जबर्जस्ती करणी गरेको आरोपमा पक्राउ
लमजुङ — एक जना सुस्त मनस्थितिका महिलालाई जबर्जस्ती करणी गरेको आरोपमा लमजुङ प्रहरीले एक जनालाई पक्राउ गरेको छ ।
बेंसीसहर नगरपालिका १० का ४१ वर्षीय हरिबहादुर गुरुङलाई पक्राउ गरिएको प्रहरीले जनाएको छ । डीएसपी कृष्णबहादुर कार्कीका अनुसार राइनास नगरपालिकाका फरक क्षमता (शारीरिक र मानसिक अस्वस्थ)की युवतीलाई जaर्जस्ती करणी गरेको आरोपमा युवकलाई सोमबार राति पक्राउ गरी जिल्ला प्रहरी कार्यालय ल्याएको छ ।
राइनास क्षेत्रमा सामान्य ठेक्कापट्टा गर्दै आएका गुरुङले ती युवतीलाई बस्ती क्षेत्रबाट जंगलतर्फ लगेर जबर्जस्ती करणी गरेको आरोप लागेको छ । ‘हामीलाई राति साढे ७ बजेतिर खबर आयो । घटनास्थलतर्फ गएर सुरुमा पीडितलाई उद्धार गरी ल्यायौं । त्यसपछि आरोपितलाई खोजी गरेर पक्राउ गरी रातारात ल्यायौं,’ डीएसपी कार्कीले भने । उनका अनुसार दुवै जनाको स्वास्थ्य परीक्षण गरिएको छ ।
जिल्ला प्रहरी कार्यालयका सूचना अधिकारी इन्स्पेक्टर जगदिश रेग्मीका अनुसार ती पुरुषविरुद्ध जबर्जस्ती करणी मुद्दा दर्ता गरेर थप अनुसन्धान थालिएको छ । उनले जिल्ला अदातलतबाट म्याद थप गराएर अनुसन्धान थालिएको बताए ।
प्रकाशित : मंसिर २१, २०७८ १४:११
