दुर्गम क्षेत्रमा आइसोलेसन- गण्डकी - कान्तिपुर समाचार

दुर्गम क्षेत्रमा आइसोलेसन

सम्झना रसाइली

तनहुँ — जिल्लाका ग्रामीण क्षेत्रका समुदायमा पछिल्लो समय कोरोना संक्रमितको संख्या बढ्दै जान थालेको छ । संक्रमितको संख्या बढ्दै गएपछि स्थानीय पालिकाले गाउँगाउँमा अक्सिजनसहितका अस्थायी आइसोलेसन तयार गर्न थालेका छन् ।

यातायातको सहज पहुँच नभएको जिल्लाकै कछार क्षेत्रका रूपमा परिचित देवघाट गाउँपालिका–३ स्थित छिपछिपेमा अक्सिजनसहितको आइसोलेसन कक्ष तयार गरिएको छ । कोरोना संक्रमणबाट आइपर्ने जोखिमलाई मध्यनजर गर्दै पूर्वतयारीका रूपमा इलाका स्वास्थ्य चौकीमा आइसोलेसन कक्ष निर्माण गरिएको गाउँपालिका अध्यक्ष दुर्गाबहादुर थापाले बताए । ‘बजार क्षेत्रमा बसोबास गर्दै आएका नागरिक निषेधाज्ञा जारी भएपछि पुनः गाउँ फर्किएका छन्’, उनले भने, ‘बजारलगायत अन्य क्षेत्रबाट गाउँमा मानिसको आउजाउ बढेका कारण अहिले ग्रामीण क्षेत्रका समुदायमा कोरोना भाइरस संक्रमण देखिन थालेको छ ।’

‘ग्रामीण क्षेत्रमा सहज रूपमा यातायातको व्यवस्था नभएकाले यदि कोही संक्रमितलाई अक्सिजन दिएर उपचार गर्नुपर्ने अवस्था आयो भने केही सहज होस् भनेर गाउँगाउँमा रहेका इलाका स्वास्थ्य चौकीमा केही थान अक्सिजन सिलिन्डर जुटाएर आइसोलेसन कक्ष तयार गरेका छौं,’ थापाले भने, ‘संक्रमितको स्वास्थ्यमा जटिल अवस्था देखिएमा तत्काल उद्धार गरी अन्यत्र पठाउने व्यवस्था पनि मिलाएका छौं । हाम्रो स्रोतसाधनले भेटेसम्म गाउँठाउँमै उपचार सेवा दिन लागिपरेका छौं ।’ गाउँपालिकाले २ र ३ वडावासीलाई लक्षित गरी ५ वटा अक्सिजन सिलिन्डरसहित १० शय्याको आइसोलेसन कक्ष तयार गरेको गाउँपालिकाका स्वास्थ्य शाखा प्रमुख प्रदीपकुमार बुढाथोकीले बताए । उनले भने, ‘स्वास्थ्य चौकीमा कार्यरत ३ जना प्यारामेडिक्स, २ जना स्टाफ नर्स र एक कार्यालय सहयोगीले कोभिडका संक्रमितको उपचार गर्ने व्यवस्था मिलाएका छौं ।’ उनका अनुसार सामान्य प्रकारका लक्षण देखिएका बिरामीलाई आवश्यक परे अक्सिजन सेवा दिएर उपचार गरिनेछ भने गम्भीर प्रकृतिका संक्रमितलाई अन्यत्र रेफर गरिनेछ ।


प्रकाशित : जेष्ठ ३०, २०७८ १२:२४
प्रतिक्रिया
पठाउनुहोस्

पहिले खोप लाएनन्, अहिले पाएनन्

कान्तिपुर संवाददाता

रामेछाप — कोरोनाविरुद्धको खोप लगाउन आकर्षण बढेको छ । यसअघि खोप लगाउन नमान्नेहरू अहिले जसरी पनि लगाउन विभिन्न उपाय लगाइरहेका छन् । तर चिनजान र भनसुन गरेर केन्द्रमा पुगेका धेरै जना खोप लगाउन नपाई फर्किएका छन् ।

सरकारले यसअघि अग्रपंक्तिमा खटिएका स्वास्थ्यकर्मी, सुरक्षाकर्मी लगायतलाई खोप लगाएको थियो । तर कोभिसिल्ड खोप लगाएपछि ज्वरो आउने, टाउको र जीउ दुख्ने भन्दै त्यसबेला धेरैले लगाउन मानेका थिएनन् । ‘कर्मचारी नै धेरै छुटेको पाइयो,’ मन्थली नगर स्वास्थ्य शाखा प्रमुख केशवप्रसाद फुँयालले भने, ‘हिजो आउनुस् भन्दा आउनुभएन, अहिले जसरी भए पनि मिलाइदिनुपर्‍यो भन्ने धेरै छन् ।’

यस पटक जिल्लामा ३ हजार भाइल भेरोसेल खोप आएको छ । प्राप्त खोप ६२–६४ वर्ष उमेर समूहलाई हो । तर बुधबार खाँडादेवी, सुनापती र रामेछाप नगरपालिकामा लक्षित उमेर समूहभन्दा बाहिरका व्यक्तिहरूलाई पनि खोप दिइएको सूचना आएको स्वास्थ्य कार्यालय प्रमुख जितेन्द्र कर्णले बताए । उनका अनुसार ग्रामीण भेगमा धेरैलाई संक्रमण देखिएको, परीक्षण न्यून मात्रामा रहेको, गम्भीर संक्रमितमध्ये धेरैको मृत्यु भएकोले खोप लगाउने बढेका हुन् ।

प्रकाशित : जेष्ठ ३०, २०७८ १२:१५
पूरा पढ्नुहोस्
प्रतिक्रिया
पठाउनुहोस्
×