एक घर, एक करेसाबारी- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

एक घर, एक करेसाबारी

आश गुरुङ

लमजुङ — मर्स्याङ्दी गाउँपालिका–७ उस्ताकी मैंखु गुरुङको भान्सामा एक वर्षअघिसम्म जिल्ला बाहिरबाट ल्याइएका तरकारी पाक्ने गर्थ्यो । अहिले भने उनी उस्ताबेंसीमै फलेको ताजा तरकारी पकाउँछिन् । मैंखुमात्रै होइनन्, हरेक गाउँलेको भान्सामा अचेल आफ्नै गाउँमा उत्पादित तरकारी पाक्ने गरेको छ । 

लमजुङको मस्र्याङ्दी–७ उस्ताबेंसीमा स्थानीय कृषकले गरको सामूहिक तरकारी खेतीअन्तर्गत टनेलभित्र गरिएको फर्सी खेती । तस्बिर : कान्तिपर

उस्तामा अहिले सामूहिक तथा व्यक्तिगत रूपमा तरकारी खेती गर्नेको संख्या बढ्दो छ । स्थानीय हिमकुमारी घलेले घरमा उपभोग गरेर बाँकी रहेको तरकारी बिक्रीसमेत गर्छिन् । ‘पहिले किनेर तरकारी खाने ज्यान यही हो ।

अहिले गाउँमै फलाउन थाल्यौं,’ उनले भनिन् । उस्तागाउँ र बेंसीका कृषकले गाउँबेंसी पौरखी कृषक समूहलाई कृषि सहकारी बनाएर सामूहिक तरकारी खेती गरिरहेका छन् । अहिले उस्तामा उत्पादित तरकारी ङादी, भुलभुले, खुदीमात्रै नभएर सदरमुकाम बेंसीसहरसम्म पुग्छ । समूहकी अध्यक्ष उमा घलेले यस वर्ष गोलभेंडा ७ क्विन्टल, बन्दा १५ क्विन्टल र आलु ३० क्विन्टल उत्पादन गरिएको बताइन् । यहाँका तरकारी बालीमा विषादी राखिएको छैन । अहिले ४ टनेलमा क्याप्सिकम, २ टनेलमा काँक्रो, २ टनेलमा घिरौंला र करेला लगाइएको छ ।

अगुवा कृषक डम्बरबहादुर गुरुङको अध्यक्षतामा २०७३ सालमा २८ कृषक मिलेर गाउँबेंसी पौरखी कृषक समूह गठन भएको थियो । लगत्तै २० रोपनी जग्गा भाडामा लिएर आलु र तरकारी खेती थालिएको थियो । गाउँपालिकाले ५० प्रतिशत अनुदानमा एउटा हाते ट्र्याक्टर दिएपछि जुर्मुराएका थिए ।

यही समूहले अहिले मुख्यमन्त्री वातावरणमैत्री नमुना कृषि गाउँ सञ्चालन थालेको छ । उनीहरूले हाइटेक प्लास्टिक टनेल, बाख्रा खोर सुधार र नश्ल सुधार, डालेघाँस नर्सरी स्थापना गरेका छन् । तरकारी स्टोर, मलखाद, सिँचाइको पनि व्यवस्था गरिएको छ । भाडाकै ३० रोपनीमा कार्यक्रम सञ्चालन भइरहेको छ । मर्स्याङ्दी–७ का वडाध्यक्ष युवा घलेले कृषकलाई परम्परागत र निर्वाहमुखी खेतीभन्दा व्यवसायिकीकरणमा जोड दिइएको बताए ।

गाउँपालिका अध्यक्ष अर्जुन गुरुङका अनुसार आमा समूहमार्फत एक घर, एक करेसाबारीको अभियान पनि थालिएको छ । ‘बाहिरबाट आउने विषादीयुक्त तरकारीमा रोक लगाएका छौं । गाउँको तरकारी गाउँमै बिक्री हुन्छ,’ उनले भने, ‘कतिपय युवा विदेशबाट फर्केर तरकारी खेती र पशुपालनमा लागेका छन् । आमा, महिला समूह पनि सक्रिय भएर लागेका छन् ।’ गाउँपालिकामा अब बाहिरबाट तरकारी ल्याउनुपर्ने बाध्यता नरहेको र गाउँका चुल्होमा गाउँकै तरकारी पाक्ने उनले बताए ।

प्रकाशित : वैशाख ५, २०७८ ०९:५६
प्रतिक्रिया
पठाउनुहोस्

ट्र्याकमै अल्झियो करिडोर

ठेकेदार कम्पनी नै सम्पर्कविहीन भएपछि मोदीबेनी पालना ट्र्याक खोल्न ढिलाइ
अगन्धर तिवारी

पर्वत — राष्ट्रिय गौरवको आयोजना कालीगण्डकी करिडोरको आगामी २ वर्षभित्रै पर्वत खण्डको सबै सडक कालोपत्रे सक्ने लक्ष्य राखे पनि जिल्लाभित्र अझै ट्र्याक पूरा हुन सकेको छैन । ट्र्याक खुलाउने क्रममा गत चैत २५ मा कुश्मा–५ मोदीबेनीघाट नजिकै कालीगण्डकी नदी किनारमा एक्स्काभेटर खसेपछि यतिबेला काम रोकिएको छ । 

कालीगण्डकी लोकमार्गअन्तर्गतको पर्वतखण्ड पर्वतको मोदीवेणीमा ट्रयाक खोल्ने क्रममा खसेको एक्स्काभेटर ।


सुर्य कन्स्ट्रक्सनले जिम्मा लिएको सडकको ट्र्याक खुलाउने क्रममा ब्रेकरले पहरो फुटाउँदै गर्दा माथिबाट आएको ढुंगाले लागी एक्स्काभेटर खसेको थियो । आयोजना प्रमुख सुबोध देवकोटाले पर्वत खण्डमा मोदीबेनीको करिब ५ सय मिटर ट्र्याक खुल्न बाँकी रहेको बताए । वैशाखभित्रै सक्ने लक्ष्य रहेको जानकारी दिँदै उनले भने, ‘छिट्टै कालोपत्रका लागि काम अघि बढाउने योजना हो । मेसिन खसेपछि काम रोकिएको छ ।’ काम कहिले सुरु गर्ने भन्ने टुंगो लागिनसकेको उनले बताए ।

करिडोरअन्तर्गत पर्वतमा रानीपानी–फलेबास–ढिक खण्डको २३ किमि कालोपत्रका लागि ठेक्का प्रक्रिया अघि बढेको छ । कडा चट्टान फुटाउने क्रममा मेसिनसहित मान्छे खसेर दुर्घटना भएपछि बाँकी काम कसरी अघि बढाउने भन्नेमा नै अन्योलता देखिएको छ । झन्डै २ वर्षसम्म सम्पर्कविहीन भएको सूर्य कन्स्ट्रक्सनलाई सम्पर्कमा ल्याएर काममा लगाइएको आयोजना प्रमुख देवकोटाले बताए । ठेकेदार कम्पनी नै सम्पर्कविहीन भएपछि मोदीबेनी क्षेत्रको ट्र्याक खोल्न ढिलाइ भएको हो । पर्वत खण्डको ३९ किलोमिटर कालोपत्रका लागि एक अर्ब २३ करोड रुपैयाँ विनियोजन भएको छ ।

२०७५ जेठ २१ मा काम सक्ने गरी २०७३ असार २२ मा सूर्य कन्स्ट्रक्सनले सम्झौता गरेको थियो । जिम्मा लिएको १४ किमिमध्ये मोदीबेनी र फलेबास–ढिकसम्मकै केही भागको ट्र्याक अझै खोल्न सकेको छैन । कन्स्ट्रक्सनका प्रतिनिधि दीपक रैसवालले नयाँ मेसिन र चालक खोजेर काम अघि बढाइने बताए । सडकले दक्षिणका एक नगरपालिका र ३ गाउँपालिकाको बस्ती जोड्छ । २०६२ मा पर्वतको त्रिवेणी–रानीपानी–बाच्छा हुँदै रेखांकन गरिएको करिडोर २०६४ मा बागलुङतर्फ सरेको थियो । तत्कालीन मन्त्रिपरिषद्का अध्यक्ष खिलराज रेग्मीको पालामा बागलुङ पुर्‍याइएको करिडोरको पर्वतमा कालीगण्डकी लोकमार्ग नामकरण गरी शाखा विस्तार गरिएको थियो । हाल सडकको दुवै जिल्लालाई समान प्राथमिकतासाथ विस्तार गरिएको आयोजनाले जनाएको छ ।

प्रकाशित : वैशाख ५, २०७८ ०९:४९
पूरा पढ्नुहोस्
प्रतिक्रिया
पठाउनुहोस्
×