अफिम खेती नष्ट- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

अफिम खेती नष्ट

भीमबहादुर सिंह

जाजरकोट — जिल्ला प्रहरी कार्यालयले गत वर्ष झन्डै ५० रोपनी जग्गामा लगाइएको अफिम खेती नष्ट गर्‍यो । यो वर्ष करिब एक सय रोपनीमा लगाइएको अफिम नष्ट गरेको प्रहरीको तथ्यांक छ । तर खेतीमा संलग्नहरू अहिलेसम्म पक्राउ परेका छैनन् ।

जिल्ला प्रहरी कार्यालयले बर्सेनि यही सिजनमा अफिम नष्ट गर्न अभियान चलाउने गरेको छ । तर खेती गर्नेको पहिचान नहुँदा संलग्नहरू पक्राउ नपरेका हुन् । जिल्लामा सबैभन्दा बढी नलगाड नगरपालिकामा अफिमको खेती भइरहेको कार्यालयको तथ्यांक छ । गाउँमा व्यावसायिक रूपमा अफिम खेती हुन थाले पनि संलग्नमाथि कारबाही नहुँदा मनोमानी बढिरहेको स्थानीय कमल केसीले बताए ।

उनका अनुसार कम लगानीमा धेरै आम्दानी हुने प्रलोभनमा किसानले अफिम खेती गरिरहेका हुन् । ‘अधिकांशलाई अफिम अवैध हो भन्नेसमेत थाहा छैन,’ उनले भने, ‘धेरैले बढी कमाउने आशामै अफिमको व्यावसायिक खेती गरिरहेका छन् ।’

प्रहरीले अफिम खेती नष्ट गरेर लागूऔषधको कारोबार तथा ओसारपसार नियन्त्रण गर्न खोजे पनि बर्सेनि खेती बढिरहेको सक्लाका प्रेम विकले बताए । ‘अफिम नष्ट भए पनि संलग्नलाई कुनै पनि सजाय नहुँदा मनोमानी बढिरहेको छ,’ उनले भने, ‘वर्षमा १/२ जनालाई कारबाही भए पनि खेती रोकिन्थ्यो ।’

प्रहरीले यो वर्ष मात्र २५ किलो अफिमसहित १२ जना कारोबारीलाई पक्राउ गरी मुद्दा चलाएको छ । धेरै आम्दानीको आशामा स्थानीयले अन्नबालीको खेती छोडेर अफिम लगाउने गरेको पाइएको जिल्ला प्रहरी प्रमुख डीएसपी मधुकुमार थापाले बताए । उनका अनुसार सिँचाइ सुविधा नभएका जग्गामा अफिम खेती हुने गरेको पाइएको छ । ‘बर्सेनि अभियान चलाइरहेका छौं, तर पनि खेती रोकिएको छैन,’ उनले भने, ‘मातहतका सबै प्रहरी एकाइलाई नियमित गस्ती गरी खेती नष्ट गर्न निर्देशन दिइएको छ ।’

स्थानीयले उत्पादन गरेको अफिम किन्न व्यापारीहरू गाउँमै पुग्ने गरेकाले पनि खेती मौलाएको नलगाड–३ का दीपक पुनले बताए ।

प्रकाशित : वैशाख ३, २०७८ ०९:०२
प्रतिक्रिया
पठाउनुहोस्

भारतबाट अझै आएन थप खोप

जगदीश्वर पाण्डे

काठमाडौँ — स्वास्थ्य तथा जनसंख्यामन्त्री हृदयेश त्रिपाठी दिनहुँजसोको भाषणमा भन्छन्, ‘कोभिड–१९ विरुद्धको थप खोप आवश्यकताअनुसार भारतबाट छिट्टै ल्याइनेछ/आउँछ ।’ तर, निर्णय गरेको दुई महिनासम्म खोप आएको छैन । 

टेकुस्थित केन्द्रीय खोप भण्डारमा भण्डार गर्ने क्रममा खोपका सिसी । तस्बिर : इलिट जोशी/कान्तिपुर

नेपालले भारतीय कम्पनी सिरम इन्स्टिच्युट अफ इन्डियासँग खरिद सम्झौता गरेको २० लाख डोज खोपमध्ये १० लाख अझै आइपुगेको छैन । मन्त्रिपरिषद्को फागुन ४ मा बसेको बैठकले सिरमबाट २० लाख खोप ल्याउने निर्णय गरेको थियो । १० लाख डोज खोप नेपालले फागुन ९ मै पाएको थियो ।

बाँकी खोप नआएपछि गत चैत २७ मा परराष्ट्रमन्त्री प्रदीपकुमार ज्ञवाली र भारतका विदेशमन्त्री एस जयशंकरबीच भएको टेलिफोन संवादमा पनि नेपाललाई आवश्यक खोप उपलब्ध गराउने विषयमा कुरा भएको थियो । त्यसबेला जयशंकरले नेपालले खरिद गरेको र भविष्यमा आवश्यक पर्ने खोप सहयोग गर्ने वाचा गरेका थिए ।

कोभिड–१९ संक्रमण र मृतकको संख्या बढ्दै गएपछि भारतले केही दिनअघि विदेशमा तत्कालका लागि खोप निर्यात नगर्ने निर्णय गरेको थियो । भारतले केही समयअघिसम्म विश्वका ७० भन्दा बढी मुलुकमा ६ करोड डोजभन्दा बढी कोभिड–१९ को खोप निर्यात गरिसकेको छ । खरिद गरेको १० लाख डोजबाहेक भारतले नेपाललाई माघ ८ मा १० लाख डोज खोप उपहारस्वरूप दिएको थियो । चैत दोस्रो सातादेखि तत्कालका लागि खोप निर्यात बन्द गरेको भारतले नेपालको सवालमा भने बन्द नगरिएको जनाएको छ तर व्यवहारमा नेपालले खरिद गरेकै खोप पनि आएको छैन ।

जयशंकरले संवादका क्रममा नेपालले खरिद गरेको खोप निर्यातका लागि सहयोग गर्ने प्रतिबद्धता जनाएको मन्त्री ज्ञवालीले कान्तिपुरलाई बताए । ‘दुई मुलुकका परराष्ट्रमन्त्रीबीच संवाद भएपछि कोभिड–१९ भ्याक्सिनका लागि लगातार पहल भए पनि भारतीय पक्षबाट नेपाललाई कहिलेसम्म खोप उपलब्ध गराउन सकिन्छ भन्ने सन्देश प्रवाह भइसकेको छैन,’ परराष्ट्र मन्त्रालय स्रोतले भन्यो, ‘खोप अत्यावश्यक भएका कारण हामीले लगातार पहल गरिरहेका छौं ।’ स्वास्थ्य मन्त्रालयले भने खोप ल्याउने सम्बन्धमा परराष्ट्र मन्त्रालयले समन्वय गरिरहेको जनाएको छ ।

काठमाडौंस्थित भारतीय दूतावासका प्रवक्ता नवीन कुमारका अनुसार नेपालले खरिद गरेको कोभिड–१९ खोप केही ढिलो गरी नेपालमा आउने बताए । उनले भने, ‘कहिले नेपालमा खोप आउँछ भन्ने मिति अझै तय भइसकेको छैन ।’

प्रकाशित : वैशाख ३, २०७८ ०९:००
पूरा पढ्नुहोस्
प्रतिक्रिया
पठाउनुहोस्
×