बेनीमा छुट्टै कोरोना ब्लक- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बेनीमा छुट्टै कोरोना ब्लक

कान्तिपुर संवाददाता

म्याग्दी — कोरोनाको दोस्रो लहर समुदायमा फैलिएसँगै बेनी अस्पतालमा छुट्टै कोरोना ब्लक बन्न थालेको छ । निर्माणाधीन भवनका ४ कोठामा संरचनात्मक सुधार गरी अक्सिजन पाइपलाइन जडित २० बेड क्षमताको कोरोना सेक्सन निर्माण भइरहेको हो । अस्पतालमा ४ भेन्टिलेटरसहितको छुट्टै आईसीयू कक्ष पनि रहनेछ ।

‘सदरमुकाम बेनीमा कोरोना संक्रमित बिरामी भर्ना गरी उपचार गर्ने छुट्टै आइसोलेसन छैन । विभिन्न निकायसँग आर्थिक तथा भौतिक सहयोग जुटाएर एक/दुई दिनमै कोरोना ब्लक सञ्चालन हुने गरी काम भइरहेको छ,’ अस्पतालका मेसु डा. जितेन्द्र कँडेलले भने, ‘कोरोना संक्रमणको फैलावटको तुलनामा आइसोलेसन निर्माणमा ढिलाइ भइरहेको छ ।’

अस्पतालले कोरोना संक्रमणलाई लक्षित गरी ६२ लाख ४० हजार रुपैयाँ लागतमा अक्सिजन प्लान्ट जोडेको छ । इमर्जेन्सी, जनरल र आईसीयू कक्षका सबै बेडसम्म अक्सिजन पुर्‍याइएको छ । प्लान्टबाट दैनिक १० सिलिन्डर अक्सिजन भर्न सकिने अस्पतालले जनाएको छ ।

कँडेलका अनुसार हाल अस्पतालमा ४ साना, ४ मझौला र ३४ ठूला गरी ४२ वटा अक्सिजन सिलिन्डर छन् । पुरानो र साँघुरा अस्थायी संरचनामा सञ्चालन भएको अस्पतालमा जनरल बिरामीसँग कोरोना संक्रमित राख्न नमिल्ने भएपछि कोरोना ब्लक बनाउन लागिएको हो ।

एउटै कम्पाउन्डमा २ छुट्टाछुट्टै भवनमा कोरोना अस्पताल र बेनी अस्पताल सञ्चालन रहने छ । बेनी अस्पतालले आईसीयूमा भने कोरोनाका बिरामी राख्नेछ ।

प्रकाशित : वैशाख २६, २०७८ ११:५९
प्रतिक्रिया
पठाउनुहोस्

अस्पतालले भर्ना लिन नमानेपछि एम्बुलेन्समै गयो ज्यान

विप्लव महर्जन

सल्यान — राप्ती स्वास्थ्य विज्ञान प्रतिष्ठान दाङले बिरामीलाई भर्ना लिन नमानेपछि छत्रेश्वरी गाउँपालिका २ का ४९ वर्षीय पुरुषको एम्बुलेन्समै मृत्यु भएको छ । प्रतिष्ठानले भर्ना लिन नमानेपछि उपचारका लागि सल्यान फर्काउँदै गर्दा बाटोमै बिरामीको मृत्यु भएको हो ।

रुघाखोकी र ज्वरोबाट ग्रसित भएका ती पुरुषको स्वास्थ्य अवस्था जटिल भएपछि आफन्तले उपचारका लागि प्रतिष्ठान पुर्‍याएका थिए । कोरोनाका बिरामीले बेड खाली नभएको भन्दै अस्पतालले भर्ना गर्न नमानेको मृतकका आफन्तले बताएका छन् ।

‘हामीले बिरामीको भर्नाका लागि धेरै प्रयास गरेका थियौँ तर हाम्रो केही लागेन । अस्पतालले पनि भर्ना लिन मानेन,’ मृतकका एक आफन्तले भने, ‘बिरामीको अवस्था गम्भीर बन्दै गएपछि हामी आत्तियौँ र घरतिर फर्काउन बाध्य भयौँ ।’

प्रतिष्ठानले भर्ना लिन नमानेपछि आफन्तले बिरामीलाई फर्काएर छत्रेश्वरी गाउँपालिको भोटेचौरमा सञ्चालित आइसोलेसन लगेका थिए । तर त्यहाँ ल्याउँदा उनको मृत्यु भइसकेको आइसोलेसनमा कार्यरत डा. प्रोसेस सिंहले बताए । मृत्यु भएका बिरामीको स्वास्थ्य परीक्षण गर्दा उनमा कोरोना पोजिटिभ देखिएको उनले बताए ।

प्रकाशित : वैशाख २६, २०७८ ११:५४
पूरा पढ्नुहोस्
प्रतिक्रिया
पठाउनुहोस्
×