इङ्नामलाई मदन, थापालाई जगदम्बाश्री

लेखक इङ्नामको अनुसन्धानमूलक पुस्तक ‘लिम्बूवानको ऐतिहासिक दस्ताबेज संग्रह संवत् १७१९–२०२०’ का लागि पुरस्कार दिइएको हो । त्यस्तै नृत्यशास्त्री थापालाई ६ दशकभन्दा बढी नेपाली नृत्यमा गरेको योगदानका लागि जगदम्बाश्री हस्तान्तरण गरिएको हो ।

गुठी अध्यक्ष दीक्षितले इङ्नामको कृतिले नेपाल बुझ्ने फरक सामग्री दिएको र थापाले नेपाली नृत्य विधालाई उचाइमा पुर्‍याउनका लागि गरेको अध्ययन, अनुसन्धान र प्रयोगात्मक ज्ञान नेपालीका निम्ति अविस्मरणीय रहेको बताए । सम्मान ग्रहण गर्दै इङ्नामले मदन पुरस्कार पाउँदा लिम्बूवानको इतिहास अनुमोदन गरेको महसुस भएको बताए ।

पुस्तकबाट आफू मात्र नभई पुस्तकमा परेका अभिलेखहरू उपलब्ध गराउने सबै जना सम्मानित भएको भनाइ उनले राखे । यसले अन्य ऐतिहासिक कागजात खोज–अनुसन्धानकर्तालाई प्रेरणा दिने उनको भनाइ छ । सम्मानित भएपछि नृत्यशास्त्री थापाले आफ्नो कामको मूल्यांकन भएको भन्दै खुसी व्यक्त गरे । राज्यले नगरेको मूल्यांकन मदन पुरस्कार गुठीले गरेको भनाइ उनको थियो ।

समारोहमा ऋतु संस्कृतिबारे इतिहासकार गौतमव्रज वज्राचार्यले अमेरिकाबाट भर्चुअल रूपमा विद्वत् प्रवचन प्रस्तुत गरेका थिए । प्रवचनमा नेवार संस्कृति र वैदिक साहित्यमाथि प्रकाश पारिएको थियो ।