लमजुङको खुदीबाट पौने ३ लाखसहित ८ जुवाडे पक्राउ
लमजुङ — प्रहरीले उत्तरी लमजुङको मर्स्याङ्दी गाउँपालिका ३, खुदी पुरानोबजारबाट ८ जुवाडे पक्राउ गरेको छ । उनीहरुको साथबाट नगद २ लाख ७७ हजार ३ सय ६० रुपैयाँ बरामद गरेको जिल्ला प्रहरी कार्यालयका इन्स्पेक्टर ओमप्रकाश पुनले जानकारी दिए ।
उनका अनुसार शुक्रबार राति १ बजेतिर स्थानीय जंगबहादुर तामाङको घरमा जुवातास खेल्दै गरेको सूचना आएपछि प्रहरीले छापा मारेको थियो । प्रहरीले घरधनी तामाङसहित ८ जनालाई पक्राउ गरेको जनाएको छ ।
प्रहरीले लमजुङको मर्स्याङ्दी गाउँपालिका ३ खुदीका ४६ वर्षीय जंगबहादुर तामाङ (घरधनी), क्व्होलासोंथर गाउँपालिका २ का २२ वर्षीय तिलक घले, बेंसीसहर नगरपालिका ७ का २१ वर्षीय अनिल रिमाल, ४२ वर्षीय राजन सुयल, चितवनको भरतपुर महानगरपालिका १० का ४२ वर्षीय सुरेश केसी, भरतपूर महानगरपालिका ११ का ३४ वर्षीय विष्णु गिरी, गोरखाको गोरखा नगरपालिका ४ का ३१ वर्षीय सीताराम गिरी र गण्डकी गाउँपालिका २ का ३५ वर्षीय मदन पन्तलाई पक्राउ गरेको जनाएको छ ।
प्रहरीले घटनाका विषयमा थप अनुसन्धान भइरहेको जनाएको छ ।
प्रकाशित : चैत्र १४, २०७७ १७:३०