तनहुँमा थपियो असार ७ गतेसम्म निषेधाज्ञा- गण्डकी - कान्तिपुर समाचार

तनहुँमा थपियो असार ७ गतेसम्म निषेधाज्ञा

सम्झना रसाइली

तनहुँ — जिल्लामा कोरोना भाइरस संक्रमण रोकथाम तथा न्यूनिकरणका लागि थप एक हप्ता निषेधाज्ञा लम्ब्याइएको छ । जिल्ला प्रशासन कार्यालय तनहुँले वैशाख २३ गतेबाट जारी गरेको निषेधाज्ञा पुन: एक हप्ता थप गरी असार ७ गते राति १२ बजेसम्मका लागि लम्ब्याएको हो ।

निषेधाज्ञालाई केही खुकुलो बनाउँदै एक हप्ता लम्बाइएको प्रमुख जिल्ला अधिकारी सागर आचार्यले बताए । प्रजिअ आचार्यको अध्यक्षतामा आइतबार बसेको जिल्ला कोभिड संकट व्यवस्थापन समितिको बैठकले गरेको सिफारिसका आधारमा बैंक तथा वित्तिय संस्था बिहान १० देखि दिउँसो एक बजेसम्म खुल्न दिने निर्णय गरिएको छ । उनले भने, ‘आवश्यक परेकालाई मात्र सेवा उपलब्ध गराइने छ ।’

यस्तै, निषेधाज्ञाको अवधिमा अत्यावश्यक सेवाहरुसँगै खाद्यान्न, तरकारी, फलफूल, दूध र दुग्धजन्य पदार्थ, माछामासु, अण्डा, दाना, पशुपक्षीको उत्पादन र बिक्री वितरण, निर्माण सामग्री पसल सञ्चालन, सवारी साधान र मोबाइल मर्मत सेवा बिहान ५ देखि १० बजेसम्म खुला गर्न दिइने समितिले निर्णय गरेको छ । यसअघि तरकारी तथा खाद्यान्नको बिक्री वितरण बिहान ७ बजेदेखि ९ बजेसम्म खला गर्न पाइथ्यो ।

‘यीबाहेक अन्य सबै क्षेत्र बन्द गरिने छ’, उनले भने, ‘सिनेमा हल, पार्टी प्यालेस, डान्स बार, खोहोरी, नाचघर, क्लब, हेल्थ क्लब, जिमखाना, स्विमिङ पुल, फुटसल, सभा, आमसभा, साइकल र मोटरसाइकलमा गरिने व्यापार, तालिम, सेमिनार, भौतिक उपस्थितिमा गरिने शिक्षण प्रशिक्षण र मानिसहरुको भीडभाड हुने अन्य सबै प्रकारका कार्यक्रमहरु पूर्णरुपमा बन्द गरिने छ ।’

यस्तै, जिल्ला भित्र र बाहिर चल्ने निजी सार्वजनिक सवारी साधानहरु अनुमति बेगर सञ्चालनमा रोक लगाइएको प्रशासन कार्यालय तनहुँले जनाएको छ ।

प्रकाशित : जेष्ठ ३०, २०७८ २०:२५
प्रतिक्रिया
पठाउनुहोस्

बागलुङमा असार ७ सम्म निषेधाज्ञा

प्रकाश बराल

बागलुङ — कोरोना संक्रमण नियन्त्रण नभएकोले जिल्ला प्रशासन कार्यालय बागलुङले असार ७ गते सम्मका लागि निशेधाज्ञा थपेको छ ।

जिल्ला कोभिड संकट व्यवस्थापन समिति डिसीसीएमसीको आइतबारको बैठकले निषेधाज्ञा थप गर्न प्रशासनलाई सिफारिस गरेको थियो । उक्त सिफारिसको आधारमा निषेधाज्ञा बढाइएको प्रमुख जिल्ला अधिकारी शिवकुमार कार्कीले बताए ।

यसअघिको निर्णय भन्दा निषेधाज्ञा केही खुकुलो पार्ने गरी प्रशासनले तयारी समेत गरेको छ । यसअघि आइतबार र बुधबार खुलेका वित्तीय संस्था सातामा ४ दिन खुल्न पाउने व्यवस्था गरिएको छ । ती संस्थालाई बिहान ७ देखि १० बजेसम्म खुलाइनेछ । त्यस्तै तरकारी, फलफूल दूध र दैनिक उपभोग्य सामाग्री खरिद गर्ने पसल बिहानको समयमा खुलाउन पाउने समेत निर्णय गरिएको छ । आइतबार, मंगलबार, बुधबार र शुक्रबार ती संस्था खुलाउन पाइने उल्लेख छ ।

सेवा प्रवाह गर्दापनि स्वास्थ्य मापदण्ड पालना भने अनिवार्य गर्नुपर्ने छ । यसपटक प्रशासनबाट कुनैपनि पाससमेत जारी नहुने प्रजिअ कार्कीले प्रकाशित गरेको विज्ञप्तिमा उल्लेख छ । तोकिएको समयबाहेक अन्य समयमा निषेधाज्ञा कडाइ हुनेछ ।

विज्ञप्तिमा सरकारले हालै जारी गरेको निषेधाज्ञा सम्बन्धी अध्यादेश २०७८ उल्लंघन गरेमा ६ महिना जेल र तीन लाख रुपैयाँसम्म जरिवाना गरिने जनाइएको छ । अध्यादेश लागू गर्न अवरोध गर्नेलाई १ वर्ष कैद र ५ लाख रुपैयाँ जरिवान हुनेछ । व्यक्तिले निषेधाज्ञा उल्लंघन गरेमा १ लाख र संस्थाले उल्लंघन गरेमा ५ लाख जरिवाना गरिने समेत बताइएको छ । मास्क नलगाइ आवतजावत गरेमा हरेक पटक २ सय जरिवाना प्रहरीले तिराउन सक्ने व्यवस्था गरिएको हो ।

अनुमतिबिना सवारी साधन सञ्चालन भएमा पटकै पिच्छे दुई पाङग्रेलाई २ हजार र चारपाङग्रेलाई ५ हजार जरिवाना लगाइने बताइएको छ ।

प्रकाशित : जेष्ठ ३०, २०७८ २०:१४
पूरा पढ्नुहोस्
प्रतिक्रिया
पठाउनुहोस्
×