रारामा पर्यटक बढे, बासको समस्या- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

रारामा पर्यटक बढे, बासको समस्या

राजबहादुर शाही

मुगु — कर्णालीको प्रमुख पर्यटकीय गन्तव्य रारा तालमा पर्यटक बढेपछि बासको समस्या हुन थालेको छ । अहिले रारामा दैनिक करिब डेढ सय पर्यटक घुम्न आइरहेका छन् ।

चैत सुरु भएसँगै हवाइ र सडक मार्गबाट रारा आउने पर्यटकको संख्या बढेको हो । रारा क्षेत्र आन्तरिक पर्यटकले भरिभराउ हुन थालेको रारा राष्ट्रिय निकुञ्जका संरक्षण अधिकृत बद्रिविनोद दाहालले बताए । उनका अनुसार मिलिचौर, सल्लेरी, ताल्चलगायत गाउँमा पर्यटकको घुइँचो लाग्न थालेको हो । काठमाडौ, भक्तपुर, पोखरा, विराटनगरलगायत ठाउँबाट समूहमा रारा घुम्न आउनेहरु बढिरहेको उनको भनाइ छ । ‘पर्यटक बढेपछि बासको समस्या हुन थाल्यो,’ उनले भने, ‘केही पर्यटकलाई टेन्टमा बसाउनुपर्ने अवस्था छ ।’

बासको समस्या हुन थालेपछि केही पर्यटक मिलिचौरबाटै फर्कन बाध्य छन् । रारा वरिपरि दुई पर्यटकीय होटेलसहित माझघट्ट होमस्टे सञ्चालन भएपछि पर्याप्त पर्यटक राख्न समस्या छ । ‘राम्रो होटेल नहुँदा बस्नै समस्या हुने देखियो,’ आइतबार रारा आएका सुर्खेतका कमल केसीले भने, ‘एक/दुई घण्टा घुमेर बाटोमै बास बस्न जानुपर्ने बाध्यता भयो ।’

पर्यटकलाई खान र बस्नको राम्रो सुविधा दिन सके आएका पर्यटक चार/पाँच दिनसम्म रारामै राख्न सकिने संरक्षण अधिकृत दाहालले बताए । ‘आएका पर्यटकको व्यवस्थापनमा होटेल व्यवसायीको कमजोरी देखियो,’ उनले भने, ‘अनुगमन नहुँदा होटेलहरु व्यवस्थित बन्न सकेका छैनन् ।’

पर्यटक बढेपछि रारा विमानस्थलमा हवाइ चाप बढेको छ । नेपालगन्जबाट तारा, समिट र सीता एयरले दैनिक ५ देखि ८ वटा उडान भरिरहेको विमानस्थल कार्यालयले जनाएको छ । पर्यटक बढेपछि उडान भर्न भ्याइनभ्याइ भएको तारा एयरलाइन्सका स्टेशन इन्चार्ज लक्ष्मी शाहीले बताए । उनका अनुसार अधिकांश पर्यटक काठमाडौदेखि दोहोरो टिकट ल्याएर फर्किने गरेका छन् ।

रारामा पर्यटक बढेपछि होटल र घोडा व्यवसायी तथा डुंगा चालकलाई समेत भ्याइनभ्याइ हुन थालेको छ । घोडामार्फत पर्यटकलाई मुर्मा, झयारी, पिना, सिगाडी, माथितुमलगायत गाउँमा घुमाउने गरिएको स्थानीय भक्त रोकायाले बताए । ‘पर्यटक बढेपछि आम्दानी पनि बढिरहेको छ,’ उनले भने, ‘बिहानैदेखि साँझ अबेरसम्म पर्यटकलाई घुमाउन थालेका छौं ।’ उनले पर्यटकलाई घोडामा विभिन्न गाउँमा घुमाएवापत दैनिक ५ हजार रुपैयाँसम्म कमाउन थालेको बताए ।

व्यवसायीका अनुसार रारा घुम्‍न आएका अधिकांश पर्यटक मुर्माटप जाने गरेका छन् । राराबाट घोडा चढेर पर्यटकहरु मुर्माटप पुग्ने गरेको रोकायाले बताए । ‘मुर्माबाट राराको पुरै भाग देख्न सकिन्छ,’ उनले भने, ‘पर्यटक दिनभरि नै मुर्मा बस्छन्, बासको समस्या हुँदा फेरि रारामै झर्नुपर्ने समस्या छ ।’

प्रकाशित : चैत्र ९, २०७७ २१:३८
प्रतिक्रिया
पठाउनुहोस्

शंकास्पद वस्तु पड्किँदा महिला घाइते

ओमप्रकाश ठाकुर

सर्लाही — सर्लाहीको रामनगरस्थित वाग्मती नदीको बगरमा बेवारिसे अवस्थामा छाडिएको शंकास्पद वस्तु पड्किँदा सोमबार साँझ घाँस काट्न गएकी एक महिला गम्भिर घाइते भएकी छन् । 

रौतहटको माधवनारायण नगरपालिका–८ पिपरा रजवाडाकी ३५ वर्षीया सुनिता देवी सोमबार साँझ घाँस काट्न वाग्मती नदी वारी आएकी थिइन् । नदीको बगरमा घाँस काट्ने क्रममा सुनिताको हातमा श‌ंकास्पद वस्तु परेको थियो । उक्त वस्तु हात लाग्नासाथ पड्केको स्थानीयले बताएका छन् ।

गम्भिर घाइते भएकी सुनिताको रौतहटको गौरस्थित जिल्ला अस्पतालमा उपचार भइरहेको छ । उनको हातमा गम्भिर चोट लागेको अस्पतालले जनाएको छ ।

यता घटना भएको स्थान पत्ता लगाउन जिल्ला प्रहरी कार्यालय सर्लाहीका प्रहरी उपरीक्षक सन्तोष सिंह राठौर र इलाका प्रहरी कार्यालय बरहथवाका प्रहरी नायब उपरीक्षक उद्धवसिंह भाटको नेतृत्वमा प्रहरी परिचालन गरिएको छ । तर, अहिलेसम्म घटना भएको स्थानमा विस्फोट भएको वस्तु फेला नपरेको प्रहरी प्रवक्ता प्रहरी नायब उपरीक्षक मदन कुँवरले जानकारी दिए ।

उनले एक महिला घाइते भएको खबर रौतहट प्रहरीबाट आएपनि वास्तविकता के भएको हो भन्ने बारेमा यकिन हुन नसकेको जानकारी दिए ।

प्रकाशित : चैत्र ९, २०७७ २१:२७
पूरा पढ्नुहोस्
प्रतिक्रिया
पठाउनुहोस्
×