सरकारले बाल प्रज्ञा प्रतिष्ठान स्थापना गर्ने- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

सरकारले बाल प्रज्ञा प्रतिष्ठान स्थापना गर्ने

कान्तिपुर संवाददाता

काठमाडौँ — सरकारले बाल प्रज्ञा प्रतिष्ठान स्थापना गर्ने भएको छ । आर्थिक वर्ष २०७८/७९ को बजेट सार्वजनिक गर्दै अर्थमन्त्री विष्णु पौडेलले बालबालिकाको बौद्धिक साहित्यिक सिर्जनशील क्षमताको विकास गर्न प्रतिष्ठान स्थापना गर्ने बताएका हुन् । 

नेपाली साहित्य, संगीत तथा ललितकला क्षेत्रको विकासको लागि देशमा नेपाल ललितकला प्रज्ञा प्रतिष्ठान, नेपाल संगीत तथा नाट्य प्रतिष्ठान र नेपाल ललितकला प्रज्ञाप्रतिष्ठान स्थापना भएका छन् ।

सरकारले बाल प्रज्ञा प्रतिष्ठानको स्थापनासँगै हाल रहेका तीन प्रतिष्ठानको विकासको लागि काठमाडौंमा नै प्रज्ञाग्राम बनाउने योजना बनाएको छ ।

त्यस्तै अर्थमन्त्री पौडेलले विभिन्न जातजाति एवम् भाषाभाषीको रहनसहन, रीतिरिवाज, कला, संस्कृति र परम्परा झल्कने गरी काठमाडौंको कीर्तिपुरमा निर्माणाधीन राष्ट्रिय साँस्कृतिक संग्रहालय २ वर्षभित्र सम्पन्न गरिने बताए ।

त्यस्तै प्रदेश सरकारको समन्वय र सहकार्यमा प्रत्येक प्रदेशमा प्रादेशिक संग्रहालयको स्थापना र विकास गरिने पनि उनले बताए ।

प्रकाशित : जेष्ठ १६, २०७८ ०९:२६
प्रतिक्रिया
पठाउनुहोस्

नहरको विकल्प ‘स्प्रिङकल’

कान्तिपुर संवाददाता

रुकुम पश्चिम — मुसीकोट नगरपालिका–६ मैलचौरका अनिल बुढाले व्यावसायिक कागती र टिमुरखेती गरेका छन् । उनका छिमेकी रत्नबहादुर बुढा पनि व्यावसायिक तरकारी उत्पादक किसान हुन् । दुवैले ‘स्प्रिङकल’ मार्फत बारीमा सिँचाइ सुविधा पुर्‍याएका छन् । 

रुकुम पश्चिमको मुसीकोट–६ मेलचौरमा स्प्रिङकलमार्फत सिँचाइ गरिँदै। तस्बिर : कान्तिपुर

उनीहरू मात्र होइन, मेलचौरसहित आसपासका गाउँका किसानले वैकल्पिक विधि प्रयोग गरी सिँचाइ गरिरहेका छन् । मेलचौरमा खाद्यान्न बाली, तरकारी र फलफूलमा ‘स्प्रिङकल’ को विकल्प छैन । ‘गाउँ नजिकै पानी छ, खोला पनि निरन्तर बग्छ,’ स्थानीय मिलन बोहराले भने, ‘अन्य विकल्प नहुँदा स्प्रिङकलबाटै खेती चलिरहेको छ ।’ २०७३ सम्म नहर तथा कुलोबाटै सिँचाइ गरिरहेका मेलचौरवासीले त्यसयता ‘स्प्रिङकल’ प्रयोग गरिरहेका हुन् ।

सडक निर्माणका क्रममा नहर भत्किएपछि किसानका लागि ‘स्प्रिङकल’ को विकल्प भएन । नहर भत्केपछि र गाउँमा आउने पानाखोलाको पानी अन्यत्रै लगिएपछि सिँचाइ असुविधा भएको बुढाले बताए । उक्त मुहानको पानी जिल्ला सदरमुकाम मुसीकोटमा खानेपानीका लागि ल्याइएको छ ।

मेलचौर र आपासका गाउँका बासिन्दा पछिल्लो समय व्यावसायिक तरकारी र फलफूल खेतीमा आकर्षित भएका छन् । ‘घरघरमा आफ्नै लगानीमा फरकफरक स्प्रिङकल प्रयोग भइरहेको छ,’ उनले भने, ‘खानेपानीका लागि ठूलो पाइपमार्फत अन्यत्र पानी लगिए पनि व्यवस्थित तबरले ड्याम बाँधेर सिँचाइको पानी प्रयोग गरिरहेका छौं ।’ स्प्रिङकलमार्फत सिँचाइ गर्दा धेरै समय खर्च हुने उनको गुनासो छ ।


प्रकाशित : जेष्ठ १६, २०७८ ०९:२१
पूरा पढ्नुहोस्
प्रतिक्रिया
पठाउनुहोस्
×