प्रेमबहादुर बोहराको ‘कोग्ले’ सार्वजनिक

शुक्रबार प्रदर्शनीमार्गस्थित भृकुटीमण्डपमा बोहरासहित लेखक राधा पौडेल, राजनीतिविज्ञ प्रशान्त सिंह, कवि प्रणिका कोयूलगायतले संयुक्त रुपमा कृति विमोचन गरेका हुन् । कृतिमा बोहराले आफ्नो बाल्यकालदेखि यौवनकालसम्मका संस्मरणका माध्यममा सिंगो कर्णालीको अवस्थालाई चित्रण गरेका छन् ।

कृतिमा उनका बाल्यकालका रमाइला किस्साहरु, अध्ययनको संघर्ष, सहरबाट हेर्दा कर्णालीको चित्र तथा उनको अन्तरमनले अथ्र्याएको कर्णालीको रुप चित्रण भएका छन् । कृतिलाई आफूले जन्मभूमिमा भोगेका भोगाइहरु संकलित गर्दै जनमासमा पुऱ्याउन पुस्तक लेख्नुपर्छ भनी देखेको सपनाको दस्तावेजका रुपमा रहेको लेखक बोहराले बताए ।

पुस्तक लेख्नका लागि आएका गाउँका पीडा, पात्रहरुलाई धन्यवाद दिँदै उनले भने,‘म जन्मिँदै विशेष बनाई सामान्य कुरा पाउन पनि ठूलो भोगाई, कष्टको स्थिति सिर्जना गरिदिने नेपाल राज्यलाई दु:ख व्यक्त गरुँ या खुसी, म यसमा अन्यौल नै छु ।’ पुस्तकका रुपमा जति पनि आफ्ना भोगाइहरु आउन परिस्थिति बनाउने सबै पात्र तथा राज्यलाई उनले विशेष धन्यवाद दिए ।

कृतिबारे बोल्दै लेखक पौडेलले राज्यले कर्णालीलाई गरेको विभेद, अपहेलना र राजनीतिक दस्तावेजका रुपमा यस पुस्तक रहने दाबी गरिन् । उनले भनिन्,‘गरिबका कुरा गरेर, पीडा सुनाएर विकासे कुरा गर्ने आम मानिस तथा संस्थाको लागि यो पुस्तक गतिलो थप्पड हो ।’

यसमा कर्णालीप्रतिको सिंगो हेपाइ तथा आम कर्णालीबासीको भोगाइ रहेकाले मानवशास्त्र तथा समाजशास्त्रका विद्यार्थीहरुलाई हाम्रो विश्वविद्यालयले पाठ्यक्रममा राखेर यस पुस्तक अनिवार्य रुपमा पढाउनैपर्ने उनले बताइन् ।