प्रधानलाई संगीत प्रवीण पुरस्कार
काठमाडौँ — शास्त्रीय गायिका शकुन्तला प्रधानले यस वर्षको संगीत प्रवीण नरराज ढकाल पुरस्कार पाएकी छन् । ढकालको १०१ औं जन्म जयन्तीका अवसरमा बधुबार संगीत प्रवीण नरराज ढकाल स्मृति प्रतिष्ठानले राजधानीमा गरेको कार्यक्रममा प्रधानलाई पुरस्कारसहित सम्मान गरेको हो ।
पाँच दशकदेखि शास्त्रीय गायनको माध्यमबाट नेपाली सांगीतिक क्षेत्रमा पुर्याएको योगदानको कदर गर्दै प्रतिष्ठानका अध्यक्ष प्रभुराज ढकाल, संरक्षक ज्योति ढकाल तथा संगीत प्रवीण मोहनप्रसाद जोशीले प्रधानलाई दोसल्ला ओढाई सम्मान गरे । पुरस्कारका कदरपत्र र नगद २० हजार रुपैयाँ राशि छ ।
कार्यक्रममा लक्ष्मणशमशेर प्रतिभा संगीत पुरस्कार सितारवादक धु्रवेशचन्द्र रेग्मी र तबलावादक सरिता मिश्रले पाए । दुवैलाई सम्मानपत्रसहित जनही १० हजार रुपैयाँ राशि प्रदान गरिएको थियो ।
कार्यक्रममा संविधानविद् भीमार्जुन आचार्य, जोशी, सम्मानित प्रधान तथा रेग्मीलगायतकाले संगीत प्रवीण ढकालको शास्त्रीय संगीतमा योगदानको चर्चा गरे । जोशीले ढकाललाई शास्त्रीय संगीतको विश्व विद्यालयका रूपमा स्मरण गरे ।
शास्त्रीय संगीतको पर्यायका रूपमा रहेका नरराज ढकालले सात दशक शास्त्रीय संगीत साधना गरेका थिए । शास्त्रीय संगीतलाई उनले नेपालमा बलियो स्तम्भ खडा गरेर नयाँ पुस्तामा विस्तार गर्न र औपचारिक अध्ययनका लागि सोही विषयमा दुई पुस्तकसमेत लेखेका थिए । उनको स्मरणमा परिवार तथा संगीतप्रेमीहरुको पहलमा एक दशकअघि प्रतिष्ठान स्थापना गरिएको हो ।
प्रकाशित : मंसिर १५, २०७८ २०:२२
