बेथितिपछि खोप कार्यक्रम स्थगित- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बेथितिपछि खोप कार्यक्रम स्थगित

मापदण्डले तोकेभन्दा फरक मानिस आउन थालेपछि अस्तव्यस्त
प्रकाश बराल

बागलुङ — गतसाता सदरमुकामको कालिका कन्या माविमा शिक्षकका लागि कोरोनाविरुद्धको खोप लगाउन बोलाइयो । त्यतिबेला शिक्षकभन्दा व्यापारी, राजनीतिक दलका कार्यकर्ता र पहुँचवालाका परिवारका सदस्य बढी पुगे ।

एकअर्कामा पोल खोलाखोल गर्दा खोप केन्द्रमा होहल्ला बढ्यो । खोप कार्यक्रम नै स्थगित भयो । त्यसपछि अर्को दिन व्यापारीका लागि तोकिएको थियो । हल्ला, भीड तथा अस्तव्यस्त हुने देखिएपछि नगरपालिकाले खोप कार्यक्रम स्थगित गरायो ।

‘मापदण्डले तोकेभन्दा फरक मानिस आउन थालेपछि कार्यक्रम स्थगित गर्नुपरेको हो,’ बागलुङ नगर स्वास्थ्य शाखाप्रमुख रामप्रसाद खनालले भने, ‘मापदण्ड कडाइ भएपछि फेरि सञ्चालनमा आउँछ ।’ जोखिममा देखिएका व्यापारीलाई खोप लगाउने कार्यक्रममा छोराछोरीसमेत लिएर आउन थालेपछि रोक्नुपरेको उनले बताए । यति बेला जिल्लाका सबै पालिका तहमा खोप कार्यक्रम रोकिएको छ ।

खोप समन्वय समितिका अध्यक्ष रहेका प्रमुख जिल्ला अधिकारीलाई भेटेर खोप माग्नेहरू दैनिक पुग्छन् । उनीहरूले आफ्नो तर्कले जोखिममा परेको दाबी गरिहन्छन् । ‘अझै पनि १५ हजारबढी खोप लगाउन बाँकी छन् तर मापदण्ड मिचेर जान खोजियो भने समस्या आउँछ,’ प्रजिअ शिवकुमार कार्कीले भने, ‘यो अवस्था नआओस् भनेर खोप लगाउने कामै रोक्नुपरेको छ ।’ २ सय खोप लगाइदिएमा जिल्लाका होटल सञ्चालन गर्न सकिने भए पनि दिन नसकेको उनले बताए ।

होटल व्यवसायीले जोखिममा काम गर्नुपरेको गुनासो गरेका थिए । ‘पाहुना आउँछन्, नराखौं भने उनीहरूलाई दुःख, राखौं भने हामीले खोप पाएका छैनौं,’ होटल व्यवसायी महासंघ गण्डकीका अध्यक्ष अर्जुन चोखालले भने, ‘साता दिनभित्र खोप नपाए होटलको चाबी बुझाउँछौं ।’ उनले प्रमुख जिल्ला अधिकारीले जोखिम मोलेर भए पनि स्थानीय आवश्यकताका आधारमा प्राथमिकता निर्धारण गर्नुपर्ने बताए । तोकिएको मापदण्ड पालना गरेमा जिल्ला भित्रिएको खोपले ५० वर्षभन्दा माथिका सबैलाई पुग्ने खनाल बताउँछन् ।

‘हामीले प्रत्येक वडाको लक्षित संख्या निकालेर खोप ल्याएका हौं तर बेथिति भयो भने पुग्दैन,’ उनले भने, ‘प्राथमिकताको आधारमा खोप लगाउन पाइयो भने डेढ/दुई महिनामा जिल्लाका सबै नगरिकलाई खोप लगाउन सकिन्छ ।’ शिक्षकलाई खोप दिन नसकेकै कारण टोलटोलका सिकाइ केन्द्र बनाउने कामसमेत रोकिएको शिक्षा विकास तथा समन्वय इकाइ बागलुङका प्रमुख कुश्मराज उपाध्यायले बताए ।

पसलमा बसिरहनु पर्नेलाई लगाउन खोज्दा परिवारका सबै सदस्य लिएर आएपछि खोप पुर्‍याउनै नसकिएको स्वास्थ्य कार्यालयका खोप सुपरभाइजर राजु थापाले बताए । ‘तोकेको मानिस मात्रै आउनुभयो भने सजिलो हुन्छ, खोप पनि पुग्छ,’ उनले भने, ‘अन्यथा खोप केन्द्र कोरोना संक्रमण हुने स्थान बन्छ ।’ कतिपयले खोप पनि रोजेको लगाउन खोजेकोले अन्योल भएको उनले बताए । बागलुङमा अहिलेसम्म कोभिसिल्ड र भेरोसेल लगाइएको थियो । अपांगता भएका, विदेश जानुपर्ने र अत्यावश्यक सेवामा खटिएकालाई जोन्सन एन्ड जोन्सन लगाइएको हो ।

प्रकाशित : श्रावण १४, २०७८ ०९:२७
प्रतिक्रिया
पठाउनुहोस्

युवा अगुवाइमा कोतघर संरक्षण

प्रकाश बराल

बागलुङ —  ऐतिहासिक गलकोट राज्यको पहिलो मुकाम ‘कोतघर’ संरक्षण अभियानमा यहाँका युवा जुटेका छन् । गलकोट नगरपालिकाले अभियानमा साथ दिएको छ । यहाँका धार्मिक, ऐतिहासिक र पर्यटकीय क्षेत्रको संरक्षण गर्ने गरी कोतमैदान संरक्षण अभियान थालिएको हो । नगर विकास कोष, गण्डकी प्रदेशको पर्यटन मन्त्रालय, विदेशमा बस्ने युवाले आर्थिक सहयोग गरेका छन् । 

बागलुङको गलकोट–३ स्थित कोतघर । तस्बिर : प्रकाश बराल/कान्तिपुर


मध्यपहाडी लोकमार्गदेखि ६ किमि सडक निर्माण गरेर कोतघर पुग्ने व्यवस्था भइसकेको छ । सडकको स्तरोन्नति गर्ने योजना रहेको व्यवस्थापन समितिका सदस्य झरसिंह खत्रीले बताए । कोतघरबाट गलकोट उपत्यका, घुम्टे, दरमखोला र ताराखोलाको केही खण्ड देखिन्छ । कोतघरलाई रङरोगन र मर्मत गरिएको छ । सँगैको कालिका मन्दिर पनि मर्मत भएको छ । झन्डै सय रोपनी जमिन तारबार लगाएर संरक्षण गरिएको छ । खानेपानीको धारा निर्माण, सत्तल, विश्रामस्थल र आकर्षक पदमार्गसमेत निर्माण भइरहेको हो । पदमार्गका लागि नगरपालिकाले ३ लाख रुपैयाँ सहयोग गरेको थियो । यहाँ अजंगका २ खुकुरी र २ खुँडा छन् । गलकोटे राजाले प्रयोग गरेका ३ सय वर्ष पुराना हतियारसमेत यहाँ छन् । ‘यी सबै सामान पुरातात्त्विक हुन्, त्यसैले संरक्षण योजना बनाइएको हो,’ गलकोट–३ का अध्यक्ष वीरजंग भण्डारीले भने, ‘समृद्ध गलकोटसँगै पर्यटकीय गन्तव्य बनाउने लक्ष्यसहित संरक्षण अभियान थालिएको हो ।’

गलकोटका पहिलो राजा जितेन्द्रदेव मल्लले यो कोतघर बनाएको इतिहास छ । नेपाल एकीकरणपूर्व १८४४ सालसम्म यो राज्य स्वतन्त्र थियो । २०१७ सम्म गलकोट रजौटा राज्यका रूपमा चिनिन्थ्यो । २०१९ सम्म पनि बागलुङका मुख्य प्रशासनिक एकाइ गलकोटमै थिए । पछि बागलुङ बजारमा सारियो । उक्त विरासत झल्काउन कोतघर संरक्षण र पर्यटन प्रवर्द्धनका कार्यक्रम ल्याएको भण्डारीले बताए । कोतघर नजिकै सहश्रधारा झरनामा क्यानोनिङको पूर्वाधार बनाइएको छ । ‘यहाँ आउने पर्यटकले घुम्ने मात्र नभई अध्ययनसमेत गर्न सक्ने बनाउँदै छौं,’ भण्डारीले भने । गण्डकी नगर विकास योजनामार्फत यहाँ ३६ लाख रुपैयाँ लगानी भइसकेको उनले बताए ।

चैतेदसैं र बडादसैंमा यहाँ ठूलो मेला लाग्छ । नित्य पूजा भने स्थानीयले गर्छन् । कोटमैदान गाउँका ५० घरले अपनत्व लिएर संरक्षण र पूजा गर्ने काम गरिरहेका छन् । यो नगर गौरवको योजनामा पनि सूचीकृत छ । ‘गौरवको योजनालाई पूर्णता दिन बर्सेनि बजेट विनियोजन हुन्छ,’ नगर प्रमुख भरत शर्मा गैरेले भने, ‘कालिका मन्दिर जीर्णोद्धार र सत्तल बनाइसकेका छौं ।’ पक्की घेराबार बनाएर कोतको इतिहाससमेत लेखेर राख्ने योजना उनले सुनाए । शिलालेख राखेर आउने पर्यटकले पढ्ने र गलकोटको इतिहास थाहा पाउने व्यवस्थाका लागि पनि तयारी गरेको भण्डारीले सुनाए ।

प्रकाशित : श्रावण १३, २०७८ १३:००
पूरा पढ्नुहोस्
प्रतिक्रिया
पठाउनुहोस्
×