शिक्षक आन्दोलित

नवलपुर — राज्यले शिक्षकलाई विभेद गरेको भन्दै नेपाल स्थायी शिक्षक हकहित मञ्च आन्दोलित भएको छ । सरकारले चालु आर्थिक वर्षको बजेटमार्फत निजामती कर्मचारीलाई वार्षिक भ्रमण खर्चबापत १० दिनको पर्यटन काज, तलब र अन्य सुविधा दिने घोषणा गरेको छ ।

तर स्थायी शिक्षकलाई यो सुविधाबाट वञ्चित गरिएको भन्दै देशभरका स्थायी शिक्षक आन्दोलित भएका हुन् । राज्यले शिक्षकलाई र शिक्षण पेसालाई नै अपमान गरेर विभेदकारी नीति लिएको भन्दै नवलपरासीलगायत देशैभरका शिक्षकले बिहीबार हातमा कालोपट्टी बाँधेर विरोध जनाएको मञ्च नवलपरासीका संयोजक कुसुम न्यौपानेले बताए ।

सरकारले तत्कालै स्थायी शिक्षकलाई पनि निजामती कर्मचारीसरह सुविधा उपलब्ध नगराएमा थप संघर्षमा उत्रिने मञ्चका केन्द्रीय संयोजक रमेशबाबु भट्टराईले चेतावनी दिए । ‘राज्यले शिक्षक र यो पेसालाई नै होच्याउने र अपमान गर्ने हेतुले यस्तो नियम ल्याएको महसुस गरेका छौं,’ उनले भने ।