बेरोजगारलाई कृषिमा अनुदान
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
पर्वत — करिब डेढ वर्ष लामो कोरोना कहरले युवाहरू बेरोजगार हुने भन्दै फलेबास नगरपालिकाले युवालक्षित कार्यक्रम ल्याएको छ । वैदेशिक तथा स्वदेशमा रोजगारी गुमाएका युवालाई कृषिलाई व्यवसायीकरणमा डोर्याउने गरी ‘टनेल हाम्रो, उत्पादन तपाईंको’ अभियान सञ्चालन गरेको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![बेरोजगारलाई कृषिमा अनुदान](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/third-party/thumb-1262021043344-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
विशेषगरी युवा किसानलाई व्यावसायिक तरकारी खेतीतर्फ प्रोत्साहित गर्न र स्वरोजगार सिर्जना गर्न ४ सय ५५ टनेल वितरण गरेको हो । नगरपालिकाले गतवर्षको नगरसभामा घोषणा गरेको यो कार्यक्रम अन्तर्गत ४० लाख रुपैयाँ बराबरको टनेल वितरण गरिएको जनाएको छ । तरकारी खेतीमा नगरलाई आत्मनिर्भर बनाउने लक्ष्यसहित यो कार्यक्रममा अधिकांश वैदेशिक रोजगारी गुमाएर फर्किएका युवालाई समावेश गरेको छ ।
नगरका ११ वटै वडामा भूगोल र माटो सुहाउँदो फरकफरक तरकारी उत्पादन गर्न किसानलाई अनुदानमा टनेल वितरण गरिएको नगरप्रमुख पदमपाणी शर्माले बताए । ‘सबै संरचना तयार गरेपछि हामीले प्लास्टिक दिन्छौं,’ उनले भने, ‘बाली हामीले तोक्दैनौं । किसानले आफूखुसी बेमौसमी तरकारी र नगदेबाली लगाउनुहुन्छ ।’ मागका आधारमा जथाभावी प्लास्टिक वितरण गर्दा दुरुपयोग भएको गुनासो आएपछि टनेलको संरचना बनाएर वडा कार्यालयमा तस्बिर पेस गरेपछि मात्रै प्लास्टिक वितरण गरिएको नगरका प्रवक्ता टीकाराम गौंडेलले बताए । उनका अनुसार एउटा टनेल प्लास्टिकको मूल्य करिब ८ हजार ५ सय रुपैयाँ पर्छ ।
कार्यक्रमबाट आर्थिक अभावमा लगानी गर्न नसकेर बेरोजगार बनेका र विदेशबाट फर्किएका युवाले प्रत्यक्ष लाभ लिएको प्रशासकीय अधिकृत कृष्ण सापकोटाले बताए । युवाले प्लास्टिक टनेलभित्र गोलभेंडा, खुर्सानी, फर्सीलगायत तरकारी उत्पादन सुरु गरिसकेका छन् । कोरोनाका कारण विदेश र स्वदेशमा रोजगारी गुमाएर फर्किएका युवाका लागि यो कार्यक्रम निकै प्रभावकारी भएको छ ।
‘उता काममा फर्किने टुंगो छैन,’ कतारबाट रोजगारी गुमाएर फर्किएका फलेबास–४ का दीपेन्द्र लामिछानेले भने, ‘नगरपालिकाले टनेल कार्यक्रम ल्याएको थाहा पाएपछि निवेदन दिएँ । अहिले गोलभेंडा खेती सुरु गरेको छु ।’ ६ महिनाअघि गाउँ फर्किएका उनले व्यावसायिक कृषि फर्म दर्ता गरेका छन् । नगरले सहयोग गरे व्यावसायिक खेती विस्तार गर्ने तयारी गरेको उनले बताए ।
![](https://assets-cdn.ekantipur.com/uploads/source/ads/900-x-100-0172024023126.gif)