कोरियामा साकेला
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
सोल — हृवासाङ फोर्टरेस कुनै बेला कोरियाली राजा र सैनिक परेड खेल्ने ठाउँ थियो । अहिले पनि मान्छेहरु ऐतिहासिक ठाउँ भनेर घुम्न पुग्छन् । युनेस्को वर्ल्ड हेरिटेज साइटमा पर्ने यो ठाउँमा आइतबार भने कोरियामा रहेका नेपालीहरु जम्मा भएर यलेदोङ ५०५३ उभौली साकेला मनाए ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![कोरियामा साकेला](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/sakelaa-1552023020445-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
किरात राई यायोक्खा दक्षिण कोरियाले आयोजना गरेको कार्यक्रममा नेपालीसँगै कोरियालीहरु पनि रमाइरहेका थिए ।
राजधानी सोलदेखि ३५ किलोमिटर टाढाको सुवन सहरको फोर्टरेस चौरमा ढोल र झ्याम्टाको तालमा नाच्दै भेटिए सोलुखुम्बुका राजु राई । ‘व्यस्त दैनिकीमा एकैछिन गाउँघरको याद मेटाउने रमाइलो हो । हाम्रो संस्कृति र पराम्परालाई सम्झने तरिका पनि हो,’ राईले भने ।
उनी कार्यक्रमस्थल भन्दा ४० किलोमिटर टाढा आन्सानबाट आएका हुन् । ख्याङ्गीदो योङगीनबाट आएका रोहित क्षेत्रीले पनि बिदाको दिनमा साथीभाइसँग भेटेर रमाइलो गर्ने अवसर जुरेको बताए । ‘काम गर्ने दिनमा कि त मेसिन हुन्छ कि त किचकिच गरिरहने हाकिम । आज यता छौं, सबै दुःख भुलेका छौं । टाढा टाढाबाट पनि साथीभाइ आएका छन् ।’
कोरियाको मौसम गर्मी छ । आइतबार २८ डिग्री सेल्सियस थियो । ‘यस्तो गर्मीमा कति मान्छे आउलान् भन्ने हामीलाई पनि लागेका थियो । कार्यक्रम धेरै जना आउनु भयो । परेदशको व्यस्त जिन्दगीबाट समय निकालेर आउनु भयो,’ कार्यक्रमको आयोजक किरात राई यायोक्खाका अध्यक्ष पदम राईले भने ।
‘विदेशमै भए पनि मनमा त गाउँघर हुन्छ नि । आज यहाँ आउनेले ढोल झ्याम्टामा नाचेर मनको तिर्सना मेट्नु भयो,’ उनले थपे । उभौलीमा नाच मात्र थिएन ।
उभौलीमा राई गाउँ नै सम्झाउने गरी खानाका परिकार पनि थिए । सेल रोटी, पिरो अचार थियो । बंगुरको मासु । राई समुदायको प्रमुख परिकार वाचिपा(तिते) थियो । कोरियामा रहेका लिम्बूहरुले बंगुरको मासुबाट बनाउने याङबेन बनाएर कोसेली ल्याएका थिए । नेपालको जाँड जस्तै हुने कोरियाली जाँड ‘माकली’ पनि यहाँको आकर्षण थियो । फोर्टरेस घुम्न आएका कोरियालीहरुले पनि राई परिकारको मज्जा लिँदै खाएको देखिन्थ्यो ।
![](https://assets-cdn.ekantipur.com/uploads/source/ads/900-x-100-1-0282024055738.gif)