गायक बस्नेत र संगीतकार गुरुङ सम्मानित
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — गायक कुमार बस्नेत र संगीतकार प्रकाश गुरुङ सम्मानित भएका छन् । 'भक्तराज आचार्य राष्ट्रिय संगीत सम्मान २०७७' बाट उनीहरु सम्मानित भएका हुन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![गायक बस्नेत र संगीतकार गुरुङ सम्मानित](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/entertainment/1646881061308267123239922440822661852207445n-2832021045719-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
शनिबार काठमाडौंमा आयोजित कार्यक्रममा शिरोमणि भक्तराज आचार्यले, भक्तराज आचार्य संगीत प्रतिष्ठानको तर्फबाट दुवैजनालाई नगद ५० हजार एक रुपैयाँसहित सम्मान गरेका हुन् ।
कार्यक्रममा कुमार बस्नेतले संगीत क्षेत्रमा रोयल्टीको समस्या रहेको बताए । संगीतकार लक्ष्मण शेष रोयल्टीको यसै समस्याको समाधानका लागि स्रष्टाहरु कानुनी प्रक्रियामा जान तयार रहेको बताए । 'गीत संगीतको क्षेत्रमा केही धमिराहरु, माफियाहरु र केही फटाहाहरुले स्रष्टालाई जानकारी नदिइ उनीहरुले गाएका गीतहरु विश्वका सयौं पोर्टलमा बेचेर स्रष्टालाई शोषण गरिरहेको अवस्था छ । अहिले हामी केही स्रष्टाहरु मिलेर यो शोषणविरुद्ध कानुनी प्रक्रियामा अगाडि बढ्ने तयारीमा छौं । राजन इसान र प्रमोद खरेलले मुद्दा दर्ता गरेर कानुनी प्रकृया अगाडि बढाइसकेका छन्,' उनले भने ।
म्यूजिक कम्पनीहरुले वर्षको एक पटक सम्मान दिएर स्रष्टालाई रोयल्टीबारे नबोल्न लोभ्याइरहेको उनी बताउँछन् । 'स्वच्छ मनले गरेको भक्तराज आचार्यलगायतको अन्य सम्मान लिँदा हुन्छ । तर माफियाले वर्षको एक पटक सम्मान दिएर स्रष्टाको मुख थुनिदिने प्रयास गरेको छ,' शेषले भने, 'त्यस्ता शोषकहरुले फकाउन गरेको सम्मानलाई स्रष्टाले बहिष्कार गर्नुपर्छ । तपाईंले आँट गर्नुभयो भने रोयल्टीको यो विवाद समाधान हुन्छ ।'
कार्यक्रममा गायक स्वरुपराज आचार्य, सत्यराज आचार्य र रञ्जित नेपालीले सांगीतिक प्रस्तुति दिए ।
कार्यक्रममा गायक प्रमोद खरेल, निर्देशक प्रकाश आङ्देम्बेलगायतको उपस्थिति थियो ।
![](https://assets-cdn.ekantipur.com/uploads/source/ads/900-x-100-1-0282024055738.gif)