इजरायली युद्धको विरूद्धमा

किनकि

फुल्नै नपाई टिपिनुभन्दा

फूल नरोप्नु कम अपराध लाग्छ मलाई ।

जब कलिला रहर बोकेर

दौडिरहेका बच्चाहरु भुटिन्छन् बारूदमा

तब त्यागिदिन्छु संसर्गको मोह

किनकि

मान्छे मारिनुभन्दा

मान्छे नजन्माउनु कम अपराध लाग्छ मलाई

फूलको शिर बोकेर मन्दिर धाउने भक्तहरु

मानिसका सुन्दर बस्ती ताकेर बम फाल्ने खेलाडीहरु

यी दुवैका विरूद्धमा म

सुकाइदिन्छु आफ्नै रजस्वला

भत्काइदिन्छु आफ्नै पाठेघर

र, यो संसारलाई यहीं रोकिदिन्छु

किनकि,

मन्दिरमा ओइलाएको फूल देख्नुभन्दा

युद्धमा रोइरहेका नानीहरु देख्नुभन्दा

यो चलिरहेको संसार ठप्प रोक्नु

कम अपराध लाग्छ मलाई ।