क्याप्टेन शाक्यको अवस्था स्थिर
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — त्रिभुवन अन्तर्राष्ट्रिय विमानस्थल परिसरमा बुधबार बिहान भएको सौर्य एयरलाइन्सको विमान दुर्घटनामा विमान चालक मनीषरत्न शाक्य मात्रै बाँच्न सफल भएका छन् । विमान दुर्घटनामा १८ जनाको ज्यान जाँदा ‘पाइलट इन कमान्ड’ शाक्यको भने सकुशल उद्धार गरिएको थियो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![क्याप्टेन शाक्यको अवस्था स्थिर](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/manish-ratna-shakya-2472024103007-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
विमानस्थलको कोटेश्वरतर्फ रनवे ०२ बाट उडेको सौर्यको विमान बिहान ११ बजेर ११ मिनेट जाँदा दुर्घटनामा परेको थियो । त्यसको करिब २ मिनेटपछि नै विमानको अग्रभाग ठोकिएको स्थानमा पुगेर दमकलले पानी हाल्न थालिसकेको थियो । करिब २० मिनेटमा चालक शाक्यलाई उद्धार गरेर सिनामंगलस्थित काठमाडौं मेडिकल कलेज तथा शिक्षण अस्पतालको आकस्मिक कक्षमा पुर्याइएको थियो । उद्धारमा खटिएका प्रहरीका अनुसार दुर्घटनास्थलबाट उद्धार गरेको समयमा उनी बोल्न सक्ने अवस्थामा थिए । उनले त्यति बेला ‘म ठीक छु, अरूलाई हेर्नु’ भनिरहेका थिए । त्यसपछि उनलाई एम्बुलेन्समा राखेर अस्पताल लगिएको थियो ।
अस्पतालको आकस्मिक कक्षमा पुर्याउँदा पनि उनी बोल्न सक्ने अवस्थामा नै थिए । उपचारमा खटिएका एक चिकित्सकका अनुसार शाक्यको अनुहारका विभिन्न स्थानमा गहिरो चोट लागेको छ । उनको सीटी स्क्यान तथा एमआरआईमा मस्तिष्क केही सुन्निएको देखिएको छ भने मेरुदण्डको ‘एल २’ भाग भाँचिएको छ । आठौं, नवौं र दसौं करङ भाँचिएको छ ।
चिकित्सकका अनुसार शाक्यलाई सूक्ष्म निगरानीका लागि सघन उपचार कक्ष (आईसीयू) मा भर्ना गरिएको छ । ‘हामीले अब्जर्भेसन गरिरहेका छौं । अहिले उहाँको स्वास्थ्य अवस्था स्थिर छ । हालको अवस्था हेर्दा उहाँ खतरामुक्त नै हुनुहुन्छ,’ ती चिकित्सकले भने । विमानचालक शाक्यको अवस्था बुझ्न प्रधानमन्त्री केपी शर्मा ओली बुधबार साँझ काठमाडौं मेडिकल कलेज पुगेका थिए ।
![](https://assets-cdn.ekantipur.com/uploads/source/ads/900-x-100-1-0282024055738.gif)