बिगबोसमा प्रतिस्पर्धीबीच धक्कामुक्की र तोडफोड- मनोरञ्जन - कान्तिपुर समाचार

बिगबोसमा प्रतिस्पर्धीबीच धक्कामुक्की र तोडफोड

एजेन्सी

मुम्बई — भारतीय चर्चित रियालिटी शो बिगबोसको १५ सिजन यसै साता सुरु भयो । यसपटकको सिजनमा चर्चित सेलिब्रीटी करन कुन्द्रादेखि अभिनेता जय भानुसालीसम्म छन् । करन र जयको प्रवेशले पनि यसपटकको बिगबोसलाई थप आकर्षक बनाएको बताइन्छ ।

तर तीन दिनमै बिगबोसको घरभित्र एउटा यस्तो झगडा भयो जसले बिगबोस १३ मा भएको सिद्धार्थ शुक्ला र आसिम रियाजबीचको झगडालाई पनि बिर्साइदिएको छ । बिगबोसले सबै प्रतिष्पर्धीलाई 'जंगलवासी' नामको प्रतिस्पर्धात्मक खेल दिएको थियो ।

जहाँ जय भानुसाली र प्रतीक सेहजपालबीच नराम्ररी झगडा भएको हो । यस क्रममा प्रतीकले बिगबोसको सीसा नै फुटाइदिएका छन् । दुई जनाबीच भनाभन र धक्कामुक्की समेत भयो । बिगबोसले उनीहरुलाई एउटा नक्सा दिएको थियो । प्रतीकले चोर्ने र लुकाउने प्रयास गरेपछि दुई जनाबीच विवाद गहिरिएको हो ।

यस क्रममा बिगबोसका अरु प्रतिष्पर्धीलाई जय र प्रतीकलाई सम्हाल्न र सम्झाउन नै मुस्किल भयो । आक्रामक बनेका प्रतीकलाई करन कुन्द्रासहित अरु प्रतिष्पर्धीले निकै मेहनतसाथ सम्हाल्नु परेको थियो । प्रतीकले भने जयले आफ्नो निजी मामिला जोडेर गाली गरेपछि आफू रिसाएको प्रतिक्रिया साथीहरुलाई दिएका थिए ।

सुरुको दिनदेखि नै उनीहरुबीच मनमुटाब थियो । बिगबोसमा यस्ता झगडा सामान्य नै मानिन्छन् । तर बिगबोसको सम्पत्ति नै तोडफोड गर्नेलाई आयोजकले कडा कारबाही गर्नसक्छ । यसअघि बिगबोस १३ मा पनि सिद्धार्थ शुक्ला र आसिम रियाजबीचको झगडाले उग्र रुप लिँदा निर्णय सुनाउन सञ्चालकलाई नै मुस्किल भएको थियो । पछिल्लो झगडामा जय र प्रतीकमध्ये को दोषी थियो त ? वा दोषीलाई कस्तो कारबाही गरिएला भन्नेबारे निर्णय शुक्रबार राति मात्रै कार्यक्रमका सञ्चालक सलमान खानले सुनाउनेछन् ।

प्रकाशित : आश्विन २१, २०७८ १४:२७
प्रतिक्रिया
पठाउनुहोस्

ईपीएल : भैरहवाद्वारा पोखरालाई १ सय २० रनको लक्ष्य

विनोद पाण्डे

काठमाडौँ — भैरहवा ग्लाडियटर्सले बजाज पल्सर एभरेष्ट प्रिमियर लिग (ईपीएल) क्रिकेटको क्वालिफायर्स १ मा पोखरा राइनोजलाई १ सय २० रनको लक्ष्य दिएको छ । पोखराले टस जितेपछि ब्याटिङको निम्तो पाएको भैरहवाले निर्धारित २० ओभरमा ६ विकेट गुमाइ १ सय १९ रनमात्र बनाउन सक्यो ।

पोखराले सुरुआत मै दुई क्याच फुत्काए पनि भैरहवाले त्यसको फाइदा उठाउन सकेन । रोहित पौडेलले खेलको दोस्रो बलमै गरेको प्रहार विपिन रावलले फुत्काउन पुगेका थिए । ओपनिङ ब्याटिङमा आएका रोहित १७ बलमा २ छक्का प्रहार गर्दै १८ रनमै आउट भए ।

बंगलादेशका ब्याटर तामिम इकबाल बिनै खेलेको भैरहवाका अर्का ओपनर प्रदीप ऐरी १० रनमा आउट भए । श्रीलंकाका उपुल थाराङ्गाले १२ बलमा १० रनमात्र बनाउन सके । मलेसियाका सर्भिन मुनिआन्डी ३ र कुशल मल्ल १ रनमै आउट भएपछि भैरहवा १० औं ओभरमा ५१–५ को नाजुक स्थितिमा पुगेको थियो ।

कप्तान शरद भेषावकर र आरिफ शेखले स्थिति सुधार्ने प्रयास गरेका थिए । आरिफले २४ बल खेली १ चौका र १ छक्का प्रहार गरी २७ रन बनाए । शरद ३३ बलमा २ चौका र १ छक्का प्रहार गरी ३२ रन तथा धम्मिका प्रसाद ६ बलमा ४ रन बनाई अविजित रहे ।

यो खेल जित्ने टोली फाइनल पुग्ने छ । चितवन टाइगर्स यसअघि नै फाइनलमा सुरक्षित भइसकेको छ । अघिल्लो दिन क्वालिफायर्समा चितवनले पोखरालाई ९ विकेटले पराजित गरेको थियो । प्रतियोगिताको अपराजित टोली भैरहवाले बुधबारकै खेलमा काठमाडौं किंग्स ११ लाई १६ रनले पराजित गरेको थियो ।

प्रकाशित : आश्विन २१, २०७८ १४:१६
पूरा पढ्नुहोस्
प्रतिक्रिया
पठाउनुहोस्
×