बजेट खर्च ७३ प्रतिशत- गण्डकी - कान्तिपुर समाचार

बजेट खर्च ७३ प्रतिशत

अघिल्लो आर्थिक वर्षभन्दा १० प्रतिशत बढी, असारमा मात्रै ९ अर्ब खर्च
प्रतीक्षा काफ्ले

कास्की — गण्डकी प्रदेश सरकारले आर्थिक वर्ष २०७७/७८ मा ७३ प्रतिशत बजेट खर्च गरेको छ । कुल बजेट ३४ अर्ब ८४ करोड २१ लाख ६० हजारमध्ये २५ अर्ब ७४ करोड १३ लाख ९१ हजार खर्च भएको प्रदेश लेखा नियन्त्रक कार्यालयले जनाएको छ । 

गण्डकी प्रदेशको मुख्यमन्त्री तथा मन्त्रिपरिषद्को कार्यालय । फाइल तस्बिर : कान्तिपुर

प्रदेश लेखा नियन्त्रक इन्द्रप्रसाद पौडेलका अनुसार पुँजीगततर्फको १९ अर्ब ९९ करोड ९४ लाख ७६ हजारमध्ये १७ अर्ब ६१ करोड ४४ लाख ८१ हजार (७९ प्रतिशत) खर्च भएको छ । यसैगरी चालुतर्फको १४ अर्ब ३४ करोड ५६ लाख ८४ हजारमध्ये ८ अर्ब १२ करोड ६९ लाख १० हजार अर्थात् ६० प्रतिशत खर्च भएको छ । अघिल्लो वर्षभन्दा यस वर्ष १० प्रतिशत बजेट बढी खर्च भएको बताउँदै पौडेलले पुँजीगतभन्दा चालुतर्फको बजेट खर्च गर्न समस्या भएको जानकारी दिए ।

‘कोरोना थियो, तालिम गोष्ठीका कार्यक्रम रोकिए । कार्यक्रमको बजेट खर्च हुन सकेन,’ उनले भने, ‘कोरोनाकै कारण भौतिक पूर्वाधारको बजेट पनि ठूलो मात्रामा खर्च हुन सकेको छैन । सबैभन्दा बढी खर्च भौतिककै भए पनि चित्तबुझ्दो भएन ।’ उनले कोरोना महामारीको असर नपरेको भए ९० प्रतिशतको हाराहारीमा बजेट खर्च हुने दाबी गरे । ‘एकाएक काम रोकिँदा यसको प्रत्यक्ष असर बजेट भुक्तानीमा पर्‍यो,’ उनले थपे ।

सरकारले बजेट खर्च नै पुँजीगत रहेको बताउँदै अर्थ मन्त्रालयका उपसचिव रमेश शर्माले कोरोनाका कारण योजनाअनुरूप खर्च गर्न नसकिएको जानकारी दिए । उनका अनुसार लकडाउन खुकुलो भएसँगै पुँजीगत खर्च ह्वात्तै बढेको हो । असारमा धमाधम बजेट निकासा भएको थियो । लकडाउनमा ठूला योजना ठप्प भए पनि साना र मझौला योजनाको काम नियमित भइरहेको मन्त्रालयले जनाएको छ । भौतिक मन्त्रालयले ठेक्का लगाउने काम गरिरहेको बताउँदै उनले बजेट भुक्तानी गर्नैपर्ने भएकाले पूर्वाधारमा खासै असर नपरेको जानकारी दिए । यस्तै, भौतिक मन्त्रालयले ८२ प्रतिशत बजेट खर्च गरेको छ । यो अरू मन्त्रालयको भन्दा धेरै हो ।

प्रदेश सरकारले असार ३० मा एकै दिन ८६ करोड रुपैयाँ खर्च गरेको छ । गत आवमा असारको अन्तिम दिन १ अर्ब ३५ करोड रुपैयाँ खर्च भएको थियो । पौडेलले असारको २४ मा मात्रै १ अर्ब रुपैयाँ खर्च भएको बताए । असारमा मात्रै ९ अर्ब रुपैयाँ खर्च भएको छ । ‘एकै दिन ठूलो रकम खर्च भएको असार २४ र ३० गते हो,’ उनले भने, ‘यस वर्ष एकै दिन ठूलो रकम खर्च गर्नुपरेन ।’ आर्थिक कार्यविधिअनुसार असार मसान्त अर्थात् अन्तिम दिन बजेटको कारोबार गर्न पाइँदैन । बजेट भुक्तानी गर्न नपाउने भएपछि असारको ३० मा नै बजेट कारोबार सम्पन्न भएको उनले बताए । अन्य महिनामा ८०/९० लाख रुपैयाँ खर्च हुन्थ्यो ।

प्रकाशित : श्रावण २, २०७८ ११:१९
प्रतिक्रिया
पठाउनुहोस्

कोरोनाविरुद्धको खोप किन्न गण्डकीमा १ अर्ब

प्रतीक्षा काफ्ले

कास्की — कोरोना भाइरस नियन्त्रणलाई प्राथमिकतामा राख्दै बजेट सार्वजनिक गरेको गण्डकी प्रदेश सरकारले खोप खरिदका लागि एक अर्ब रुपैयाँ विनियोजन गरेको छ । आर्थिक वर्ष २०७८/७९ का लागि असार १ मा सार्वजनिक गरेको बजेट वक्तव्यमा सरकारले कुन क्षेत्रमा कति रकम छुट्याइयो भन्ने खुलाएको थिएन । 

अर्थ मन्त्रालयले निकालेको रातो किताबअनुसार कोरोनाविरुद्धको खोप किन्न १ अर्ब र कोरोना भाइरस नियन्त्रण, रोकथाम तथा व्यवस्थापन कोषका लागि २० करोड रुपैयाँ विनियोजन गरिएको छ ।

मन्त्रालयका उपसचिव रमेश शर्माका अनुसार कोषमा ८५ करोड रुपैयाँ जम्मा भइसकेको छ । सोही कोषबाट कोरोनासम्बन्धी उपकरण खरिद तथा व्यवस्थापनका लागि खर्च गरिएको उनले बताए । यस्तै स्वास्थ्य क्षेत्रतर्फको कुल बजेट २ अर्ब १७ करोड ३४ लाख ८३ हजार रुपैयाँ छ । यसअन्तर्गत औषधि उत्पादन, उपकरण तथा औजारका लागि ३ करोड १४ लाख, बहिरंग सेवाका लागि ८ करोड ७५ लाख, अस्पताल सेवाका लागि १ अर्ब २३ करोड ७६ लाख ८७ हजार, सार्वजनिक स्वास्थ्य सेवामा ७५ करोड ९४ लाख ७१ हजार र अनुसन्धान सेवाका लागि ५ करोड ७४ लाख २५ हजार रुपैयाँ विनियोजन भएको छ ।

यस्तै शिक्षातर्फ १ अर्ब ४४ करोड २२ लाख ४६ हजार, पूर्वाधारतर्फ १४ अर्ब ९४ करोड ९४ लाख ६५ हजार, सामाजिक सुरक्षातर्फ २ अर्ब ११ करोड १७ लाख ४ हजार, वातावरण संरक्षणतर्फ १ अर्ब ६ करोड १६ लाख २३ हजार, आवास तथा सामुदायिक सुविधातर्फ ३ अर्ब ४९ करोड १७ लाख ४३ हजार रुपैयाँ बजेट छ । आर्थिक मामिलातर्फ १३ अर्ब ३३ करोड ५७ लाख ४२ हजार, सामान्य सार्वजनिक सेवामा ६ अर्ब ४७ करोड ४० लाख २ हजार, मनोरञ्जन तथा संस्कृति क्षेत्रका लागि ३७ करोड ७८ लाख ७१ हजार, नीति तथा कार्यक्रममा समेटिएका ४२ वटा योजनाको लागि ४ अर्ब २६ करोड ५२ लाख ८० हजार रुपैयाँ विनियोजन गरिएको छ ।

आगामी वर्ष २०७८/७९ का लागि सरकारले जम्मा ३० अर्ब ३ करोड ९४ लाख २७ हजार रुपैयाँको बजेट ल्याएको थियो जुन अघिल्लो आर्थिक वर्षको भन्दा ४ अर्ब ८० करोड कम हो । चालूतर्फ १३ अर्ब ६ करोड ४७ लाख ९४ हजार (४३.५ प्रतिशत) र पुँजीगततर्फ १६ अर्ब ७३ करोड ४६ लाख ३३ हजार (५५.७ प्रतिशत) बजेट रहेको छ ।

प्रदेश सरकारले वित्तीय व्यवस्थापनतर्फ २४ करोड (०.८ प्रतिशत) रकम विनियोजन गरेको थियो । यस्तै, आन्तरिक र संघीय सरकारसंग १/१ अर्ब ऋण लिएको छ । बजेटको स्रोतमा नेपाल सरकारबाट प्राप्त हुने वित्तीय समानीकरण अनुदान ७ अर्ब ४२ करोड २८ लाख, ससर्त अनुदान ४ अर्ब १८ करोड ४३ लाख, समपूरक अनुदान ८७ करोड ३६ लाख र विशेष अनुदान ५४ करोड ९० लाख छ । यसै गरी राजस्व बाँडफाँटबाट ७ अर्ब ६२ करोड ७० लाख, रोयल्टीबाट ३० करोड, आन्तरिक राजस्वबाट ४ अर्व ९८ करोड २७ लाख २७ हजार राखिएको छ ।

प्रकाशित : श्रावण १, २०७८ १३:०९
पूरा पढ्नुहोस्
प्रतिक्रिया
पठाउनुहोस्
×