मुसीकोटमा ५० सय्याको आइसोलेसन- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

मुसीकोटमा ५० सय्याको आइसोलेसन

हरि गौतम

रुकुम पश्चिम — मुसीकोट नगरपालिकाले ५० शय्याको आइसोलेसन सञ्चालनमा ल्याएको छ । मुसीकोट–१ सल्लेस्थित राप्ती समाज अस्पताललाई भाडामा लिएर नगरपालिकाले आइसोलेसन बनाएको हो ।

रुकुम पश्चिमको मुसीकोट नगरपालिकाले कोभिड आइसोलेसनका लागि भाडामा लिएको भवन । तस्बिर : हरि/कान्तिपुर

अस्पतालमा ५० शय्या तयार छन् । थप शय्या राख्ने ठाउँसमेत अस्पतालमा छ । पहिलो चरणमा ५ वटा अक्सिजन सिलिन्डरको व्यवस्था गरिएको नगरपालिकाका प्रमुख प्रशासकीय अधिकृत नरहरि तिवारीले बताए । उनका अनुसार प्रतिमहिना २ लाख २५ हजार रुपैयाँ भाडा तिर्ने गरी अस्पताल भाडामा लिइएको हो । ‘नयाँ व्यवस्थापन गर्न समय र बजेट धेरै चाहिने भएपछि अस्पताललाई भाडामा लिएका हौं,’ उनले भने, ‘जिल्ला अस्पतालमा पनि आइसोलेसन भएकाले अहिले नगरपालिकाभित्र खासै ठूलो समस्या छैन ।’

जिल्ला अस्पतालमा ७ शय्याको मात्रै आइसोलेसन छ । त्यसमा १२ संक्रमितको उपचार भइरहेको थियो । अस्पतालमा शय्या नभएपछि बाहिर र भुइँमै राखेर उपचार थालिएको थियो । ५० बेडको अस्पताल सञ्चालनमा आएपछि ३ जना बिरामीको उपचार पनि सुरु भइसकेको प्रमुख प्रशासकीय अधिकृत तिवारीले बताए । उनका अनुसार तत्कालका लागि ४ जना स्वास्थ्यकर्मी खटाइएको छ । दोस्रो तलामा स्वास्थ्यकर्मी बस्ने व्यवस्था मिलाइएको छ भने पहिलो र भुइँ तलामा संक्रमितको उपचार गरिनेछ । यही अस्पताललाई गत वर्ष नगरपालिकाले क्वारेन्टाइनको रूपमा प्रयोग गरेको थियो ।

पहिलो चरणमा ५ वटा अक्सिजन सिलिन्डरको व्यवस्था गरिए पनि थप अक्सिजन खरिद प्रक्रिया अघि बढाइएको नगरप्रमुख देवीलाल गौतमले बताए । उनका अनुसार एकैपटक ५० जनाको उपचार गर्न मिल्ने गरी अस्पताल भाडामा लिइएको हो । जिल्ला कोभिड–१९ संकट व्यवस्थापन केन्द्रको बैठकले हरेक स्थानीय तहमा २० शय्याको आइसोलेसन बनाउने निर्णय गरेको थियो । चौरजहारीमा पनि १८ शय्याको आइसोलेसन तयारी अवस्थामा छ । चौरजहारी अस्पतालमा एक सय बेडको अस्पताल सञ्चालनमा ल्याउने तयारी गरिएको नगरप्रमुख विशाल शर्माले बताए ।

आठबीसकोट नगरपालिकाले गत वर्ष नै निर्माण गरेको आइसोलेसन भवनलाई व्यवस्थित गर्दैछ । अहिले १५ देखि २० जना संक्रमितको एकैपटक उपचार गर्न सकिने नगरप्रमुख गोर्खबहादुर केसीले बताए । उनका अनुसार आइसोलेसनका लागि अक्सिजनको व्यवस्था भइरहेको छ । सानीभेरी र त्रिवेणी गाउँपालिकाले पनि २०/२० शय्याको आइसोलेसन बनाउने तयारी थालेका छन् । त्रिवेणीमा पहिल्यै भएको १२ बेडको अस्पतालमा ८ शय्या थप्न लागिएको छ । सानीभेरीले पनि १० शय्याको अस्पताललाई २० बेडको बनाउन थालेको छ । बाँफिकोट गाउँ कार्यपालिका बैठकले १५ बेडको अस्पताल बनाउने निर्णय गरेर व्यवस्थापनको काम अघि बढाएको छ । केन्द्रको निर्णयअनुसार २० बेडको अस्पताल बनाउने काम सुरु भइसकेको गाउँपालिका अध्यक्ष धर्मबहादुर केसीले बताए ।

हरेक पालिकामा २० संक्रमितको एकै पटक उपचार गर्न सकेको खण्डमा जिल्लामा जटिल समस्या नआउने जिल्ला समन्वय समिति प्रमुख राजकुमार शर्माले बताए । ‘सबैतिर अक्सिजनको व्यवस्थापन गर्न लागेका छौं,’ उनले भने, ‘अक्सिजन प्राप्त हुनेबित्तिकै सबै स्थानीय तहमा संक्रमितको उपचार सुरु हुनेछ ।’

प्रकाशित : वैशाख २३, २०७८ ०८:४२
प्रतिक्रिया
पठाउनुहोस्

संक्रमित बोक्न मान्दैनन् एम्बुलेन्स

नवीन पौडेल

परासी — बर्दघाट नगरपालिका–११ का आत्मराम चौधरीले आइतबार बिहान जिल्लाका तीनवटा एम्बुलेन्स चालकलाई फोन गरे । वृद्ध आमालाई एक्कासि ज्वरो आएपछि अस्पताल लैजान उनले फोन गरेका हुन् ।

दुई चालकले चार–पाँचपटक लगातार फोन गरेपछि फोन त उठाए तर एक जनाले आफू बुटवल भएको बताए भने अर्काले आफ्नो एम्बुलेन्स पाटेसन नगरिएकाले कोरोना संक्रमणको लक्षण भएका बिरामी नबोक्ने बताए ।

सहजै एम्बुलेन्स पाउने छाँट नदेखेपछि अन्तिममा उनले गाउँकै निजी सवारी साधन खोजेर आमालाई बुटवल लिएर जानुपर्‍यो । ‘संक्रमण फैलन लागेको एक वर्षभन्दा बढी भयो । अहिलेसम्म सुरक्षाका मापदण्ड छैनन् भनेर बिरामी नबोक्ने यो कस्तो परिपाटी हो ?,’ उनले भने, ‘स्वास्थ्यजस्तो संवेदनशील विषयमा एम्बुलेन्स चालकले बिरामी बोक्दिनँ भन्नु गैरजिम्मेवारी हो । एम्बुलेन्स सहज अवस्थामा मात्र पैसा कमाउने माध्यम नबनोस् ।’

यो त प्रतिनिधि घटनामात्र हो । जिल्लाका सबैजसो एम्बुलेन्स चालकलाई फोन गर्दा पहिला के भएको बिरामी हो भनेर सोध्ने र ज्वरो, खोकी छ भनेपछि व्यस्त छौं भनेर टार्ने गरेको स्थानीयको गुनासो छ । लक्षण देखिएका बिरामी अस्पताल जानुपर्‍यो भने एम्बुलेन्स नपाइने रामग्राम नगरपालिका–९ का वसन्त गाहाले बताए । यसले गर्दा बिरामीले समयमा उपचार नपाउने समस्या छ ।

केही दिन अगाडि मात्रै बर्दघाटका एम्बुलेन्स चालक मानबहादुर रानाले स्वास्थ्य मापदण्ड पूरा नभएको साधनमा बिरामी बोक्नुपरेको भन्दै एम्बुलेन्सको साँचो नगरपालिकालाई बुझाएका थिए । पीसीआर परीक्षणका लागि अस्पताल जान पटक–पटक फोन आएको तर आफूले चलाइरहेको एम्बुलेन्समा पाटेसन नभएको हुँदा सेवा दिन नसक्ने जानकारी गराएको चालक गाहाले बताए । ‘एम्बुलेन्स चालकको सुरक्षा र प्रोत्साहन भत्ताका लागि कसैले पनि चासो नदिने अनि जबर्जस्ती स्वास्थ्य मापदण्ड पूरा नभएको सवारीसाधनमा बिरामी बोक्न भन्ने ?,’ उनले भने, ‘हाम्रो पनि स्वास्थ्य सुरक्षामा ध्यान दिनुपर्‍यो । स्वास्थ्य सुरक्षा र प्रोत्साहन भत्ता नपाएकाले साँचो बुझाएको हुँ ।’

जिल्लामा अहिले २३ वटा एम्बुलेन्स सञ्चालनमा छन् । त्यसमध्ये बर्दघाट क्षेत्रमा सञ्चालित दुईवटा एम्बुलेन्स बिग्रिएर थन्किएका छन् । संक्रमित बोक्ने एम्बुलेन्सलाई चालक बस्ने र बिरामी राख्ने स्थानको बीचमा पाटेसन गरेर सुरक्षित पार्ने काम गरिएको संयुक्त एम्बुलेन्स चालक संघ परासीका अध्यक्ष कृष्ण साहनीले बताए । ‘हामीले धमाधम सबैखाले बिरामी बोकिरहेका छौं । जिल्लामा शव वाहन नहुँदा हामीले शव पनि बोक्नुपर्ने अवस्था छ,’ उनले भने, ‘यो बेला ज्वरो तथा संक्रमणको लक्षण भएका बिरामी बढेको र एम्बुलेन्स पनि व्यस्त भएकाले चाहिएको समयमा उपलब्ध हुन नसकेको हो ।’

प्रकाशित : वैशाख २३, २०७८ ०८:३७
पूरा पढ्नुहोस्
प्रतिक्रिया
पठाउनुहोस्
×