पहिरोले विद्यालय पुरेपछि विद्यार्थी बिचल्लीमा- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पहिरोले विद्यालय पुरेपछि विद्यार्थी बिचल्लीमा

विद्यालय सहयोगीको अस्थायी घरमा राखेर पठनपाठन, धर्मशाला पनि विकल्पमा
अगन्धर तिवारी

पर्वत — करिब ५ महिना बन्द भएका विद्यालय खुल्ने खबरले मोदी–६ दोबिल्लास्थित गाडताराकी आयुसा अधिकारी उत्साहित थिइन् । कक्षा १ मा अध्ययनरत उनी उत्साहित हुनुका केही कारण पनि थिए, हरेक दिन फरक–फरक खाजा खान पाइने, साथीसंग खेल्न पाइने, अनि साथी जस्ता शिक्षिका पनि भेट्न पाइने ।

एकातिर पहिरोले विद्यालय पुरियो भने अर्कोतर्फ विद्यालय जाने बाटो भत्कियो । भदौ तेस्रो साता खसेको पहिरोले तिलाहारको दोबिल्लास्थीत हरि आधारभूत विद्यालय माथिबाट पहिरो खसेपछि आयुसासहितका विद्यार्थी विद्यालय जान पाएका छैनन् । घरदेखि विद्यालयसम्म पुग्ने बाटो भत्किएपछि समस्या परेको हो । ‘दुई सातासम्म विद्यालय पठाउनै सकिएन,’ विद्यालय व्यवस्थापन समितिका अध्यक्ष लालबहादुर केसीले भने, ‘बाटो बन्ने छाँटकाँट देखिएन । अनि घुमाउरो बाटो हिंडाएर तिलाहारको जनजागृती माविमा पठाएका छौं ।’ नवजागृती पुग्न गाडताराबाट करिब डेढ घण्टा लाग्छ ।

त्यसो त, विद्यालय आसपासका अरू बालबालिकाले अध्ययन गर्न विद्यालयका कक्षाकोठा पनि छैनन् । १७ भदौको राति खसेको पहिरोले विद्यालयको ३ कोठे भवन सबै पुरेको छ । बालकक्षादेखि तीनसम्म पढाइ हुने विद्यालयमा कोठा अभावले बहुकक्षा शिक्षण प्रविधि अपनाइएको थियो । भएको साँघुरो भवन पनि पहिरोले पुरिएपछि विद्यालयका संरचनाको कुनै अवशेष बाँकी छैन । ‘३ दिनपछि झ्यालको रड काटेर कम्प्युटरसम्म निकालियो,’ प्रधानाध्यापक सीता पौडेलले भनिन्, ‘अरू केही सामान बाँकी छैनन् । हिलोमा पुरिए ।’ बाहिरी झ्यालनेर टेबुलमाथि भएकाले कम्प्युटर जोगिएको भए पनि चलाउन सकिने अवस्थामा भए/नभएको परीक्षण नगरेको उनले बताइन् ।

मोदी खोलाको किनारमा भएको विद्यालय पुरिएपछि अहिले विद्यालय सहयोगी रचना केसीको अस्थायी घरमा राखेर पठनपाठन गराइएको छ । तत्काल अरू विकल्प नभएपछि एककोठे अस्थायी घरमा सबै कक्षाका विद्यार्थी राखेर पढाउनु परेको हो । विद्यालय भवन तत्काल नयाँ बन्ने अवस्था नरहेपछि स्थानीय शिव मन्दिर परिसरमा रहेको धर्मशालामा राखेर पढाउने तयारी अभिभावकले गरेका छन् । धर्मशाला पुरानो गाविस भवन हो ।

पञ्चायतकालमा निर्माण भएको उक्त भवन केही वर्षअघि स्थानीयले मर्मत गरेर धर्मशाला बनाएका थिए । धर्मशालाको छानो, झ्यालढोका मर्मत तथा पार्टेसन गरेर अस्थायी कक्षाकोठा बनाउने गरी तयारी थालिएको हो । धर्मशाला मर्मत गर्न ढुंगा बोक्न सुरु भएको निर्माण समितिका अध्यक्ष चित्रसागर श्रेष्ठले बताए । ‘सम्भवतः दसैंतिहारको बिदासम्ममा मर्मत सकेर विद्यालय सार्न सकिन्छ कि,’ श्रेष्ठले भने, ‘त्यसका लागि पालिकासँग समन्वय भएको छ ।’ गाउँपालिकाका शिक्षा अधिकृत झकप्रसाद गौतमले पुरानो विद्यालय भवनको कुनै संरचना काम नलाग्ने भएकाले विकल्प खोज्न लगाइएको बताए । ‘बालबालिकाको पढाइ रोक्न भएन भनेर विकल्प खोजिएको हो,’ उनले भने, ‘सक्दो छिटो धर्मशाला मर्मत गरेर कक्षा सञ्चालन गर्न भनेका छौं ।’ धर्मशाला मर्मतका लागि ५ लाख १४ हजार रुपैयाँको स्टमेट गरी बजेट निकासा गर्न गाउँपालिका सहमत भएको गौतमले बताए ।

प्रकाशित : आश्विन १९, २०७८ १२:१७
प्रतिक्रिया
पठाउनुहोस्

विनोदविक्रम केसीको ‘भेन्टिलेटरमा आमा’ बजारमा

कान्तिपुर संवाददाता

काठमाडौँ — कवि तथा निबन्धकार विनोदविक्रम केसीको पहिलो निबन्ध सङ्ग्रह ‘भेन्टिलेटरमा आमा’ सार्वजनिक भएको छ । ‘भेन्टिलेटरमा आमा’ सोमबारदेखि बजारमा पुगेको प्रकाशक संस्था बेला पब्लिकेसन्सले जनाएको छ ।

‘भेन्टिलेटरमा आमा’मा २९ वटा निबन्धहरु सङ्गृहित छन् । ‘खासमा यो मेरो सम्झनासङ्ग्रह पनि हो,’ निबन्धकार केसीले भने, ‘केही मान्छे, केही घटना अनि केही सन्दर्भलाई स्मृतिको तानमा हालेर ‘केही’ बुन्न खोजेको छु । केही दिवङ्गत प्रिय मान्छेका बारेमा केही पृष्ठ अर्पण गरेको छु, बाल्यकाल र किशोरवयमा सयर गरेको छु, भोगाइ तथा जियाइसँग जोडिएका केही मुद्दा र सवालमा टिप्पणी गरेको छु ।’ केसीले निबन्धमा आफूले बाँचेको समय र समाजका मिठास र कटुता, जलन र शीतलता, प्रेम र क्रुरतालाई व्यक्त गरेको बताएका छन् ।

लामो समयदेखि व्यंग्य, संस्मरण, निबन्धमा कलम चलाउँदै आएका केसी फुटकर लेखनबाटै निबन्ध विधामा पाठकहरुद्वारा रुचाइएका लेखक हुन् । उनी निबन्धसँगै कविता, कथा, अनुवाद, सम्पादनलगायत सिर्जनकर्ममा सक्रिय छन् । केसीको यसअघि ‘भोकको क्षेत्रफल’ (२०६९) कविता सङ्ग्रह प्रकाशित छ ।

बेलाको छैठौं पुस्तकका रुपमा केसीको निबन्ध प्रकाशित भएको पब्लिकेसन्सकी अध्यक्ष वन्दना ढकालले बताइन् ।

प्रकाशित : आश्विन १९, २०७८ १२:१७
पूरा पढ्नुहोस्
प्रतिक्रिया
पठाउनुहोस्
×