हुम्लाको सल्लीसल्लामा पुग्यो बस

हुम्ला — कर्णाली करिडोर हुँदै हुम्लाको सल्लीसल्लामा पहिलोपटक यात्रुवाहक बस पुगेको छ । यसअघि सर्केगाडको बालुकुनासम्म बस चल्ने गरेको थियो । बसधनी दन्तबहादुर शाहीले मंगलबार चंखेलीको सल्लीसल्लामा बस पुगेको जानकारी दिए ।

हुम्लाको सल्लीसल्लामा पुग्यो बस

उनका अनुसार फागुन १५ गते सुर्खेतबाट अछामको मंगलसेन हुँदै बस बालुकुना पुर्‍याइएको थियो ।

सोही बस सल्लीसल्ला पुगेपछि स्थानीयवासीले बाजागाजासहित स्वागत गरेका थिए । ‘बस पुगेपछि गाउँमा खुसी छाएको छ,’ उनले भने, ‘अब सरकारले छिट्टै नियमित बस चल्ने व्यवस्था गरोस् ।’

कर्णाली प्रदेश ००१ ख ०४०२ नम्बरको बस कालीकोटको जितेमा पुल नहुँदा अछामको मंगलसेन हुँदै बाजुराबाट हुम्ला पुर्‍याइएको थियो । बस चल्न थालेपछि हुम्लाका ताजाकोट, अदानचुली, चंखेली र सर्केगाड गाउँपालिका कर्णाली करिडोरले राष्ट्रिय सडक सञ्जालसँग जोडिएका छन् । जितेमा पुल बनेपछि सुर्खेतबाट सिधै बस सञ्चालन हुनेछ ।

नेपाली सेनाले ६ वर्षअघि कर्णाली करिडोर निर्माणको जिम्मा लिएको थियो । यसअघि सर्केगाडको बालुकुनासम्म साना सवारी साधनहरू चल्ने गरेका थिए । बस भने बालुकुनाभन्दा अझ अगाडि पर्ने सल्लीसल्लासम्म पुगेको हो ।

जिल्ला प्रशासन कार्यालय र अन्य सरोकारवालासँग समन्वय गरी नियमित रुपमा बस सञ्चालन गर्ने उनको भनाइ छ । हुम्लाको उत्तरी भेकमा पर्ने नाम्खा र सिमकोटमा हिल्साबाट सडक पुगेको छ । कर्णाली करिडोरले ताजाकोट, अदानचुली, चंखेली र सर्केगाड गाउँपालिकालाई छोएपछि अब खार्पुनाथ गाउँपालिकामात्र सडक सञ्जालले जोडिन बाँकी छ ।

प्रकाशित : चैत्र १३, २०७७ १२:२६
प्रतिक्रिया
पठाउनुहोस्
जनताको राय

८ देशका लागि सिफारिस भएका राजदूतको नाम कस्तो लाग्यो ?

x