विमल निभाको ‘डेगेन्द्र राजवंशीको आत्महत्या’सार्वजनिक

चितवनमा सम्पन्न हुन लागेको एमालेको दशौं राष्ट्रिय महाधिवेशनको पूर्वसन्ध्यामा कवि निभाले एमालेको राजनीतिमा खासै चर्चा नगरिने घटनालाई विम्ब बनाएर कविताका माध्यमबाट पुनः बहस आमन्त्रण गरेका छन् । निभाले डेगेन्द्र राजवंशीको आत्महत्यालाई ‘नृशंसतापूर्वक’ गरिएको ‘आत्महत्यात्मक हत्या’ भनेका छन् । कवितामार्फत कवि भन्छन्–

"कम्युनिस्ट पार्टीको त्यो हेडक्वार्टरमा

जहाँ कमरेड डेगेन्द्र राजवंशीको

आत्महत्यात्मक हत्या भएको थियो नृशंसतापूर्वक

त्यहाँ बिहानैदेखि नै

पोलिट्ब्युरोको मिटिङ भइरहने गर्छ प्रतिदिन

र, पार्टी अध्यक्ष, उपाध्यक्ष, महासचिव, उपमहासचिव,

र, स्थायी कमिटीका मेम्बरहरु

गरिब, दुःखी र सर्वहाराहरुका

सम्पूर्ण पक्षमा गर्ने गर्छन्

निरन्तर लामा–लामा

अलौकिक बहस, छलफल र वार्ता !"

‘आलुबखडाको बोटमा जुन दिन डेगेन्द्र राजवंशी पासो लागे, त्यो दिन नेपालको कम्युनिस्ट आन्दोलनले पनि एक किस्ता मृत्यु बेहोर्‍यो,’ नयाँ कविता सङ्ग्रहका सन्दर्भमा प्रकाशन संस्था ‘बेला पब्लिकेसन्स’का सम्पादक विनोदविक्रम केसीले भने, ‘अविराम उही आन्दोलनको अंश रहेका कवि विमल निभालाई दारुण विम्बका हैसियतले डेगेन्द्रले सदैव आलो रहने शोक दिए, यो कविता सङ्ग्रह डेगेन्द्रकै नाममा सचोट र सआक्रोश समर्पित छ ।’

निभाका यसअघि तीन कविता सङ्ग्रह– ‘आगोनेर उभिएको मानिस’, ‘एउटा बाहुला नभएको बुसर्ट’, ‘जोकरको बन्दुक’ र दुई व्यंग्य निबन्ध संग्रह ‘चौथो कालम’ र ‘डाइनोसोर जिउँदो छ’ प्रकाशित छन् । उनले नेपालका प्रमुख पत्रिकाहरुमा लामो समयदेखि व्यंग्य स्तम्भ पनि लेख्दै आएका छन् ।