सवारी दुर्घटनामा कांग्रेस नेता मल्लको निधन- कर्णाली - कान्तिपुर समाचार

सवारी दुर्घटनामा कांग्रेस नेता मल्लको निधन

राजबहादुर शाही

मुगु — सवारी दुर्घटनामा सोरु गाउँपालिकाका कांग्रेसका नेता जयकर्ण मल्लको निधन भएको छ ।

बुधबार राति ९ बजेतिर बाँके कोहोलरस्थित पिपलचोकमा जेब्राक्रसिङबाट सडक पार गर्ने क्रममा भे १ क ११०० नम्बरको ट्रकले ठक्कर दिँदा ३७ वर्षीय मल्लको घटनास्थलमै निधन भएको कांग्रेस जिल्ला कार्यसमितिका पार्टी सभापति खड्गबहादुर शाहीले बताए ।

सोरु गाउँपालिका–११ धैनकोट गाउँ निवासी मल्ल एक जना बिरामी गाउँलेको उपचार गर्न नेपालगञ्ज झरेका बेला ट्रक दुर्घटनामा मृत्यु भएको शाहीले जनाए । चालक र ट्रक प्रहरीले नियन्त्रणमा लिएको उनले बताए ।

नेपाली कांग्रेस मुगु जिल्ला कार्यसमितिले एक वर्षअघि मल्ललाई सोरु गाउँपालिकाको सभापति चयन गरेको थियो ।

बिहीबार बिहान नेपाली कांग्रेस जिल्ला कार्य समितिको बैठकले ट्रक चालकलाई कडा कानुनी कारबाहीसहित क्षतिपूर्ति माग गर्ने निर्णय गरेको छ । १३ दिनसम्म पार्टी कार्यालयको झन्डा झुकाइने कांग्रेसले जनाएको छ ।

प्रकाशित : फाल्गुन २७, २०७७ ११:३८
प्रतिक्रिया
पठाउनुहोस्

दुई किलो अफिमसहित दुई भारतीय महिला पक्राउ

पर्वत पोर्तेल

काँकडभिट्टा — लागूऔषध नियन्त्रण ब्युरोको प्रहरी टोलीले बुधबार करिब दुई किलो अफिमसहित दुई जना भारतीय महिलालाई पक्राउ गरेको छ।

झापा, मेचीनगर–६ स्थित न्यून विशाल होटलमा बसेका मणिपुर कांगलातुम्बीकी ३० वर्षीया लक्ष्मी क्षेत्री र पश्चिम बंगाल पंचखेलगुडीकी–३८ की गायत्रीदेवी क्षेत्रीलाई प्रहरी टोलीले अफिमसहित पक्राउ गरेको हो ।

बरामद सामानको मूल्य करिब २ लाख भारु हुन आउने जनाइएको छ । अभियुक्तलाई इलाका प्रहरी कार्यालय काँकडभिट्टाको हिरासतमा राखेर आवश्यक अनुसन्धान सुरु गरिएको छ ।

प्रकाशित : फाल्गुन २७, २०७७ १०:२१
पूरा पढ्नुहोस्
प्रतिक्रिया
पठाउनुहोस्
x
×