पूर्वी नवलपरासीका ६ पालिकामा देउवा-कोइराला पक्ष विजयी, २ वटामा पौडेल पक्ष  - गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पूर्वी नवलपरासीका ६ पालिकामा देउवा-कोइराला पक्ष विजयी, २ वटामा पौडेल पक्ष  

नारायण शर्मा

पूर्वीनवलपरासी — पूर्वी नवलपरासीमा स्थानीय तहको परिणाममा कांग्रेस सभापति शेरबहादुर देउवा र महामन्त्री शशांक कोइराला पक्ष बलियो देखिएको छ । जिल्लाका ८ वटा पालिकामध्ये ६ वटामा देउवा-कोइराला प्यानलले बहुमत पाएको छ भने २ वटा पालिकामा वरिष्ठ नेता रामचन्द्र पौडेल पक्षले जितेको छ । 

कांग्रेस निर्वाचनको बुधबार सार्वजनिक मत परिणामअनुसार गैंडाकोट नगरपालिका, मध्यविन्दु नगरपालिका, विनयी त्रिवेणी, बौदीकाली, बुलिंटार र हुप्सेकोट गाउँपालिकामा संयुक्त प्यानलका उम्मेदवारले जितेका छन् । कावासोती र देवचुली नगरपालिकामा पौडेल पक्षधरले विजय प्राप्त गरेका निर्वाचन समितिले जनाएको छ । गैंडाकोट सभापतिमा बद्री सापकोटा, बुलिंटारमा ओम श्रेष्ठ, बिनयी त्रिवेणीमा अजित थापा, मध्यबिन्दुमा दोमन भण्डारी, हुप्सेकोटमा बलबहादुर राना बिजयी भएका छन् । उनीहरु देउवा-शशांक खेमाबाट संयुक्त प्यानल बनाएर उम्मेदवारी दिएका थिए ।

सदरमुकाम रहेको कावासोती नगरपालिका र देवचुली नगरपालिकामा पौडेल खेमाका उम्मेदवार बिजयी बने । कावासोतीमा शालिकराम ढकाल र देवचुली नगरपालिकामा डिल्लीराम कडरियाको प्यानल बहुमतसहित विजयी भएको छ । पहाडी दुर्गम बौदीकाली गाउँपालिकाको कांग्रेस सभापतिमा पत्रकार केबी राना बिजयी भएका छन् । नवनिर्वाचित रानाले आफू कुनै खेमाको नभएको दाबी गरिरहेका छन् ।

प्रकाशित : आश्विन १३, २०७८ १५:४६
प्रतिक्रिया
पठाउनुहोस्

मृत्यु भइसकेका व्यक्तिको नामबाट भत्ता लिएको आरोपमा पाँच सचिवविरूद्ध भ्रष्टाचार मुद्दा

कान्तिपुर संवाददाता

काठमाडौँ — अख्तियार दुरूपयोग अनुसन्धान अयाोगले उदयपुर जिल्लाको साविक रामपुर ठोक्सिला गाविसका तत्कालीन पाँच जना कर्मचारीविरूद्ध भ्रष्टाचार मुद्दा दर्ता गरेको छ ।

प्रवक्ता नारायणप्रसाद रिसालले रामपुर ठोक्सिला गाविसका कर्मचारीहरूले ८–१० वर्ष पहिल्यै मृत्यु भइसकेका व्यक्तिको नामबाट सामाजिक सुरक्षा भत्ता लिएको आरोपमा पाँच जना कर्मचारीविरुद्ध मुद्दा चलाइएको बताए ।

अख्तियारले बुधबार विशेष अदालतमा केशवप्रसाद आचार्य, लोकेन्द्र कार्की, विशाल सुन्दास, माधवप्रसाद खतिवडा र पुष्पराज सिग्देलविरुद्ध मुद्दा चलाएको हो । उक्त गाउँ विकास समितिका कर्मचारीहरूले आर्थिक वर्ष २०६३/०६४ देखि २०७१/७२ सम्म सामाजिक सुरक्षा भत्ताबापत १६ लाख ४० हजार ५०० रूपैयाँ दुरूपयोग गरेको अख्तियारको अभियोग रहेको छ । उक्त अवधिमा सामाजिक सुरक्षा भत्ता प्राप्त गर्ने व्यक्तिहरूको मृत्यु भएपश्चात घटना दर्ता गरेर लगत कट्टा गर्नुपर्नेमा त्यसो नगरी मृतकको नाममा भरपाई बनाएर आफैंले दुरूपयोग गरेका थिए ।

अख्तियारले उदयपुरको साविक रामपुर ठोक्सिला गाविसका तत्कालीन सचिव केशवप्रसाद आचार्य (हाल मालपोत कार्यालय उदयरपुरका नायब सुब्बा)विरुद्ध ९ लाख ९० हजार पाँच सय दुरूपयोग गरेको अभियोग लगाएको छ ।

त्यस्तै, तत्कालीन गाविस सचिव लोकेन्द्र कार्की (हाल रौतामाई गाउँपालिका–७ का वडा सचिव) विरद्ध ७८ हजार, तत्कालीन गाविस सचिव विशाल सुन्दास (हाल तथ्यांक कार्यालय उदपुरका खरिदार) विरुद्ध ८२ हजार दुरूपयोग गरेको अख्तियारको दाबी रहेको छ । त्यसैगरी तत्कालीन गाविस सचिव माधवप्रसाद खतिवडा (हाल रौतामाई गाउँपालिकाका अधिकृत छैटौं) विरुद्ध तीन लाख १४ हजार र हाल अवकाश पाइसकेका तत्कालीन गाविस सचिव पुष्पराज सिग्देलविरुद्ध एक लाख ७६ हजार रूपैयाँ दुरूपयोग गरेको भन्दै त्यति नै बिगो कायम गरेर अख्तियारले मुद्दा चलाएको छ ।

प्रकाशित : आश्विन १३, २०७८ १५:३८
पूरा पढ्नुहोस्
प्रतिक्रिया
पठाउनुहोस्
×