स्थानीय । तस्बिर : तुलाराम/कान्तिपुर

कम्पनीले एक सातादेखि प्रतिकिलो २० प्रतिशत छुट दिएर नुन र चामल बिक्री गरेको छ । सहुलियतको चामल लिन सदरमुकाम मान्मसहितका गाउँबाट आइतबार २ सय ८० जना आएको कम्पनीले जनाएको छ । आइतबार मान्मस्थित खाद्य गोदामबाट ७६ क्विन्टल चामल बिक्री भएको शाखा प्रमुख शरण लामिछानेले बताए । ‘कोरोनापीडित नागरिकलाई छुटले विशेष राहत भएको छ,’ उनले भने, ‘काम गर्न नपाएर मर्कामा परेका नागरिकले अहिले धमाधम सहुलियतको चामल लिइरहेका छन् ।’ उनले स्थानीय प्रशासनको सल्लाहमा सोमबारदेखि बिहान ६ बजेदेखि ९ बजेसम्म मात्र चामल बिक्री गर्न थालिएको बताए । उनका अनुसार सोमबार पनि ३ सय १२ जनाले ८४ क्विन्टल चामल लिएका छन् ।

सरकारले छुटको चामल दिएपछि ज्याला मजदुरी गरेर जीविकोपार्जन गर्ने विपन्न समुदायलाई राहत मिलेको नरहरिनाथ–८ लालुका मानबहादुर विकले बताए । उनका अनुसार खाद्यले प्रतिपरिवार एक जनालाई नागरिकताको आधारमा २५ किलोको १ बोरा चामल दिने गरेको छ ।

सरकारले छुटको घोषणा नगर्दासम्म मान्मस्थित खाद्य गोदामबाट दैनिक २०/२५ जनाले मात्र चामल लिने गरेका थिए । अहिले थेगी नसक्नुको भीड लाग्ने गरेको प्रमुख जिल्ला अधिकारी कृष्णप्रसाद आचार्यले बताए । उनले कोरोना कहरमा भीड कम गर्न बिहान चामल बिक्री गर्ने नियम बनाइएको बताए । सोमबारसम्म मान्म शाखामा १ हजार ३ सय, पादमघाट डिपोमा ४ सय २३, खल्लागाडमा १ सय १०, थिर्पूमा ८६ क्विन्टल चामल मौज्दात छ ।

त्यस्तै खीन र धौलागोह बिक्री केन्द्रमा ठेकेदारले खाद्य संस्थानबाट चामल खरिद गरेर बिक्री गरिरहेका छन् । लकडाउनले बजार क्षेत्रका खाद्य पसल बन्द भएकाले आफूहरूलाई धेरै ठूलो राहत भएको खाडाचक्र–२ की जमुना दमाइले बताइन् । ‘बजारका पसल खुले पनि महँगो पर्ने,’ उनले भनिन्, ‘बजारको भन्दा सरकारी चामलको भात मीठो पनि छ ।’ उनका अनुसार गत वर्षको लकडाउनमा गाउँमा पर्याप्त खाद्यान्न नहुँदा काँचो बाली काटेर खानुपर्ने बाध्यता थियो । उनले ग्रामीण क्षेत्रका डिपोमा पनि पर्याप्त चामल पुग्न सके विपन्न नागरिकले राहतको महसुस गर्ने बताइन् ।

कम्पनीले २० प्रतिशत छुट हुनुअघि २५ किलोको अरुवा मोटा चामल प्रतिबोरा १ हजार १ सय ८७ रुपैयाँमा बिक्री गरिरहेको थियो । अहिले ९ सय ५० रुपैयाँमा चामल बिक्री भइरहेको छ । त्यस्तै १ हजार ५ सय पर्ने अरुवा मध्यम चामल १ हजार २ सय, १ हजार ६ सय ५० पर्ने जिरा मसिनो चामल छुटपछि १ हजार ३ सय २० र यसअघि १ हजार ४ सय ४० मा बिक्री हुने मकावनपुर चामल १ हजार १ सय ५२ रुपैयाँमा बिक्री भइरहेको छ ।

चामल खपत बढ्यो

सरकारले कर्णालीका बासिन्दाका लागि लागू गरेको जन्ममरण संस्कारको चामल कालीकोटमा बढी खपत हुने गरेको छ । सरकारले कर्णालीका हिमाली जिल्लामा जन्म र मृत्यु संस्कारमा २० किलो चामल निःशुल्क दिने घोषणा गरेको छ ।

कम्पनीले ढुवानी ज्यालासहित यो वर्ष २ सय ७० क्विन्टल चामल जन्म र मृत्यु संस्कारमा वितरण गरेको छ । गत वर्ष मान्म डिपोबाट १५ लाख ९२ हजार रुपैयाँको चामल र ११ लाख २३ हजार रुपैयाँ ढुवानी खर्चबापत वितरण भएको शाखा प्रमुख लामिछानेले बताए । उनका अनुसार निषेधाज्ञाको समयमा समेत जन्म र मृत्युको निःशुल्क चामल लिन एक/दुई दिनको पैदल बाटो हिँडेर ग्रामीण भेगका बासिन्दा सदरमुकाम आउने गरेका छन् । चालु आर्थिक वर्षको वैशाख मसान्तसम्म जन्मबापत १ हजार ४ सय ५२ जनाले २० किलोको दरले २ सय ९० क्विन्टल र मृत्युबापत ४७ जनाले ९ क्विन्टल चामल पाएका छन् ।

प्रकाशित : जेष्ठ २६, २०७८ ०८:५७
प्रतिक्रिया
पठाउनुहोस्

कालीकोटमा राष्ट्रिय प्रसारण

कान्तिपुर संवाददाता

कालीकोट — ठेक्का अवधि सकिएको दुई वर्षपछि सदरमुकाम मान्ममा राष्ट्रिय प्रसारण लाइन पुगेको छ । लोडसेडिङको चर्को मारमा रहेका स्थानीयले सोमबार रातिदेखि राष्ट्रिय प्रसारण लाइनको बिजुली बाल्न पाएका हुन् । 

कालीकोटका ग्रामीण भेगमा केन्द्रीय प्रसारण लाइन विस्तारका लागि खाडाचक्र–३ ताडीमा थुपारिएका विद्युत्‌का पोल । तस्बिर : कान्तिपुर

दैलेखको दुल्लुबाट कालीकोटको मान्मसम्मको ६५ किमि प्रसारण लाइनमा बिजुली बलेको हो । लाइन जडानको ठेक्का पाएको त्रिपुरेश्वर/नवदुर्गा जेभीले ३ वर्षभित्र सबै काम सक्ने गरी आर्थिक वर्ष २०७३/७४ ठेक्का सम्झौता गरेको थियो । तर कम्पनीको ढिलाइले मान्ममा बल्ल बिजुली बलेको हो । अहिले सान्नीगाड साना जलविद्युत् केन्द्रबाट विद्युतीकरण भएका करिब २ हजार ८ सय घरधुरीमा बत्ती बलेको छ ।

मान्म, ताडी, रकु, मेहेलमुडी, मुम्रा, स्युना, सिप्खा र फुकोटमा पहिलो चरणमा बिजुली बलेको वितरण केन्द्र प्रमुख मेघराज जोशीले बताए । उनका अनुसार ३३ केभीको पुरै काम नसकिएकाले तत्काल ११ केभी लाइन मात्र आएको छ । उनले मान्ममा सबस्टेसन बनाउन बाँकी भएकाले पहिले मिटर जडान भएका घरमा सिधै बत्ती पठाइएको जानकारी दिए । जिल्लामा पहिलोपल्ट राष्ट्रिय प्रसारण लाइन जोडिएपछि स्थानीय खुसी छन् । ‘अब नियमित बत्ती बाल्न पाइने भयो,’ स्थानीय नर विकले भने, ‘बल्ल अँध्यारोबाट मुक्ति पाइयो ।’

कालीकोट र जुम्लालाई राष्ट्रिय प्रसारणसँग जोड्न दैलेखको दुल्लुबाट मान्मसम्म पोल खरिद, गाड्ने र लाइन तान्ने कामका लागि करिब १३ करोड रुपैयाँमा ठेक्का सम्झौता भएको थियो । अहिले मान्मभन्दा अगाडिको काम भइरहेको छ । कर्णालीका मुख्यमन्त्री महेन्द्रबहादुर शाहीले ऊर्जामन्त्री भएका बेला नीतिगत निर्णय गरेर कर्णालीमा राष्ट्रिय प्रसारण लाइन जडानको काम अघि बढाएका थिए ।


प्रकाशित : जेष्ठ २६, २०७८ ०८:५५
पूरा पढ्नुहोस्
प्रतिक्रिया
पठाउनुहोस्
×