बागलुङमा डुबेर बालकसहित दुईको मृत्यु- गण्डकी - कान्तिपुर समाचार

बागलुङमा डुबेर बालकसहित दुईको मृत्यु

प्रकाश बराल

बागलुङ — जिल्लामा छुट्टाछुट्टै घटनामा बालकसहित दुई जनाको मृत्यु भएको छ । बागलुङ नगरपालिका १० भकुण्डेका २८ वर्षीय सागर थापा र ८ वर्षीय एलश बुढाथोकीको मृत्यु भएको प्रहरीले जनाएको छ ।

भकुण्डेका मानबहादुर बुढाथोकीका छोरा एलशको घरदेखि १ सय मिटरको दुरीमा पर्ने धौलेचौरमा आइतबार पोखरीमा डुबेका थिए । पोखरी नजिकै खेल्नेक्रममा ती बालक डुबेपछि उद्धार गरेर अभिभावकले तत्काल उपचारका लागि धौलागिरि अस्पताल ल्याएका थिए । अस्पताल पुर्‍याइएका बालकलाई चिकित्सकले मृत घोषणा गरेको थियो ।

थापाको भने शनिबार बेलुकी नै शव भेटिएको जिल्ला प्रहरीका सूचना अधिकारी इकवाल हवारीले जानकारी दिए । उनका अनुसार शुक्रबारदेखि हराएका थापाको खोजी गर्ने क्रममा पहिरे खोलाको बीच भागमा डुबेको अवस्थामा शव भेटिएको हो । उनको शव पोस्टमार्टमपछि परिवारलाई बुझाइएको छ । दुवै घटनाबारे प्रहरी निरीक्षक बिराट शर्माको नेतृत्व टोलीले अनुसन्धान गरिरहेको छ ।

प्रकाशित : भाद्र २०, २०७८ १५:४६
प्रतिक्रिया
पठाउनुहोस्

नख्खु कारागारमा कैदीबन्दीको नाराबाजी र प्रदर्शन, ८ चौकीदारलाई हटाउन माग

कारागारभित्र सुरक्षा तैनाथी बढाइयो
मातृका दाहाल

काठमाडौँ — ललितपुरको नख्खु कारागारमा कैदीबन्दीहरुले ८ जना चौकीदारलाई हटाउनुपर्ने माग गर्दै नाराबाजी र प्रदर्शन गरेका छन् । करिब पाँच दर्जन कैदीबन्दीहरुले कारगारको सीआरसी ब्लकमा चौकीदारहरुविरुद्ध आइतबार प्रदर्शन गरेपछि कारागारभित्र सुरक्षाकर्मीको उपस्थिति बढाइएको छ ।

चौकीदारलााई कारागारको आन्तरिक प्रशासन र कैदीबन्दी व्यवस्थापनको खटनपटन गर्ने जिम्मा दिइएको हुन्छ । रासनमा घोटाला गरेको, टेलिफोन सुविधा सहज नबनाएको, सरकारले दिने अन्य सुविधामा पनि आफ्नो मनोमानी गरेको भन्दै कैदीहरुले चौकीदारहरु विरुद्ध जेलर चिरञ्जीवी गिरीसमक्ष निवेदन दिएका छन् ।

प्रदर्शनमा सहभागीहरुले कारागारका नाइके शिव चौधरी, रिकेश अधिकारी, सविन केसी, शम्भू कार्की, अरुणकुमार महतो, विशाल विष्ट तथा सहनाइके देवेन्द्र तिमल्सिना र दीपक कर्णलाई कारागार स्थानान्तरणको मागसमेत राखेका छन् । विशाल विष्ट नख्खु कारागार मुख्य नाइके हुन् ।उनीहरु कर्तव्य ज्यान, लागूऔषध, मानवतस्करी, हातहतियार-खरखजाना लगायतका कसुरमा कारगारमा छन् ।

कारगार व्यवस्थापन विभागका महानिर्देशक जनकराज दाहालले चौकीदारहरुले हिनामिना गरेको पुष्टि भए तत्काल कारबाही हुने बताए ।

नख्खु कारागारमा करिब १४०० जना कैदीबन्दी रहेका छन् । ललितपुर प्रहरी प्रमुख एसएसपी किरण बज्राचार्यले कारागारभित्र नाराबाजी र प्रदर्शन भएको सूचना पाएपछि सुरक्षा तैनाथीलाई बढाइएको बताएकी छन् ।

प्रकाशित : भाद्र २०, २०७८ १५:२२
पूरा पढ्नुहोस्
प्रतिक्रिया
पठाउनुहोस्
×