डान्सिङ स्टार्स नेपालकी विजेता सुमी भन्छिन् : 'म अकस्मात अभिनेत्री भएँ'- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

डान्सिङ स्टार्स नेपालकी विजेता सुमी भन्छिन् : 'म अकस्मात अभिनेत्री भएँ'

रीना मोक्तान

काठमाडौँ — गायिका ज्योति मगर, बुद्ध लामा, हरि खड्का, फुलेन्देकी आमा(उमेश राई), प्रशान्त ताम्राकार दर्शकमा पहिल्यै चर्चित । 'डान्सिङ स्टार्स नेपाल'को मञ्चमा उनीहरुलाई देख्दा अभिनेत्री सुमी मोक्तानलाई लाग्यो,'म चलेको कलाकार होइन । यहाँ मेरो परिचयले मेरो नृत्यलाई दर्शकले याद गर्ने छैनन् । अब नृत्यबाटै नयाँ पहिचान बनाउँछु ।' 

प्रस्तुति दमदार भयो भने उपस्थित १२ मध्ये आफ्नो जोडी नोटिसमा परिन्छ । नत्र नाच्नलाई नाचेको मात्र देखिन्छ भन्ने सुमीले सोचिन् । त्यसैले उनी केही फरक नृत्य पस्कन चाहन्थिन् । र, जोडी पाइन् उस्तै सोच मिल्ने भिजु पार्की । त्यसपछि दुईले नयाँ शैलीको नृत्यसहित स्टन्ट गर्ने निर्णय गरे ।

मञ्चमा 'सुभिजु'को उपनाम पाएका दुईले पहिलो प्रस्तुतिमै कन्टेम्परोरी शैलीमा नृत्य देखाए । तीन निर्णायकले त उठेरै(स्ट्यान्डिङ ओभियसन) नृत्यको तारिफ गरे । यसरी सुरु भएको यात्रामा सुभिजुले नृत्यका फरक-फरक शैलीहरु पस्के । कहिले झुन्डिँदै एरियल त कहिले एरम्याटमा स्टन्टसहितको नृत्य । मञ्चमा पानी पार्नेदेखि आगो बालेरै प्रस्तुति दिए । दुईको यो मेहनत र सहकार्यले 'डान्सिङ स्टार्स नेपाल'को इतिहास रच्यो । उनी दुई प्रतियोगिताका पहिलो विजेता घोषित भए । दुवैले थप परिचय पाए । 'डान्सका नयाँ शैलीहरु गर्न निकै गाह्रो हुन्थ्यो । सायद दर्शकले हाम्रो दु:ख बुझ्नुभयो र साथ दिनुभयो । चर्चित कलाकारबीच हामी विजेता भयौं,' सुमीले जितको खुसी बाँडिन्,'खुसी सँगसँगै मैले गरेको दु:खले न्याय पायो भन्ने अनुभव हुँदो रहेछ । एकदमै खुसी छु ।'

तस्बिरहरु : दिपेन्द्र राेक्का/कान्तिपुर

प्रतियोगितामा आउनुअघि सामान्य नाच्ने गर्थिन् सुमी । 'नन डान्सर' नै थिइन् । मञ्चमा नृत्य गरेको खासै अनुभव थिएन । म्युजिक भिडियो र फिल्ममा एउटा स्टेप सक्नासाथ 'कट' हुन्छ । 'एक्सन कट' हुने गीतमा नृत्य गर्दै आएकी उनलाई प्रतियोगिताले व्यावसायिक डान्सर बनायो ।

'कम्मर मर्काउने त होला । सामान्य नृत्य गर्न सकिहालिन्छ नि,'प्रतियोगिताको सुरुवातमा यस्तै सोच्थिन् उनी । तर, सोचेजस्तो सजिलो पाइनन् नृत्यलाई ।

'मञ्चमा कन्टेम्परोरी, ल्याटिन शैलीको डान्स गरें । त्यो भनेको मेरो शरीरको लागि एकदमै नयाँ शैली हो । त्यो सँगसँगै स्टन्टदेखि एरियल र एयरम्याटलाई समावेश गरेर २ मिनेटभित्रमा नाच्नुपर्दा खेरी गाह्रो भयो,'अनुभव सुनाइन्,'मैले पहिला कहिल्यै नगरेको शैली हो कन्टेम्परोरी । यसअघि व्यावसायिक रुपले डान्स सिकेको थिएन । त्यही नसिकेको भएर चुनौती थियो । तर यो ६ महिनामा मैले जे जति गर्न सकें, राम्रो दिन सकें भन्ने लागेको छ ।'

सुरुवातका दिनमा हप्तामा एक पटक नृत्य गर्नुपर्थ्यो । तर हप्तामा दुई पटक नृत्य गर्नु चुनौतीपूर्ण बन्दै गयो । एउटा गीतमा नृत्य अभ्यास गर्न २ दिन पाउँथे । थोरै समयमा नृत्य गर्नु कोरियोग्राफर भिजुका लागि ठूलो कुरा थिएन । तर, आफ्ना लागि निकै कठिन भएको सुमी सुनाउँछिन् । 'स्टन्ट निकै गाह्रै थियो । मेरा लागि नेक हुक स्टन्टमध्येकै गाह्रो थियो । किनकि त्यसका लागि म तालिम प्राप्त थिइनँ,' उनी सुनाउँछिन्,'आगोको एक्टमा अभ्यास गर्दा जतिको आगो बलेको थियो, प्रस्तुतिको बीच एकदमै धेरै आगो बल्यो । मन कामेको थियो । तर हामीले नृत्य बीचमै रोकेनौं ।'

पानीको स्टन्ट उस्तै गाह्रो थियो । मानसिक तनावसँगै भौतिक रुपले थकान हुन्थ्यो । 'के दिन के रात थाहै हुन्थेन । बिहान बेलुका अभ्यासमै हुन्थ्यौं । ५ घण्टा लगातार अभ्यास गरिसकेपछि ब्रेकमा फेरि त्यही गीत सुनिरहेका हुन्थ्यौं । ६ महिना सोसल लाइफ थिएन,' सुमीले भनिन् ।

पहिलो प्रस्तुतिबाट उनी दुईबाट निर्णायकले केही नयाँ गर्छन् भन्ने अपेक्षा राख्न थाले । दुवैलाई पनि नयाँ शैली गर्नुपर्छ भन्ने चुनौती थपियो । 'भिजुले पनि मबाट धेरै अपेक्षा गर्थ्यो । स्टन्ट गर्नुअघि उ भन्थ्यो सकिहाल्छ नि तर मलाई निकै गाह्रो हुन्थ्यो । त्यही कुरामा झगडा पर्यो् धेरै पटक,' सुमीले सुरुवातका दिन सम्झिन् । डान्समा नयाँ-नयाँ स्टन्ट गर्न आँटले साथ दियो उनलाई । 'आँटैले त्यो स्टन्ट मैले गरें । एरियलकै कुरा गरौं, मान्छेले हेर्दा झुन्डेको त हो नि भन्छ । तर गर्नेले त्यसको खास अर्थ बुझ्छ । ८० प्रतिशत आँटले नै मलाई त्यहाँ पुर्या एको हो ।'

सुमी आफूलाई कोरियोग्राफर पनि राम्रो जुरेको बताउँछिन् । दुवैको उद्धेश्य एउटै थियो, डान्सिङ स्टार्स नेपाल जित्ने । 'म यहाँ आएको चाहिँ जित्नलाई हो,' हरेकपटक सुमी भिजुलाई भन्थिन् । पाँच घण्टा लगातार नृत्य अभ्यास गरेर थकित भएर बस्दा 'उठ, उठ पार्टनर जित्नपर्छ' सुमीलाई हौसाउँदै भिजु पनि भन्थे ।

रातदिनको मिहेनतले नै सुभिजु विजेता बनेको सुमीको भनाई छ । 'प्रतियोगितामा सबैजना जित्न आएका थिए । तर त्यसमा हामीले जित्यौं । सायद हाम्रो रातदिनको मिहेनतको परिणाम हो त्यो । घाउचोट लाग्ने सामान्य भइसकेको थियो । शरीर नदुख्ने दिन हुन्थेन । आँसु पसिना मिसिएको थियो मिहेनतमा,' सुमीले भनिन् ।

अभ्यासका लागि २-५ घण्टा समय छुट्याइएको हुन्थ्यो । उनी दुई त्योबाहेक पनि साथीहरुका स्टुडियोमा अभ्यास गर्थे । २० घण्टाम्म नृत्य अभ्यास गरेको दिनहरु अझै सम्झिन्छिन् सुमी । विजेता भएबापत पाउने २० लाखमा केही रकम बहिरा संघलाई सहयोग गर्ने सोचेकी छिन् । 'अहिले सबै ठाउँमा २० लाखको कुरा हुन्छ । २० लाख कहिले पाउने हो मलाई थाहा छैन । आउला, समय लाग्छ होला,' उपहार रकमबारे हाँस्दै सुनाइन् ।

एक्सन अभिनेत्री

साहसिक पर्यटनमा स्नातकोत्तर अध्ययन गरिरहेकी सुमी नयाँ फिल्मको काममा हालै आबद्ध भएकी छिन् । २०१२ की मिस तामाङसमेत बनेकी सुमी फिल्ममै आफ्नो करियर बनाउन चाहन्छिन् । उनी २०१३ मा मिस नेपालको शीर्ष पाँचसम्म पुगेकी थिइन् । सौन्दर्य प्रतियोगितामा सहभागी हुन थालेपछि उनले म्युजिक भिडियो गर्न सुरु गरिन् । पाँचौं म्युजिक भिडियो गरिसक्दा उनलाई 'झ्यानाकुटी' फिल्मको अफर आयो ।

भूमिका छोटो थियो । त्यतिबेला क्यामेराको फ्रेम केही बुझेकै थिइनन् । तर अभिनय गरिन् । त्यसपछि कलाकार सौगात मल्लको सल्लाहमा 'ज्ञ' थियटरमा अभिनय सिकिन् । त्यसबीच फिल्म '२ रुपैयाँ'मा उनले एउटा गीत गरिन् । त्यसपछि उनलाई 'सरौतो' फिल्मबाट अफर आयो । सरौतोबाट नै'एक्सन अभिनेत्री'को उपनाम पाएकी हुन् सुमीले ।

म्युजिक भिडियो हुँदै फिल्ममा काम गरेपछि नै हो सुमीलाई यो क्षेत्रले तानेको । 'सुरुको दिनमा यसमै करियर नै बनाउँछु भनेर आएको होइन। तर गर्दै गएपछि राम्रो गर्न सक्छु भन्ने लाग्यो,' उनले भनिन् ।

'सरौतो'मा उनी प्रमुख भूमिकामा देखिएकी थिइन् ।

फिल्म त खासै चलेन नि ?

प्रश्न खस्न नपाउँदै जवाफमा भनिन्,'यो फिल्मको हिरो नै म थिएँ । तर फिल्मको लगानी उठेको छ । कति चर्चित कलाकारको फिल्म फ्लप हुन्छ । म त नयाँ थिएँ । त्यहीमाथि महिला केन्द्रित एक्सन फिल्म । कोरोना नभइदिएको भए धेरै राम्रो हुन्थ्यो होला।'

'सरौतो'को लागि डेढ वर्ष दिएकी थिइन् उनले । लगानी उठाएको दाबी गरे पनि फिल्मले सोचेजस्तो सफलता नपाएको उनी स्वीकार्छिन् । भन्छिन्,'सायद प्रदर्शन मिति सार्नु नपर्ने थियो कि हामीले?, हामी नयाँ अनुहार र नयाँ मेकर भएकाले डरायौं । पछाडि नसरेको भए राम्रो कमाइ गर्थ्यौ कि भन्ने पनि लागेको छ ।'

फिल्ममा करियर बनाउन खासै परिवारको साथ थिएन सुमीलाई । बुवा सन्तवीर लामा नेपाल पर्वतारोहण संघका अध्यक्ष । बुवा उनलाई डाक्टर बनाउन चाहन्थे । दिल्लीको लक्ष्मण पब्लिक स्कुलदेखि अमेरिकामा पढाए । तर उनको रुचि फिल्मतिरै मोडियो । 'बुवा र मेरो क्षेत्र फरक छ । उहाँले मबाट धेरै अपेक्षा राख्नुहुन्थ्यो । साइकोलोजी पढ्दा पनि के पढेको भन्नुहुन्थ्यो म दिमागको डाक्टर हो भनेर टारिदिन्थें,' उनी सुनाउँछिन् ।

फिल्ममा प्रवेश गरेको थाहा पाएपछि 'यो क्षेत्रमा के पाउँछ? बुवा उनलाई सोध्थे । 'यो काम गर्दा खुसी अनुभव हुन्छ । जे गरे पनि तपाईंलाई गर्विलो बनाउँछु,' उनी बुवालाई सम्झाउँथिन् । अहिले उनलाई परिवारको साथ छ । ट्रेकिङ कम्पनी र एभरेस्ट कफीको व्यापारमा उनको परिवार सक्रिय छ । व्यावसायिक परिवारकी सुमी अब फिल्ममा निर्माताको रुपमा आउने सोचमा छिन् । ,'म अकस्मात रुपले अभिनेत्री भएँ । अभिनेत्री बन्छु भनेर सपना देखेको होइन । म निर्माता मात्र होइन निर्देशकको रुपमा पनि आउन सक्छु ।'

प्रकाशित : पुस १८, २०७७ १३:५९
प्रतिक्रिया
पठाउनुहोस्

समाज परिवर्तनका लागि 'ऐना'

'समाजमा व्याप्त वर्गीय विभेद, लैङ्गिक विभेदका विषय मूलधारका मिडियामा आउनुपर्छ । त्यसले समाज रुपान्तरणको काम गर्नुपर्छ भनेर हामीले ऐनाको कन्सेप्ट तयार पारेका हौं ।'
रीना मोक्तान

काठमाडौँ — केही वर्षअगाडि भारत पुग्दा आमिर खान प्रस्तोता रहेको कार्यक्रम 'सत्यमेव जयते'को टिमसँग समय बिताउन पाए राधाकृष्ण धितालले । कार्यक्रमले आम जनतासँग सामाजिक विषयवस्तुबारे अन्तरक्रिया गर्ने र ती मुद्दालाई दर्शकसम्म पुर्‍याउने काम गर्थ्‍यो । भ्रुण हत्यासम्बन्धीको एक श्रृङ्खलाले त भारतमा संविधान संशोधन गर्नेसम्मको दबाब सिर्जना गर्‍यो । त्यसपछि नै राधाकृष्णको दिमागमा यस्तै विषयवस्तुमाथि नेपाली कार्यक्रम बनाउने कन्सेप्ट आयो ।

उक्त कन्सेप्टलाई परिमार्जन गर्दै पुन: रुपमा नेपालीकरण गरे । 'ऐना' त्यही परिमार्जित स्वरुप हो । डेढ वर्ष भयो राधाकृष्णको टिमले यो कार्यक्रमका लागि काम सुरु गरेको । 'समाज नै परिवर्तन गर्छु भन्ने त होइन तर समाज परिवर्तनका लागि मानिसलाई उद्दत गर्ने कार्यक्रम हो यो । मानिसको प्रवृति परिवर्तन भएपछि नै मानिसको स्थितिमा परिवर्तन हुन्छ । त्यसैले मानिसको प्रवृति, सोच, हेर्ने दृष्टिकोण फरक होस् भन्ने तरिकाले कार्यक्रम ल्याउने सोचेका हौं,' 'ऐना'बारे राधाकृष्णले भने।

हालै कार्यक्रमको शीर्ष गीत सार्वजनिक भयो । श्रवण मुकारुङको शब्द तथा मोहित मुनालको संगीतमा गायक सुगम पोखरेलको आवाज रहेको शीर्ष गीतले सकारात्मक प्रतिक्रिया बटुलेको बताउँछन् 'ऐना'का प्रोजेक्ट हेड धिताल । अप्रत्याशित रुपमा सेलेब्रिटीदेखि विभिन्न क्षेत्रका व्यक्तिले दिएको प्रतिक्रियाले हौसला मिलेको उनी बताउँछन् ।

पछिल्लो समय मूलधारका मिडियामा समाजका सुक्ष्म विषय प्राथमिकतामा नपरेको उनको भनाइ छ । मानिसले हेर्न खोजेका सामाजिक विषयवस्तु सामान्य समाचारमै सीमित भए । ती विषय मूलधारे मिडियाको प्राथमिकतामा नपरेको विश्लेषणपछि नै 'ऐना'को सुरुवात भएको उनको दाबी छ ।

समाजमा भएको एउटा यस्तो जमात, जसलाई देश जतिसुकै समृद्धिमा गए पनि, राजनैतिक व्यवस्था जतिसुकै परिवर्तन भए पनि फरक पर्दैन । ती मानिसका जीवनशैली उस्तै छन् । समाजमा वर्गीय विभेद उस्तै छन्, लैङ्गिक विभेद उस्तै छन् । 'समाजका यस्तै सुक्ष्म विषय मूलधारका मिडियामा आउनुपर्छ । त्यसले समाज रुपान्तरणको काम गर्नुपर्छ भनेर हामीले ऐनाको कन्सेप्ट तयार पारेका हौं,' धिताल सुनाउँछन्, 'यी विषयवस्तु नेपाली दर्शकले हेर्नुपर्छ । बाल बलात्कारका मुद्दा होस्, या त दाइजोका विषय हुन् । जातीय विभेदका विषय हुन् या मानसिक स्वास्थ्यका कुरा, मजदुरका सुरक्षाका कुराहरु ठूलो प्लेटफर्ममा देखायौं भने हेर्ने रहेछन् भन्ने भयो हामीलाई ।'

पछिल्लो समय दर्शकमा रियालिटी सो निकै चर्चित बन्दै गएको छ । धितालले रियालिटी सोकै शैलीमा कार्यक्रम तयार पारेका छन् । उनका अनुसार सोमा प्रभावित व्यक्तिलाई पनि सहभागी गराइनेछ र सरोकारवालालाई पनि । 'विभिन्न मुद्दामा वकालत गर्ने वातावरण बनाउनेछ कार्यक्रमले,' धिताले भने,'ऐना भनेको टेलिभिजन कार्यक्रममा पीडितलाई ल्याउने अन्तरवार्ता लिने र रुवाउने मात्र होइन । यो एउटा सामाजिक अभियानकै रुपमा हामीले विकास गर्न खोजेका छौं ।' उनले भने,'जब हाम्रो कार्यक्रम सकिन्छ त्यो नै अन्त्य भने होइन । त्यहाँबाट अभियानको सुरु हुन्छ भन्ने तरिकाले हामी आउँदैछौं ।'

विभिन्न घटना, दुर्घटनाबाट प्रभावित मानिसका लागि राष्ट्रबाट केही हुन सकोस् भनेर अभियानको रुपमा कार्यक्रमलाई वर्षौंसम्म लैजाने उनको टिमको योजना छ । डेढ वर्षको अवधिमा प्रकाश लामिछानेको नेतृत्वले विषयवस्तुको अनुसन्धान सक्यो । टिमले ७० जिल्लामा गएर विविध विषयवस्तु खोज्ने काम गर्‍यो । धितालका अनुसार अनुसन्धान टिमले ल्याएको विषयवस्तुमध्येबाट २६ विषयमाथि कार्यक्रम तयार गरिनेछ । अहिले ८ श्रृङ्खलाको पोस्ट प्रोडक्सनको काम भइरहेको उनी बताउँछन् । '१३ गतेबाट हामी स्टुडियो सुटमा जान्छौं अनि माघ ७ बाट प्रसारण गर्छौं । ती कार्यक्रम सँगसँगै अन्य ८ श्रृङ्खलाको सुटमा गइहाल्छौं,' उनले भने ।

नजरअन्दाज गरिदिएका विषयवस्तुदेखि मानिसले भोग्दै आएका र जीवनशैली बनाउँदै आएका विषय कार्यक्रममा समेटिनेछन् । मानवीय सम्वेदनाका विषयलाई संवेदनशील र सूक्ष्म अध्ययन, अनुसन्धान र विश्लेषण गरेर यो कार्यक्रममा प्रस्तुत गर्ने धितालले बताए ।

खासमा उनको टिमले गत जेठदेखि नै कार्यक्रम प्रसारण गर्ने सोचेका थिए । तर, कोभिडका कारण कार्यक्रमको मिति पनि पछाडि धकेलियो । कार्यक्रमलाई नेपाली कांग्रेसका प्रवक्ता विश्वप्रकाश शर्माले सञ्चालन गर्नेछन् । आमिर खानजस्तै पात्र भेटिएन, राजनीतिज्ञ नै किन प्रस्तोतामा छानियो ? प्रश्न गर्दा उनले भने,'हामीले धेरै प्रकारका मानिससँग कुरा गर्‍यौं । चलचित्र, गायन क्षेत्रका मानिसहरुसँग कुरा गर्‍यौं । आमिर खानले जुन खालको स्टारडम बोक्नु हुन्थ्यो सायद नेपालमा त्यो तहको स्टारडम नभएको हो कि हामीले कोही भेटेनौं ।'

'ऐना'ले समेट्ने समाजका सुक्ष्म विषयवस्तुलाई बुझ्ने र अनुभव गर्ने व्यक्तिको खोजिकै क्रममा विश्व प्रकाश आफूहरुको नजरमा परेको धितालको भनाइ छ । विश्वप्रकाश प्रस्ट वक्ता हुन् । उनको प्रस्तुतिमा मिठास छ । २०५१/५२ तिर घटना र विचार भन्ने कार्यक्रमका सम्पादकसमेत थिए उनी । उनले मिडिया पनि बुझेका कारण प्रस्तोतामा फाइनल गरिएको धिताल बताउँछन् । 'मिडिया बुझेको र हामीले खोजेजस्तो फ्यान फलोइङ भएका कारण पनि उहाँलाई छान्यौं । फरक विधाबाट मानिस रोजेर जोखिम मोल्यौं हामीले,' उनी सुनाउँछन्,'कार्यक्रममा उहाँलाई शुद्ध प्रस्तोताका रुपमा हामीले चिनाउन खोजेका छौं । उहाँ राजनीतिज्ञ मात्र होइनन् लेखक पनि हुन् । कवि पनि हुन् । गीतकार पनि हुनुहुन्छ ।'

विषयवस्तुको प्रभाव धेरै भयो भने व्यक्तिको प्रभाव कम हुन्छ । नयाँ पुस्ताले विश्व प्रकाश भन्नेबित्तिकै राजनीतिज्ञ हो भनेर फ्याट्ट भन्न सक्दैनन् । 'ऐना' उनका लागि अर्को एउटा परिचय बन्न सक्ने बताएपछि प्रस्तोताका रुपमा विश्वप्रकाश कन्भिन्स भए ।
राजनीतिज्ञलाई राजनीति गर्न नदिएर किन कार्यक्रम प्रस्तोता बनाइयो ?' धेरैले धिताललाई सोधेको प्रश्न हो यो । उनी भन्छन्,'उहाँले राजनीति गर्न नपाउने होइन भरपुर गर्न पाउनुहुन्छ ।

स्टुडियोमा प्रस्तोताको भूमिका निभाइदिने हो उहाँले । सुटलगायतको दिनमा त आफ्नो कार्यक्रम गर्न पाउनुहुन्छ ।'
कार्यक्रममा सम्बन्धित विषयसँग सरोकार राख्नेहरु, विज्ञ, अधिकारकर्मीलगायत १ सय दर्शक सहभागिता गराउने तयारी छ । सुरुवातका श्रृङ्खलामा कोभिड-१९ को मापदण्ड अपनाएरै सीमित दर्शक राखेर कार्यक्रम प्रशारण गरिने बताउँछन् धिताल । उनी कार्यक्रम प्रभावकारी बन्नेमा आशावादी छन् । 'प्रभावकारी नहोला भन्ने सोचेकै छैनौं । हामीले धेरै मिहनेत गरेर विषयवस्तु बनाएका छौं । अब दर्शकले मन पराउने नपराउने उहाँहरुकै हातमा छ ।'

कान्तिपुर टेलिभिजनबाट प्रसारणमा आउने कार्यक्रमको नारा हो, 'ऐना' समयको यथार्थ तस्बिर । ऐनाले सत्य बोल्छ । समाजको यथार्थ तस्बिर देखाउने भएकाले कार्यक्रमको नाम ऐना राखिएको हो ।

'धुलो फोहोर अनुहारमा लागेको छ भने ऐना पुछेर हुँदैन भन्ने भनाइ छ । हामी अहिले ऐना पुछिरहेका छौं,' धिताल बताउँछन्,'ऐनामा एक चोटी अनुहार हेरौं । अनुहारमा धुलो छ भने पहिले अनुहार सफा गरौं अनि मात्र अनुहार हेरौं भन्ने सन्देश हो कार्यक्रमको । वास्तवमा हामीले गरेको कुरा आफैले आफैलाई ऐनामा हेर्‍यौं भने हामीले आफ्नो विश्लेषण, आत्मालोचना गर्ने ठाउँ दुरुस्त देखिन्छ ।'

प्रकाशित : पुस १३, २०७७ १४:३२
पूरा पढ्नुहोस्
प्रतिक्रिया
पठाउनुहोस्
×