सुनील सेट्टीका छोरा 'तडप'बाट डेब्यू गर्दै- मनोरञ्जन - कान्तिपुर समाचार

सुनील सेट्टीका छोरा 'तडप'बाट डेब्यू गर्दै

कान्तिपुर संवाददाता

अभिनेता सुनील सेट्टीका छोरा आहन सेट्टी फिल्म 'तडप'मार्फत डेब्यू गर्दैछन् । मंगलबार फिल्मको पोस्टर सार्वजनिक भएको छ ।

पोस्टर सार्वजनिक भएसँगै 'स्टारकिड'लाई बधाई दिनेको ओइरो लागेको छ । अभिनेता अजय देवगनले इन्स्टाग्राममा सुनीललाई बधाई दिँदै पोस्टर सेयर गरेका छन् । 'आहन यति छिट्टै हुर्कियो, यो एकदम इमोसनल कुरा हो,' अभिनेता देवगनले लेखेका छन्,'हृदयदेखि नै बधाई छ सुनिल सेट्टी, छोराको पहिलो फिल्मका लागि ।'

मिलन लुथरियाले निर्देशन गर्ने फिल्ममा अहानसँगै फिल्ममा तारा सुतारियाको पनि अभिनय रहनेछ । यो फिल्म सेप्टेम्बर २४ मा फिल्म हलमा प्रदर्शनमा आउँदैछ ।

प्रकाशित : फाल्गुन १८, २०७७ १४:०९
प्रतिक्रिया
पठाउनुहोस्

सरकारसँग वार्ताका लागि चन्द समूहले बनायो प्रकाण्डको नेतृत्वमा टोली

बबिता शर्मा

काठमाडौँ — सरकारसँग वार्ताका लागि नेत्रविक्रम चन्द समूहले प्रवक्ता खड्गबहादुर विश्वकर्मा 'प्रकाण्ड' र उदय चलाउने 'दीपक'को नेतृत्वमा दुई सदस्यीय टोली गठन गरेको छ ।

चन्द समूहद्वारा सरकारसँग वार्ताका लागि केही दिनअघि नै टोली गठन गरिए पनि सार्वजनिक गरिएको थिएन । वार्ताका लागि जेलमा रहेका नेताकार्यकर्ता रिहा र हतियारसम्बन्धी मुद्दा फिर्ता गर्नुपर्ने पहिलो सर्त रहेको चन्द समूहका एक नेताले इकान्तिपुरलाई बताए । त्यस्तै सरकारले पार्टीमाथि लगाएको प्रतिबन्ध पनि फुकुवा हुनुपर्ने उनले बताए । ती नेताका अनुसार तत्कालै वार्ता टोलीको बैठक बसेर सरकारसँगको वार्ताका लागि एजेन्डा तय गरिनेछ । नेकपाका महासचिव नेत्रविक्रम चन्दले मंगलबार दिउँसो विज्ञप्ति जारी गरी सरकारसँग वार्ता गर्ने टोली गठन गरिएको जनाएको छन् ।

सरकारले पनि मंगलबार मात्रै चन्द समूहसँग वार्ताका लागि गृहमन्त्री रामबहादुर थापाको नेतृत्वमा दुई सदस्यीय टोली गठन गरेको छ । वार्ता टोलीमा प्रधानमन्त्री केपी शर्मा ओलीका परराष्ट्र मामिला सल्लाहकार राजन भट्टराई सदस्य छन् ।

मंगलबार सरकारका प्रवक्तासमेत रहेका सञ्चारमन्त्री पार्वत गुरुङले चन्द समूहले पनि वार्ता टोली गठन गरे चाँडै वार्ता हुने बताएका थिए । उनले हतियार मुद्दालगायतका विषय वार्ताबाटै टुंगो लगाइने पनि जानकारी दिएका थिए ।

चन्दद्वारा जारी विज्ञप्तिमा भनिएको छ,'नेपाल सरकारसँग देशका राजनीतिक,आर्थिक र राष्ट्रिय स्वाधीनताका विषयमा वार्तामा बस्न हाम्रो जनप्रिय पार्टी नेपाल कम्युनिष्ट पार्टी सहमत भएको छ ।'


सरकारले चन्द नेतृत्वको नेकपामाथि ०७५ फागुन २८ मा प्रतिबन्ध लगाउने निर्णय गरेको थियो । झन्डै २० महिनाअगाडि सरकारले चन्दसहितका सशस्त्र समूहसँग छलफलका लागि सोमप्रसाद पाण्डे संयोजक, सुरेश आलेमगर र लीला भण्डारी सदस्य रहेको वार्ता समिति बनाएको थियो । तर, चन्द समूह आउन नमानेपछि ६ महिनामै सरकारी वार्ता टोली भंग भएको थियो ।

प्रकाशित : फाल्गुन १८, २०७७ १३:४३
पूरा पढ्नुहोस्
प्रतिक्रिया
पठाउनुहोस्
×