गठबन्धन धेरै टिक्दैन, सफल हुन दिँदैनौं : पोखरेल- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गठबन्धन धेरै टिक्दैन, सफल हुन दिँदैनौं : पोखरेल

कान्तिपुर संवाददाता

पोखरा — एमाले महासचिव ईश्वर पोखरेलले अहिलेको सत्ता गठबन्धन एमालेले गरेका राम्रा काम रोक्ने उद्देश्यले बनेको बताएका छन् । यस्तो गठबन्धन धेरै नटिक्ने र छिट्टै चकनाचुर हुने उनले दाबी गरे । 

‘एमालेले गरेका राम्रा कामविरुद्ध गठबन्धन बनेको हो,’ चाडपर्वका अवसरमा एमाले कास्कीद्वारा बुधबार आयोजित शुभकामना आदानप्रदान र चियापान कार्यक्रममा उनले भने, ‘तर गठबन्धनलाई सफल हुन दिनेछैनौं ।’

अहिले अवसरवादको खेती गर्ने शक्ति एकजुट भएको र एमालेले अघि सारेको राजनीतिक स्थायित्व, आर्थिक विकास, समृद्धि, राष्ट्रिय स्वाभिमान र स्वतन्त्रताजस्ता राम्रा काम रोक्ने उद्देश्यले गठबन्धन बनेको पोखरेलले आरोप लगाए ।

उनले आफ्नै पार्टीको सरकार हटाउनेहरूले अक्षम्य अपराध गरेको बताए । ‘आफ्नै पार्टीको प्रधानमन्त्रीलाई हटाउने, अदालतमा मुद्दा हाल्ने, अर्को पार्टीको नेतालाई प्रधानमन्त्री बनाउन सहयोग गर्नेहरूको भलो हुँदैन,’ उनले भने । त्यस्ता व्यक्तिलाई पार्टीको आगामी महाधिवेशनले किनारा लगाइदिने पोखरेलको भनाइ छ ।

त्यस्तै एमाले सचिव एवं गण्डकी प्रदेशका पूर्वमुख्यमन्त्री पृथ्वीसुब्बा गुरुङले पार्टीमा अझै पनि भावना र मनोविज्ञानका हिसाबले विभाजन रहेकाले त्यसलाई एकताबद्ध गराउनुपर्ने बताए ।


प्रकाशित : कार्तिक ३, २०७८ १०:३१
प्रतिक्रिया
पठाउनुहोस्

एमसीसी नेपालको हितमा छ, विवाद गर्नु आवश्यक छैन : प्रधानमन्त्री

कान्तिपुर संवाददाता

काठमाडौँ — प्रधानमन्त्री शेरबहादुर देउवाले एमसीसी नेपालको हितमा भएको बताएका छन् । एमसीसी सम्झौता छिटो पारित गनुपर्ने र यसमा कुनै विवाद गर्नु आवश्यक नभएको उनको भनाइ छ । 

गोरखापत्र दैनिकसँगको अन्तर्वार्तामा प्रधानमन्त्री देउवाले एमसीसी ऋण नभई अनुदान भएको स्पष्ट पारेका छन् । उनले अन्तर्वार्तामा भनेका छन्, ‘एमसीसीको विषयमा जुन प्रचार गरिएको छ, त्यो कुरै होइन । एमसीसी नेपाललाई दिइएको त्यो ग्रान्ट हो । ब्याजमा होइन यो । ऋण होइन अनुदान हो ।’ एमसीसीको नाममा नेपालमा रहेका केही तत्वले बखेडा गर्न खोजेको उल्लेख गर्दै प्रधानमन्त्री देउवाले ‘एमसीसी विशुद्ध नेपालको हितमा’ भएको बताएका छन् ।

एमसीसीमा केही सुधार गर्नुपर्ने पक्ष भए पनि अमेरिका तयार रहेको पनि उनले उल्लेख गरेका छन् । ‘एमसीसीमा करेक्सन गर्न अमेरिका तयार छु भनेको छ । अमेरिकाले नेपालको कानुनभन्दा माथिको होइन भनेर भनिसकेको छ,’ प्रधानमन्त्री देउवाले भनेका छन् ।

त्यस्तै प्रधानमन्त्री देउवाले चैतसम्ममा लक्षित जनसंख्यालाई कोरोनाविरुद्ध खोप लगाइसकिने पनि बताएका छन् ।

प्रकाशित : कार्तिक ३, २०७८ १०:२६
पूरा पढ्नुहोस्
प्रतिक्रिया
पठाउनुहोस्
×