आइसोलेसनमा बेड अभाव- गण्डकी - कान्तिपुर समाचार

आइसोलेसनमा बेड अभाव

एक सय बेड स्टोरमै थन्किए
प्रकाश बराल

बागलुङ — कोरोना संक्रमितका आफन्तले धौलागिरि अस्पतालको आइसोलेसनका लागि दैनिक शय्या खोजी गरिरहेका छन् । तर अस्पतालले खाली नभएको भन्दै घरघरमै बस्न भनेको छ ।

बागलुङस्थित धौलागिरि अस्पतालमा सीमित आइसोलेसन बेड भिडियोमार्फत देखाउँदै स्वास्थ्यकर्मी । तस्बिर : प्रकाश/कान्तिपुर

गत वर्ष नै गण्डकी प्रदेश सरकारले यस अस्पताललाई ५० बाट बढाएर २ सय बेड क्षमताको बनाउने घोषणा गरेको थियो । घोषणाअनुसार सामाजिक विकास मन्त्रालयले झन्डै १ सय बेडसमेत पठाइसकेको छ । तर अस्पतालमा जडान भने हुन सकेको छैन ।

निर्माणाधीन ‘सी ब्लक’ भवन अलपत्र परेकाले बेड जडान गर्न नसकिएको अस्पतालले जनाएको छ । बेड स्टोरमा थन्किँदा बिरामी भने घरघरमा बस्न बाध्य छन् । सीमित बेडमा जटिल समस्या भएकालाई मात्रै राखेर उपचार गर्नुपरेपछि सामान्य बिरामीलाई घरमै बस्न लगाइएको अस्पतालका मेसु डा. शैलेन्द्र पोखरेलले बताए ।

६ वर्षअघि सकिनुपर्ने अस्पताल भवन अझै नसकिएपछि ल्याइएका बेड स्टोरमा थन्क्याउनु परेको अस्पताल व्यवस्थापन समितिका अध्यक्ष केवी रानामगरले बताए । ठाउँ नभएपछि बेड स्टोरभित्रै माकुराको जालोले घेरिएको छ । ‘म अध्यक्ष भएर आएको पनि दुई वर्ष पुगिसक्यो, अहिलेसम्म भवन बनाउने ठेकेदार भेटेको छैन,’ रानाले भने, ‘भवन अलपत्र हुँदा बेड उपयोगविहीन भए ।’ निर्माणाधीन भवनको भुइँतला वा छतमा व्यवस्थापन गरेर बेड राख्न खोज्दा लाखौं खर्च लाग्ने भएपछि छाडेको उनले बताए ।

ठेकेदारलाई पटकपटक सम्पर्क गरे पनि काम अलपत्र छाडेको उनले टिप्पणी गरे । भवन निर्माणको ठेक्का मिलेनियम बिल्डर्स निर्माण सेवाले लिएको हो । २०६९ सालमै पहिलो भवनको उद्घाटन भएकोमा गत वर्ष अस्पताल व्यवस्थापनले हस्तान्तरण नभएको बी ब्लक आफ्नै खर्चमा मर्मत गरेर चलाएको थियो । सी ब्लकका लागि पनि लाखौं खर्च गर्नुपर्ने भएपछि व्यवस्थापनले नसकेको रानाले बताए ।

ठेकेदार कम्पनीका प्रमुख शिव ढकालले ३ वर्षअघि नै सक्ने आश्वासन दिएपनि अहिलेसम्म अलपत्रै छ । धौलागिरि अस्पतालमा अहिले २५ मात्रै आइसोलेसन बेड छन् । अन्य २५ बेड इमरजेन्सीलगायत बिरामीलाई छुट्याइएको छ । २ सय बेड बनाउने योजना भवन अभावले अलपत्रै परेको मेसु पोखरेलले बताए । ‘ठेकेदारले नयाँ भवन हस्तान्तरण नगरेसम्म स्टोर पनि खाली गर्न नसकिने भयो,’ पोखरेलले भने, ‘जटिल बिरामीलाई समेत बेड अभाव भएको छ, आइसोलेसन बढाउने योजना पूरा गर्न सकिएन ।’ बागलुङमा २ सय बढी सक्रिय संक्रमित रहेकोमा अधिकांश होम आइसोलेसनमा छन् । समस्या परेर आउन खोज्नेलाई समेत बेड नभएर घरमै बस्न भनिएको उनले बताए ।

अस्पतालमा प्रसूति, डायलसिस, दन्तसेवा, ल्याबलगायतमा समेत झन्डै २५ बेड चाहिन्छ । प्रयोगमा ल्याउन नपाएर वार्डमा पनि चाहेजति बिरामी राख्न नसकेको पोखरेलले गुनासो गरे । ‘संक्रमणको जोखिमको बेला वार्डहरू साँघुरा भएका छन्, त्यसैले कतिपय बिरामी फिर्ता गर्नुपरेको छ,’ पोखरेलले भने, ‘अक्सिजन बिस्तार गर्न पनि पाइएको छैन ।’ अक्सिजन प्लान्ट भए पनि सी ब्लक नबनेपछि बिस्तार गर्न नसकेको उनले बताए । सर्भिसिङ नियमित गरेमा १ सयभन्दा बढी बेडमा नियमित अक्सिजन दिने गरी प्लान्ट निर्माण हुनेछ ।

अस्पतालमा बेड अभाव भएपछि बागलुङ नगरपालिकले बिहीबारदेखि २५ बेड आइसोलेसन सञ्चालनमा ल्याएको छ । नगरपालिकाको रात्माटास्थित पुरानो भवन सरसफाइ गरेर बेड राखिएको नगरस्वास्थ्य शाखा प्रमुख रामप्रसाद खनालले बताए । ‘केही अक्सिजन सिलिन्डरसमेत राखेर बेड निर्माण भएको छ,’ खनालले भने, ‘अस्पतालको विकल्प दिन खोजेका हौं ।’

प्रकाशित : वैशाख २४, २०७८ १०:३६
प्रतिक्रिया
पठाउनुहोस्

लक्षण देखिएका बिरामी घरघरै

बजेट नहुँदा क्वारेन्टाइन र आइसोलेसन व्यवस्था गर्न नसकिएको पालिकाको भनाइ
ओमप्रकाश ठाकुर

सर्लाही — सर्लाहीमा कोरोना संक्रमण र यसबाट मृत्यु हुनेको संख्या दिनहुँ बढ्दै गएको छ । तर स्थानीय तहले कोरोना रोकथाम तथा नियन्त्रणमा बेवास्ता गर्दै आएका छन् । क्वारेन्टाइन, आइसोलेसन व्यवस्थापन, लक्षण देखिएकाको स्वाब संकलन, जाँच र कन्ट्रयाक्ट ट्रेसिङ हुन नसकेको हो ।

खुला सीमा हुँदै भारतबाट नेपाल आउनेहरू तथा अन्य सहरबाट घर फिर्नेहरू सोझै घरपरिवार र समुदायको सम्पर्कमा पुगिरहेका छन् । यसले समुदायस्तरमा संक्रमण फैलिएको आशंका छ । २० स्थानीय तह रहेको जिल्लाका प्रत्येक पालिकामा अहिले कोरोनासँग मिल्दोजुल्दो लक्षण भएका बिरामी घरघरमा छन् । तर पालिकाहरूले उनीहरूको स्वास्थ्य जाँचमा ध्यान दिएका छैनन् ।

बलरा नगरपालिकामा मात्र उच्च ज्वरोका कारण चार जनाको मृत्यु भइसकेको छ । जिल्ला जनस्वास्थ्यबाट खटिएको टोलीले मृतकको सम्पर्कमा आएका व्यक्तिको स्वाब संकलन गरी जाँच गर्दा २१ जनाको रिपोर्ट पोजिटिभ आएको छ । मृतकहरूको ट्राभल हिस्ट्री पनि छैन । उनीहरू गाउँमै बसिरहेका बेला उच्च ज्वरोले थलिएका थिए ।

भारतीय सीमासँग जोडिएको पालिका भए पनि यहाँ न क्वारेन्टाइन छ न आइसोलेसन नै । बलराका नगरप्रमुख अभयकुमार सिंहले क्वारेन्टाइन र आइसोलेसन नबनाइए पनि स्वास्थ्य शाखाहरूमा मास्क, सेनिटाइजर र ज्वरोको औषधि उपलब्ध गराएको जानकारी दिए । उनले स्थानीयलाई स्वास्थ्य शाखामा गएर जाँचका लागि अनुरोध गरे पनि कोही पनि जान नमानेको बताए । ‘गम्भीर बिरामी भएमा जिल्ला अस्पताल उपचारका लागि पठाउँछौं,’ उनले भने ।

जिल्लामा उल्लेख्य रूपमा परीक्षण नभए पनि भएको परीक्षणमध्ये ५० प्रतिशतभन्दा बढीमा संक्रमण पुष्टि भइरहेको जिल्ला स्वास्थ्य कार्यालयले जनाएको छ । कार्यालयका प्रमुख श्रवणकुमार नायकले कोरोना नियन्त्रणमा स्थानीय तहहरूले तत्परता नदेखाएको बताए ।

उनले यही विषयलाई बिहीबार आयोजित जिल्ला कोभिड–१९ संकट व्यवस्थापन केन्द्र (डीसीसीएमसी) को बैठकमा स्थानीय तहका प्रमुखहरूसँग छलफल गरिएको जानकारी दिए । ‘स्थानीय तहको जुन भूमिका हुनुपर्ने हो, त्यो अहिलेसम्म देखिएको छैन, डीसीसीएमसी र जिल्ला स्वास्थ्य कार्यालयले मात्र कोरोनाको व्यवस्थापन गर्न सक्दैनन्,’ उनले भने, ‘स्थानीय तह जागरुक नभए नियन्त्रण हुन गाह्रो छ ।’ नायकले हरिवन नगरपालिकाले मात्र आइसोलेसनको व्यवस्थापन गरेको जानकारी दिए ।

कोरोना व्यवस्थापनमा अधिकांश स्थानीय तहले बजेट अभाव भएको जनाइरहेका छन् । उनीहरूले पालिकाको निर्णय नभएको भन्दै यसको व्यवस्थापनमा रकम खर्चन चाहेका छैनन् । कविलासी नगरपालिकाका स्वास्थ्य शाखाका संयोजक सञ्जय झाले पालिकाको निर्णय नभएकाले कोरोना व्यवस्थापनमा काम गर्न नसकेको जानकारी दिए ।

क्वारेन्टाइन र आइसोलेसन नबनाइए पनि होम क्वारेन्टाइन र आइसोलेसनको अवधारणाअनुरूप अगाडि बढेको गोडैता नगरपालिकाका मेयर देवेन्द्र यादवले बताए । उनले समुदायमा कोरोना लक्षण भएका बिरामीको स्वाब संकलनलाई तीव्रता दिइएको जानकारी दिए । ‘अबको अवधारणा होम क्वारेन्टाइन र होम आइसोलेसनकै हो, हामी त्यसैलाई आधार मानेर स्वाब संकलनलाई अगाडि बढाइरहेका छौं,’ मेयर यादवले भने, ‘गम्भीर भएका बिरामीका लागि तुरुन्त अस्पताल पुर्‍याउने छौं ।’

प्रकाशित : वैशाख २४, २०७८ १०:३३
पूरा पढ्नुहोस्
प्रतिक्रिया
पठाउनुहोस्
×