अमेरिका पठाउँछु भन्दै ठगी गर्ने पक्राउ- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

अमेरिका पठाउँछु भन्दै ठगी गर्ने पक्राउ

ज्योति कटुवाल

दैलेख — युवाहरुलाई अमेरिका पठाउँछु भन्दै ठगी गर्ने इटहरी उपमहानगरपालिका–४, सुनसरीकी २४ वर्षीया विद्या शर्मा (विद्या सरकार) लाई प्रहरीले पक्राउ गरेको छ । जिल्ला प्रहरी कार्यालयको समन्वयमा महानगरीय प्रहरी परिसर, टेकुले उनलाई पक्राउ गरी दैलेख पुर्‍याएको हो । 


शर्माले दैलेखका युवाबाट झण्डै दुई करोड रुपैयाँ ठगेको प्रहरीको अनुमान छ । उनलाई दैलेख प्रहरीले बिहीबार सार्वजनिक गरेको छ । समाजसेवाको बहानामा दैलेख पुगेकी शर्माले अन्तर्राष्ट्रिय रेडक्रस सोसाइटी, सिंगापुरको नेपालस्थित प्रमुख कार्यकारी अधिकृत (सीइओ) भन्दै असुली धन्दा चलाएकी थिइन् ।

कोरोना महामारीको नियन्त्रणका लागि भन्दै उनी स्वास्थ्य सामग्री, त्रिपाल, सेनिटाइजर, मास्क, पन्जा र खाद्यान्न वितरण गर्न बैशाखमा दैलेख पुगेकी थिइन् । उनी एक जिल्लाबाट ठगी गरेको रकम लिएर अर्को जिल्लामा राहत वितरणलगायत काममा संलग्न हुने गरेको प्रहरीको प्रारम्भिक अनुसन्धानबाट खुलेको छ । प्रहरीका अनुसार उनले विद्या शर्मा र विद्या सरकारका नामबाट दुई वटा नागरिकता बनाएकी छिन् ।

शर्माले नारायण नगरपालिका–१ का २८ वर्षीय विवेक थापालाई अमेरिका पठाउने भन्दै वैशाखदेखि असोज १८ गतेसम्म ५२ लाख १४ हजार रुपैयाँ पठाउन लगाएकी थिइन् । उनका साथी मनोज थापाले पनि बैंकमार्फत शर्मालाई बैंकमार्फत ९० हजार रुपैयाँ पठाएका थिए । ठगिएको भन्दै उनीहरुले प्रहरीमा उजुरी दिएपछि शर्माको खोजी भएको थियो । शर्माले युवाहरुलाई विभिन्न सामग्री उधारोमा किन्न लगाई राहत वितरण गरेको प्रहरीले जनाएको छ ।

शर्माले दैलेखका ८/१० जना युवाबाट रकम उठाएको जिल्ला प्रहरी कार्यालयले जनाएको छ । अहिलेसम्म दुई जनाले शर्माविरुद्ध उजुरी दिएको प्रहरी निरीक्षक इन्द्रजित सुनारले बताए ।

‘धेरै जना ठगिएका छन्,’ उनले भने, ‘तर रकम दिएको कागज र अन्य प्रमाण नहुँदा उजुरी नपरेको हुनसक्छ ।’ उनका अनुसार जिल्ला अदालतले पुस ९ गते उनलाई पक्राउ गर्न अनुमति दिएको थियो । तर शर्मा काठमाडौका विभिन्न ठाउँमा लुक्दै बसेकाले महानगरीय प्रहरी परिसरसँग समन्वय गरिएको उनले बताए ।

प्रकाशित : पुस २४, २०७७ १५:२५
प्रतिक्रिया
पठाउनुहोस्

फेरि बन्द हुँदै तातोपानी नाका

आगामी माघ ७ गतेदेखि २० दिन बन्द हुने
अनिश तिवारी

सिन्धुपाल्चोक — भोटेकोशी गाउँपालिका–२ तातोपानी क्षेत्रबाट चीन जोड्ने उत्तरी तातोपानी नाका फेरि बन्द हुने भएको छ । भोटेकोसी नदीले क्षतिग्रस्त नेपाल चीन नाका मितेरी पुलको जगको संरचना मर्मतसंम्भार गर्न एकतर्फी आयातको रुपमा चल्दै आएको तातोपानी नाका आगामी (जनवरी २०) माघ ७ गतेदेखि २० दिनसम्म बन्द हुन लागेको हो ।

बर्खे बाढी र तिब्बतको न्यालमक्षेत्रमा रहेका केही तालबाट पोखिएर आएको पानी मिसिएको भोटेकोशीले मितेरी पुलको जग र अन्य संरचनामा केही क्षति पुर्‍याएको थियो । चीनको खासास्थित ‘तिब्बती डिर्पाटमेन्ट अफ कमर्स फरेन ट्रेड’का अनुसार बाढीले मितेरी पुलको ध्वस्त जगलाई २० दिनभित्र बलियो बनाएपछि मात्रै नाकालाई खुला गरिनेछ । त्यही सन्देशअनुरुप जाङ्मु पोर्ट म्यानेजमेन्ट कमिटीले नेपाल र चीनका व्यापारिक संघसंस्था र कम्पनीलाई सूचित गराइसकेको उल्लेख गरे । पुल मर्मतपछि तिब्बती समुदायको ल्होसार पर्व आउने भएकाले २० दिनभन्दा बढी बन्द हुनेसक्ने चिनियाँ पक्षबाट अनुमान गरिएको छ ।

भूकम्प र भोटेकोशी बाढीले ध्वस्त बनाएको मितेरी पुललाई चिनियाँ कम्पनी ताइन सुन रोड एण्ड ब्रिज कम्पनीले वर्षदिन लगाएर ठड्याएको थियो । मितेरी पुलबाहेक बर्खाले क्षतविक्षत कोदारी राजमार्ग (२६ किलोमिटर) मा मापदण्डविपरित अत्यधिक तौलमा ४० फिटको चिनियाँ कन्टेनरबाट सामाग्री आयात गरिएको व्यवसायी र कन्टेनरले आरोप लगाउँदै आएका छन् ।

नाका पुन: बन्द गरिने बारे आधिकारिक चिनियाँ पक्षबाट प्रशासनिक रुपमा पत्र नआएपनि तातोपानी नाका बन्द हुने बारेमा अन्य अनौपचारिक खबर पाइएको प्रमुख जिल्ला अधिकारी उमेशकुमार ढकालले जानकारी दिए । ‘यसबारेमा प्रशासनिक, सुरक्षाकर्मी, प्रतिनिधिबीच छलफल बाँकी छन्, तैपनि व्यापारिक रुपमा सूचना आएको केही खबर पाएका छौं,’उनले भने । तातोपानी सुख्खा बन्दरगाह तथा भन्सार कार्यालयका प्रमुख भन्सार अधिकृत लालबहादुर खत्रीले पुल मर्मतसंम्भारको लागि भनेर चीनले नाकालाई आगामी जनवरी २० देखि २० दिनसम्म नाकालाई बन्द गराइने मौखिक सूचना पाएको बताए । ‘खासा र न्यालममा अलमलिएका सामान नेपाल भित्राइसकेपछि पुल मर्मत थाल्ने चीन पक्षले योजना बनाएको छ, यसबारे आधिकारिक पत्र भने पठाइसकेको छैन्,’उनले भने ।

प्रकाशित : पुस २४, २०७७ १५:२४
पूरा पढ्नुहोस्
प्रतिक्रिया
पठाउनुहोस्
×