एकै मञ्चबाट दुई मुक्तक संग्रह सार्वजनिक
काठमाडौँ — काभ्रेको पनौतीमा दुई स्रष्टाको छुट्टाछुट्टै मुक्तक संग्रह एउटै मञ्जबाट सार्वजनिक गरिएको छ । प्रदीप सापकोटाको 'मनको वारपार' र पूर्णबहादुर श्रेष्ठ 'हृदयङकृत'का 'पूर्णपात्र' मुक्तक संग्रह एउटै मञ्चबाट सार्वजनिक भएको हो ।
पनौती नगरपालिकाका नगर प्रमुख भीम न्यौपाने, साहित्यकार मोहन दुवाल, लेखप्रसाद निरौला, सूर्यप्रसाद लाकोजूलगायतले मुक्तक संग्रहहरू लोकार्पण गरे ।
दुवै मुक्तकमा समसामयिक समाज, राजनीतिक विसंगति, सांस्कृतिक ह्रास र प्रेम-प्रणयलाई केन्द्र बनाइएको छ । सरल र सम्प्रेष्य भाषामा चतुष्पदी (चार लाइन) शैलीलाई दुवै मुक्तककारले अपनाएका छन् ।
मुक्तक संग्रहहरू 'समकालीन साहित्य प्रतिष्ठान, बेलायत' ले प्रकासित गरेको हो । सापकोटाको यसअघि 'यात्राका इन्द्रेणी रंग' नामक यात्रा-संस्मरण प्रकाशित छ भने पूर्णबहादुर श्रेष्ठको यो पहिलो पुस्तक हो ।
प्रकाशित : कार्तिक ७, २०७८ १६:४६
