कर्णाली प्रदेश लोकसेवा आयोगको अध्यक्षमा उपाध्याय- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

कर्णाली प्रदेश लोकसेवा आयोगको अध्यक्षमा उपाध्याय

कृष्णप्रसाद गौतम

सुर्खेत — कर्णाली प्रदेश लोकसेवा आयोगको अध्यक्षमा रामप्रसाद उपाध्याय नियु्क्त भएका छन् । उनीसहित आयोगमा नियुक्त सदस्यहरु वसन्तीकुमारी शाही र भक्तबहादुर शाहीलाई प्रदेश प्रमुख गोविन्द्रप्रसाद कलौनीले बिहीबार पद तथा गोपनियताको शपथ खुवाएका छन् ।

आयोगको अध्यक्षमा नियुक्त उपाध्याय साविक मध्यपश्चिमाञ्चल क्षेत्रीय शिक्षा निर्देशक (सहसचिवस्तरका अवकाशप्राप्त कर्मचारी) हुन् । आयोग गठनका लागि मुख्यमन्त्रीको अध्यक्षमा गठित सिफारिस समितिले फागुन २ गते ३ जनाको नाम सिफारिस गरेको थियो । सिफारिस समितिमा सभामुख राजबहादुर शाही र प्रमुख विपक्षी दलका नेता जीवनबहादुर शाही सदस्य थिए ।

कर्णाली प्रदेशसभाले प्रदेश लोक सेवा आयोग ऐन–२०७५ लाई पहिलो संशोधन गर्न बनेको विधेयक–२०७६ गत फागुन २ गते पारित गरेको थियो । आयोगमा नियुक्त तीनैजनालाई बिहीबारै मुख्यमन्त्री तथा मन्त्रिपरिषद्को कार्यालयमा अस्थायी रुपमा पदवहाली गराइएको कार्यालयका प्रवक्ता केशवप्रसाद उपाध्यायले बताए । उनका अनुसार आयोगले प्रदेश निजामती सेवा, प्रहरी सेवा, प्रदेशसभा सेवा, अन्य प्रदेश सरकारी सेवा र प्रदेश संगठित संस्थामा कर्मचारी नियुक्तिको काम गर्नेछ ।


प्रकाशित : फाल्गुन ६, २०७७ १८:४१
प्रतिक्रिया
पठाउनुहोस्

मिनी ट्रकको ठक्करबाट १ को मृत्यु 

कान्तिपुर संवाददाता

भक्तपुर — मिनी ट्रकको ठक्करबाट एक जनाको मृत्यु भएको छ । बुधबार साँझ चाँगुनारायण–२ झौखेलबाट ब्यासी तर्फ आउँदै गरेको बा २ क ९०९९ नम्बरको मिनी ट्रकमा सवार ब्यासीका ४१ वर्षीय सूर्यमान सुवालको सोही मिनी ट्रकको ठक्करबाट मृत्यु भएको प्रहरीले जनाएको छ । 

मिनी ट्रकबाट ओर्लने क्रममा लडेर चक्कामा परी घाइते भएका सुवालको उपचारको क्रममा बुधबार राति केएमसी अस्पताल सिनामङ्गलमा मृत्यु भएको महानगरीय प्रहरी परिसर भक्तपुरका प्रवक्ता डीएसपी दिपक गिरीले बताए । मिनी ट्रकको अगाडिको बायाँ साईटको चक्काको ठक्करले सख्त घाइते सुवाललाई भक्तपुर अस्पतालमा प्राथमिक उपचार गरी थप उपचारका लागि धुलिखेल अस्पताल पुर्‍याएको र त्यहाँ उपचार हुन नसकेर केएमसी अस्पताल सिनामङ्गल पुर्‍याइएको थियो ।

प्रहरीले सुवाललाई ठक्कर दिने मिनी ट्रक चालक रामेछाप दोरम्बा घरभई झौखेल बस्ने ४५ वर्षीय सन्तवीर तामाङलाई नियन्त्रणमा लिएको छ ।

प्रकाशित : फाल्गुन ६, २०७७ १८:३१
पूरा पढ्नुहोस्
प्रतिक्रिया
पठाउनुहोस्
×