बिहीबार मनकामना केबुलकार बन्द हुने- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बिहीबार मनकामना केबुलकार बन्द हुने

रासस

काठमाडौँ — मनकामना केबुलकार सेवा बन्द हुने भएको छ । नियमित मर्मत सम्भारका लागि चैत १२ गते बिहीबार एक दिन बन्द गरिने भएको हो । 

नियमित मर्मतसम्भारका लागि मनकामना केबुलकार चैत १२ गते बिहीबार बन्द गरिने मनकामना दर्शन प्रालिका नायब महाप्रबन्धक उज्ज्वल शेरचनले जानकारी दिए । उनका अनुसार केबुलकार चैत १३ गते शुक्रबारदेखि पुनः नियमित सञ्चालनमा आउनेछ ।

लामो समय बन्द भई सञ्चालनमा आएको मनकामना मन्दिर दर्शन गर्न आउने दर्शनार्थीको सङ्ख्या बढ्दै गएका छन् । कोरोना महामारीका कारण नौ महिना बन्द रहेको केबुलकार र मनकामना मन्दिर गत मङ्सिर २८ गतेदेखि सञ्चालनमा आएको हो । केबुलकारबाहेक मोटरबाटो र पैदल हुँदै पनि दर्शनार्थी मनकामना मन्दिर पुग्ने गर्छन् ।

प्रकाशित : चैत्र १०, २०७७ १८:५२
प्रतिक्रिया
पठाउनुहोस्

कांग्रेसले चाहँदैमा नयाँ सरकार गठन हुँदैन : देउवा

प्रदीप मेन्याङ्बो

सुनसरी — कांग्रेस सभापति शेरबहादुर देउवाले वर्तमान प्रधानमन्त्री केपी शर्मा ओली नेतृत्वको सरकारसँग बहुमत भएकाले कांग्रेसले चाहदैमा नयाँ सरकार गठन नहुने बताएका छन् । 

उनले सर्वोच्च अदालतको आदेशपछि नेकपा पार्टी, एमाले र माओवादी केन्द्रमा विभाजित भए पनि पुष्पकमल दाहालले सरकारको समर्थन फिर्ता नलिएकोले बहुमतको संयुक्त सरकार नै भएको बताए ।

दलित संघ केन्द्रीय कार्यसमितिद्वारा मंगलबार धरानको चुम्लुङ हिममा आयोजित ५६ औं अन्तर्राष्ट्रिय जातीय विभेद उन्मुलनको सन्दर्भमा समावेशी लोकतन्त्र र संवैधानिक व्यवस्था विषयक प्रदेशस्तरीय अन्तरक्रियामा पूर्वप्रधानमन्त्री देउवाले कांग्रेसले सरकार नबनाउने बताएका हुन् ।

उनले भने, ‘अहिले एउटा पार्टी सरकारमा छ, त्यसलाई प्रचण्डजीको पार्टीले समर्थन गरेको छ । त्यसैले यो संयुक्त सरकार हो । संयुक्त सरकार भएकाले बहुमतको सरकार भयो । बहुमतको सरकार हुँदाहुँदै कांग्रेसले चाहदैमा नयाँ सरकार गठन हुँदैन ।’

उनले माओवादी पनि सरकारमै सामेल भएकाले कांग्रेसलाई सरकार ढाल्ने र बनाउने हतारो नभएको र कांग्रेस अहिले सरकारमा जान बल नगर्ने बताए । उनले भने, ‘तर परि आए छाड्दैन पनि ।’

उनले ओलीको बहुमतको सरकार रहेसम्म कांग्रेसले प्रतिपक्षीको भूमिकामा बसेर मुलुकभर संगठन विस्तार गर्दै जाने बताए । उक्त अवसरमा नेता देउवाले दलित संघका नेताहरुले कांग्रेसलाई भोट हाल्ने वातावरण बनाउन आग्रह गरे । उनले भने, ‘दलित आयोग गठन गर्ने काम मेरै पालामा सुरु भएको हो । दलित समुदायका नेताहरूलाई जनसम्पर्क बढाउनु जरुरी छ ।’

नेपाल दलित संघका सभापति मीन विश्वकर्माले मुलुकमा जातीय विभेदको उन्मुलन गर्ने पार्टी कांग्रेस मात्र भएको बताए । अन्तरक्रियामा नेपाल दलित संघ केन्द्रिय कार्यसमितिका पदाधिकारी, प्रदेश नं १ का १४ जिल्लाका संघका दलित अगुवा कार्यकर्ताहरूको सहभागिता रहेको छ ।

प्रकाशित : चैत्र १०, २०७७ १८:४५
पूरा पढ्नुहोस्
प्रतिक्रिया
पठाउनुहोस्
×