बालिका हत्या आरोपमा बुवासहित ३ पक्राउ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बालिका हत्या आरोपमा बुवासहित ३ पक्राउ

नारायण शर्मा

पूर्वी नवलपरासी — ६ महिने बालिकाको हत्या आरोपमा प्रहरीले बालिकाका बुवा, हजुरबुवा र हजुरआमालाई शनिबार पक्राउ गरेको छ । कावासोती नगरपालिका–४ हसौराकी सरस्वती भण्डारीले आफ्नी ६ महिने छोरीको फागुन ६ गते हत्या गरेको भन्दै गत सोमबार ससुरा, श्रीमान्, सासु र अमाजुविरुद्ध किटानी जाहेरी दिएकी थिइन् ।

प्रहरीले कारबाहीमा चासो नदिएको भन्दै शनिबार कावासोती ४ का बासिन्दाले जिल्ला प्रहरी कार्यालय अगाडि प्रदर्शनसमेत गरेका थिए । आरोपितलाई पक्राउ गरि अनुसन्धान प्रक्रिया अगाडी नबढाएको भन्दै आक्रोशित स्थानीयले शनिबार प्रहरीबिरुद्ध कार्यालयमै प्रदर्शन गरेका हुन् । स्थानीयको प्रदर्शनपछि प्रहरीले शनिबार तीन जनालाई नियन्त्रणमा लिएको हो । घरपरिवारले नियोजित रुपमा हत्या गरेको भन्दै बालिकाकी आमाले ६ दिनअघि जिल्ला प्रहरीमा किटानी जाहेरी दिए पनि प्रहरीले पक्राउ गर्न आनाकानी गरेको थियो ।

जिल्ला प्रहरीका डिएसपी दिलीपकुमार गिरीका अनुसार सरस्वतीका श्रीमान् गणेश भण्डारी, ससुरा रेशमराज भण्डारी र सासु गितामाया भण्डारीलाई नियन्त्रणमा लिएको हो । ‘किटानी जाहेरी दिने बित्तिकै पक्राउ गर्ने भन्ने हुदैन अनेक कोणबाट प्रमाण संकलन गर्ने काम भइरहेको छ,’ डिएसपी गिरीले भने, ‘तीन जनालाई प्रहरी हिरासतमा राखेर अनुसन्धान सुरु भएको छ ।’

फागुन ६ गते राति हजुरबुवासँग सुतेकी बालिकाको रहस्यमय मृत्यु भएको थियो । बालिकाकी आमा सरस्वती र स्थानीयले स्वाभाविक मृत्यु नभई उनको हत्या गरिएको दाबी गरिरहेका छन् । सरस्वतीका दाजु दुर्गा सिग्देलले बालिकालाई षड्यन्त्रपूर्वक बिष खुवाएर हत्या गरिएको आरोप लगाए । ‘प्रहरीले दुई दिनसम्म जाहेरी लिन पनि मानेन । घटना भएको दिन बच्चालाई आमासँग अलग गरेर ससुराले लिएर सुतेका थिए । बच्चाकी आमाले बिहानमात्र छोरीको मृत्यु भएको थाह पाएकी थिइन्,’ उनले भने । घरमा विभिन्न पूजाको बहानामा जडिबुटीको औषधि बनाएर खुवाएको र खुवाउन साथ बालिकाले वान्ता गरेको सिग्देलले बताए ।

सरस्वतीले छोरीको मृत्यु भएको बिहानमात्र थाह पाएको बताइन् । पूजा गरिसकेपछि देउता रिसाउने बहाना बनाई छोरीलाई आफूबाट अलग बनाएर ससुराले लिएर सुतेको उनले सुनाइन् । स्थानीयले प्रहरीले घटनाको छानबिनमा उदासिनता देखाएको भन्दै शनिबार प्रदर्शन गरेका हुन् । उनीहरुले घटनाको निष्पक्ष छानबिन गरी दोषीलाई कारबाहीको माग गरेका छन् ।

यसअघि गत जेठमा सरस्वतीले जिल्ला प्रहरीमा आफू घरेलु हिंसाको सिकार भएको भन्दै उजुरी पनि दिएकी थिइन् । प्रहरीले त्यसमा चासो नदिएको उनको आरोप छ । ‘त्यति बेला नै कारबाही भएको भए अहिले मेरो काख रित्तो हुने थिएन,’ उनले भनिन् । घटनाबारे प्रमाण केलाउने काम सुरु भएको र अनुसन्धान चाँडै निचोडमा पुग्ने डिएसपी गिरीले बताए ।

प्रकाशित : फाल्गुन १५, २०७७ २२:१०
प्रतिक्रिया
पठाउनुहोस्

प्रचण्ड-नेपालको प्रतिगमन सच्चिए होला, थारु, मधेसीको सच्चिएको छैन : महतो

मोहन बुढाऐर

काठमाडौँ — जनता समाजवादी पार्टीका नेता राजेन्द्र महतोले लामो समयदेखि मुठ्ठीभर शासकको उत्पीडनका कारण थारुहरु र नयाँ पिढीमा आक्रोशको ज्वाला दन्किरहेको बताएका छन् । ‘थारुमा दन्किरहेको उत्पीडनको यो ज्वालाले मात्रै थारुको मुक्ति गर्ने छ’, उनले भने,‘यो ज्वालालाई मुक्तिको आन्दोलन सफल नभएसम्म बचाई राख्नु पर्छ ।’ 

कैलालीको कैलारी गाउँपालिकाको हसुलिया क्षेत्रमा शनिबारदेखि सुरु थारुवान थारुहट युवा राष्ट्रिय सम्मेलनमा नेता महतोले शासकहरुले अहिलेसम्म कमैया कमलरी बनाउनमात्रै जानिराखेको बताए । ‘अधिकार, पहिचानविहीन भएकाहरु संगठित भएर अघि बढ्दा शासकहरुले दमन गर्दै आएका छन्’, उनले भने,‘अधिकार पहिचानको आन्दोलनलाई दबाउने घटनामध्येको टीकापुरको विद्रोह हो ।’ उनले टीकापुरमा षड्यन्त्रपूर्वक हिंसात्मक घटना गरी दबाइएको बताए । उनले भने,‘टीकापुर घटना होइन, एक थारु विद्रोह हो ।’ उनले उक्त विद्रोहलाई आपराधिक घटनाका नाममा शासक वर्गले थारुलाई जेल कोच्‍ने काम गरेको बताए ।

'अहिले नेकपाका प्रचण्ड र माधव नेपाल समूह प्रतिगमन सच्चिएको भनेर सहकार्यका लागि आएका छन्,' हामीले भन्यौं, तपाईंको प्रतिगमन सच्चिएको होला तर हाम्रो सच्चिएको छैन ।’ उनले केपी ओली महाराजले गरेको प्रतिगमन अदालतको फैसलाले सच्चिएर संविधान ट्र्याकमा आएको बताए । ‘अदालतको फैसलाले लोकतन्त्रको रक्षा भयो’, उनले भने, ‘तर मैले प्रचण्ड र नेपाललाई भने, तपाईंहरुले गरेको प्रतिगमन सकिएको खोई? ’

उनले प्रश्न गर्दै भनेको स्मरण गराए, 'तपाईंहरु कांग्रेस, एमाले, माओवादीले गोली चलाएर संविधान बनाएको होइन ? यही संविधान बनाउने बेलामा टीकापुरमा थारु अन्दोलन गरेको होइन ? खोई टीकापुर घटना फिर्ता लिएको ? रेशम चौधरी बाहिर आएको खोई ?’

थारु युवायुवतीले हसुलिया बजारमा रातो टिसर्टमा मार्चपास र थारुहरुले जुलुस प्रदर्शन गरेका थिए । आइतबार सकिने सम्मेलनमा देशभरका थारुहरुको प्रतिनिधिमुलक सहभागिता छ ।

प्रकाशित : फाल्गुन १५, २०७७ २२:०१
पूरा पढ्नुहोस्
प्रतिक्रिया
पठाउनुहोस्
×