गोरखामा साउन २४ गतेसम्म थपियो निषेधाज्ञा- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गोरखामा साउन २४ गतेसम्म थपियो निषेधाज्ञा

हरिराम उप्रेती

गोरखा — गोरखामा जारी निषेधाज्ञा साउन २४ गतेसम्म थपिएको छ । शुक्रबार बसेको जिल्ला कोभिड संकट व्यवस्थापन केन्द्रको सिफारिसमा प्रमुख जिल्ला अधिकारी शालिग्राम शर्मा पौडेलले थप १५ दिन निषेधाज्ञा जारी गरेका हुन् । यसअघि साउन ९ गते(शनिबार) राति १२ बजेसम्म निषेधाज्ञा जारी भएको थियो ।

जिल्लामा नयाँ भेरियन्टसहितको कोरोना भाइरस संक्रमणको अवस्थालाई मध्यनजर लिँदै संक्रमण रोकथाम, नियन्त्रण र व्यवस्थापनको लागि निषेधाज्ञालाई निरन्तरता दिने निर्णय भएको प्रशासनका अधिकृत हर्क रोकाले बताए ।

निषेधाज्ञाको अवधिमा सबै प्रकारको सभा सम्मेलन, गोष्ठी, तालिम, सेमिनार, भेला, जात्रा, महोत्सव गर्न निषेध गरिएको छ । जिल्लाभित्र निजी तथा सार्वजनिक सवारी साधान भने यसअघि नै सञ्चालनमा छ । विश्वविद्यालय, क्याम्पस एवं माध्यमिक विद्यालयहरुको पूर्वनिर्धारित परीक्षाहरु स्वास्थ्य सावधानी अपनाएर भौतिक दूरी कायम गरी सञ्चालन गर्न पाइने भएको छ । क्याम्पस विद्यालय लगायतका सबै शैक्षिक संस्था, तालिम प्रशिक्षक केन्द्रबाट भौतिक रुपमा उपस्थित भइ हुने पठनपाठन लगायतका शैक्षिक गतिविधिहरु सञ्चालनमा भने रोक लगाइएको छ ।

दैनिक उपभोग्य खाद्यान्न, तरकारी, फलफूल लगायतका पसलहरु बिहान ५ बजेदेखि साँझ ७ बजेसम्म खुल्ला रहेनछन् । यसअघि बिहान ५ बजेबाट साँझ ५ बजेसम्म मात्र खाद्यान्न पसल खुल्दै आएका थिए । होटल–लज सञ्चालनका सम्बन्धमा जनस्वास्थ्यका निर्धारित मापदण्ड पालना गरी कुल कोठा संख्याको ५० प्रतिशत नबढ्ने गरी सञ्चालन गर्न पाइने र कोठाहरु प्रत्येक दिन अनिवार्य निसंक्रमण गर्नुपर्ने रोकाले बताए ।

प्रकाशित : श्रावण ८, २०७८ १६:४७
प्रतिक्रिया
पठाउनुहोस्

जमघट र मेलापातले संक्रमण बढ्यो

सेवाग्राहीको चाप बढ्दा सरकारी कर्मचारी र बैंकरमा समेत संक्रमण
हरिराम उप्रेती

गोरखा — गत शनिबार सहिद लखन गाउँपालिका–८ छापथोक हटिया गाउँका १८ जनाको एन्टिजेन परीक्षण गर्दा १५ जनाको रिपोर्ट पोजिटिभ आयो । असार ३१ मा पनि उक्त गाउँका २५ जनाको एन्टिजेन परीक्षणमा २३ को रिपोर्ट पोजिटिभ आएको थियो ।

शनिबार ५५ जनाको पीसीआर परीक्षणका लागि स्वाब संकलन गरिएको छ । छापथोकमा ४० जनाभन्दा बढीमा रुघाखोकीजस्ता लक्षण देखिएको गाउँ स्वास्थ्य शाखा प्रमुख वीरेन्द्र श्रेष्ठले बताए । ‘केही दिनअघि २–४ जनालाई रुघाखोकी देखिएको रहेछ, परीक्षण भएको थिएन,’ उनले भने, ‘असार १५ यता गाउँमा मेलापातको चाप छ । समूहमा काम गर्दा एकबाट अर्कोमा सर्दै गयो । फेरि चाडपर्व सुरु भयो, जमघट र पाहुना लाग्ने क्रमसँगै जोखिम बढेको हो ।’

कोरोना संक्रमणको दर घटेको भन्दै जिल्लाभर निषेधाज्ञा खुकुलो बनाइएको छ । सार्वजनिक यातायात, सरकारी कार्यालय, बैंक तथा वित्तीय संस्था पनि खुलेका छन् । भीडभाड हुने ठाउँमा मास्कको प्रयोग भए पनि भौतिक दूरीलगायत अन्य स्वास्थ्य सुरक्षा मापदण्ड पालना भएको छैन । आर्थिक वर्षको अन्त्य भएकाले भीडभाड बढ्दा मध्यअसारयता सरकारी तथा बैंकका कर्मचारीसमेत संक्रमित बनेका छन् । पछिल्लो पटक धार्चे गाउँपालिकाका ७ कर्मचारीमा संक्रमण पाइएको छ । अजिरकोटको भच्चेकमा ८ जना बैंकर पनि संक्रमित भएका छन् । ‘अन्तिम भुक्तानी लिने बेला बैंक बन्द गरौं भन्न पनि मिलेन,’ अजिरकोटका स्वास्थ्य शाखा प्रमुख सुरेश दवाडीले भने, ‘त्यो बेला चाप बैंकमा भइदियो, फेरि निषेधाज्ञा खुकुलो भएपछि गाडी चल्न थाले, आवतजावत बढेपछि जोखिम त्यसै बढ्यो ।’

स्वास्थ्य कार्यालयका अनुसार केही दिनयता परीक्षण गरिएकामध्ये झन्डै २८ प्रतिशतमा संक्रमण पाइएको छ । जिल्लामा हाल सक्रिय संक्रमित ३ सय ४५ छन् । आरुघाट–६ कल्लेरीको एउटै गाउँका २९ जनाको पीसीआर परीक्षण गर्दा १७ जनामा संक्रमण पुष्टि भएको छ ।

गाउँपालिकाका स्वास्थ्य शाखा प्रमुख विजय श्रेष्ठले कोरोना फैलावटका लागि मेलापात पनि सहायक कारण बनेको बताए । ज्वरो, रुघाखोकी जस्ता लक्षण देखिएकाहरूलाई मेलापात नजान आग्रह गरिए पनि रोपाइँको सिजन भएकाले सम्भव नदेखिएको उनको भनाइ छ ।

दुई सातायता गोरखामा निषेधाज्ञा खुकुलो बनाइए पनि दैनिक संक्रमितको सख्या भने पहिले जस्तै रहेको स्वास्थ्य कार्यालयका सूचना अधिकारी नवराज खड्काले बताए । ‘सार्वजनिक यातायातमा स्वास्थ्य मापदण्ड पालनामा कडाइ छैन, रोपाइँमा दूरी कायम हुने कुरै भएन,’ उनले भने, ‘गाउँशहर गर्ने क्रम पनि बढेको छ । यसरी जति मुभमेन्ट भयो त्यति जोखिम रहन्छ ।’

प्रकाशित : श्रावण ६, २०७८ १३:०५
पूरा पढ्नुहोस्
प्रतिक्रिया
पठाउनुहोस्
×