धौलागिरि अस्पतालमा ३ जना कोरोना संक्रमितको मृत्यु- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

धौलागिरि अस्पतालमा ३ जना कोरोना संक्रमितको मृत्यु

प्रकाश बराल

बागलुङ — धौलागिरि अस्पतालमा उपचाररत ३ जना कोरोना संक्रमितको बिहीबार मृत्यु भएको छ ।

जटिल अवस्था भएपछि अस्पताल आएका उनीहरुको उपचारको क्रममा मृत्यु भएको मेडिकल सुपरिटेण्डेन्ट डा. शैलेन्द्र पोखरेलले बताए । मृत्यु हुनेमा ढोरपाटन नगरपालिका–९ का ७७ वर्षीय पुरुष छन् ।

त्यस्तै, गलकोट नगरपालिका–४ का ५२ वर्षीय पुरुष र गलकोट घर भइ बागलुङ नगरपालिका–४ बस्ने ५७ वर्षीय पुरुषको पनि बिहीबार बिहान मृत्यु भएको हो ।

उनीहरु सबैको श्वासप्रश्वास सम्बन्धी समस्या थियो । ढोरपाटनका पुरुष सातादेखि अस्पतालमा उपचाररत थिए । अन्य दुई जना तीन दिनदेखि मात्रै उपचारमा आएका बिरामी हुन् । बागलुङमा अहिलेसम्म कोरोना संक्रमणबाट २० जनाको मृत्यु भइसकेको छ ।

प्रकाशित : वैशाख ३०, २०७८ १४:०३
प्रतिक्रिया
पठाउनुहोस्

निलम्बन फुकुवा पार्टी एकताका लागि एक कदम सकारात्मक छ : गोकर्ण विष्ट

कान्तिपुर संवाददाता

काठमाडौँ — एमाले सचिव गोकर्ण विष्टले माधवकुमार नेपालसहित चार नेतामाथि भएको निलम्बन फुकुवाको निर्णय सकारात्मक भएको बताएका छन् ।

बिहीबार बालुवाटारमा बसेको एमाले स्थायी कमिटी बैठकले नेता माधवकुमार नेपालसहित चार नेताको निलम्बन फुकुवा गर्ने निर्णय गरेको थियो । त्यसपछि प्रतिक्रिया दिँदै नेता विष्टले उक्त निर्णय पार्टी एकताको लागि एक कदम सकारात्मक रहेको बताए ।

‘पार्टी एकताको लागि चार नेतामाथिको कारबाही फुकुवा एक कदम सकारात्मक छ । तर, माओवादी केन्द्रसँग एकता गर्नुपूर्वका केन्द्रीय कमिटी, त्यसको मातहत कमिटी र जनसंगठनका संरचनाहरुलाई पूर्ववतः अवस्थामा फर्काएर अगाडि बढ्दा एकता जोगाउन सकिन्छ । यसका लागि सबै गम्भीर हुनुपर्छ,’ विष्टले कान्तिपुरसँग भने ।

नेता विष्टका अनुसार यसबारे थप छलफल गर्न ओली र नेपालबीच संवाद हुने भएको छ । ‘केपी ओली कमरेड र माधव कमरेडबीच संवाद गर्ने भन्ने भएको छ । तर, पार्टीलाई ०७५ जेठ २ मा फर्काउनु पर्छ । जेठ २ मा फर्किए सहमति हुन्छ । जेठ २ मा फर्काउन नसके कुनै पनि प्रकारको गम्भीर निर्णयमा जाने भन्ने भएको छ,’ विष्टले भने ।

खनाल–नेपाल समूहले ओलीपक्षलाई साढे चार बजेसम्मको समय दिएको छ ।

प्रकाशित : वैशाख ३०, २०७८ १३:५५
पूरा पढ्नुहोस्
प्रतिक्रिया
पठाउनुहोस्
×