निसानामा बेलायतका नेपाली सुनचाँदी व्यवसायी- प्रवास - कान्तिपुर समाचार
कान्तिपुर वेबसाईट
AdvertisementAdvertisement

निसानामा बेलायतका नेपाली सुनचाँदी व्यवसायी

कान्तिपुर संवाददाता

लन्डन — डिसेम्बर दोश्रो साता बेलायत अल्डरसटस्थित नेपालीका दुई गहना पसलमा एकैपटक लुटपाट प्रयास भयो । लुटेराले राति ३ बजेतिर अनुग्रह ज्वेलर्स र न्यू लक्ष्मी ज्वेलर्सको सटरमा गाडी जोतेर लुटपाट प्रयास गरे ।

गहना पसलमा आधुनिक प्रविधि जडान र सुरक्षा शतर्कताका कारण प्रहरी टोली तत्काल घटनास्थल पुगेपछि चोरले दुवै पसलका कुनै पनि गहना लैजान नसकेको सञ्चालकले बताए ।

लगत्तै अनुसन्धान थालेको ह्याम्पसायर प्रहरीले घटनामा संलग्न व्यक्तिको पहिचान भइसकेको बताएको छ । न्यू लक्ष्मी ज्वेलर्सकी सञ्चालिका लक्ष्मी राईले प्रहरीसमक्ष तत्काल सूचना पुग्ने अलार्म सिस्टम र गहना पसलभित्र चोर छिर्ने बित्तिकै निस्कने धुंवाका कारण आफ्नो सामान सुरक्षित रहेको बताइन् ।

'बढ्दो आपराधिक घटनाका कारण हामी महत्वपूर्ण सामान पसलमा राख्ने गर्दैनथ्यौं', उनले भनिन्, 'सामान त बच्यो तर पसलको भौतिक क्षति धेरै भएकाले मर्मतको झन्झट र ग्राहकलाई असुविधा पर्न गयो ।'

उनले आफ्नो क्षतिग्रस्त पसल मर्मतपछि आगामी जनवरी पहिलो सातादेखि पूर्ण रुपमा सञ्चालनमा आउने बताइन् । मर्मतकै लागि अनुमानित लागत झण्डै ५० हजार पाउण्ड लाग्ने राईको दाबी छ ।

अनुग्रह ज्वेलर्सका सञ्चालक सुमन राईले बेलायतमा व्यवसाय सुरु गरेको ७ वर्षमा पहिलोपटक यस्तो घटना ब्यहोर्नुपर्‍यो । 'पसलमा क्षति भएकाले एक साता जति व्यापार भएन तर क्रिसमसका लागि ग्राहकलाई १७ डिसेम्बरदेखि सेवा दियौं', राईले भने, 'प्रहरीले घटनाका संदिग्धलाई छिट्टै अदालत लाने तयारी गरेका छौं भनेका छन् । अहिले सबै कुरा बाहिर सार्वजनिक गर्न नमिल्ने रहेछ, सायद विस्तृत छिट्टै आउला ।'

यूकेको हाइ सेक्युरिटी सिस्टम जडान भएकाले पसलबाट चोरले कुनै सामान लैजान नपाएको राईले बताए । तर पसलको क्षति मर्मत गर्न करिब १२ हजार पाउण्ड लाग्ने र यो बिल्डिङ इन्सुरेन्सबाट 'कभर' हुने उनी बताउँछन् । 'सामान सुरक्षित रहेकाले कन्टेन्ट इन्सुरेन्स क्लेम गरेनौं', उनले भने ।

घटनापछि बेलायतका भेट्रान मन्त्री एवं सो क्षेत्रका सांसद लियो डोकर्टी घटनास्थल पुगेर पसल सञ्चालकहरूसँग भेट गर्दै सान्त्वना दिएका थिए । भेटमा मन्त्रीले स्थानीय व्यवसायप्रति आफ्नो ऐक्यवद्धता जनाउँदै भविष्यमा यस खालका घटना दोहोरिन नदिने आश्वासन दिएको काउन्सिलर जीव बेल्वासेले जनाए ।

बेलायतमा नेपालीका सुनचाँदी व्यवसाय एवं व्यक्तिगत गरगहना प्रायः निसाना बन्ने गरेका छन् । किन यस्तो भइरहेको छ ? सञ्चालक सुमन भन्छन्, 'चोरी त सबै तिर भएकै सुनिन्छ । सायद हाम्रा पसलमा धेरै सामान लुट्न सकिन्छ भनेर चोरले दुष्प्रयास गरे ।'

यहाँ नेपाली सुनचाँदी व्यवसायीहरू संगठित भने नभएका होइनन् । व्यवसायिक मर्यादासहित आपतविपद्का बेला ग्राहक एवं व्यवसायीलाई उचित सहयोग, सल्लाह सुझाव आदानप्रदान गर्ने उद्देश्यले सन् २०१८ जनवरीमा नेपाली सुनचाँदी व्यवसायी संघ बेलायत (नेपलिज ज्वेलरी एसोसिएसन यूके) गठन भएको थियो ।

संस्थाको मुख्य उद्देश्य ग्राहकहरूलाई उच्च गुणस्तर ९९.९ प्रतिशत सुनचाँदीका गहना साथै काँचो सुन र चाँदी उपलब्ध गराउनु रहेको अध्यक्ष मेजर योगेश राईले जानकारी दिए ।

अध्यक्ष राईले सम्पूर्ण ग्राहकलाई होम कन्टेन्ट इन्सुरेन्स गर्न सुझाएका छन् जसले गर्दा कुनै आगलागी वा चोरी भएमा इन्सुरेन्स दाबी गर्न सकिनेछ ।

अध्यक्ष राईले एनजेए यूके सदस्यहरू र रिटेलर्सभन्दा बाहिर अरु पसल वा व्यक्तिगत घरहरूबाट बेचिएको वा किनिएको समानमा मिश्रित र कमसल गुणस्तर हुने सम्भावना प्रचुर रहने भन्दै बेलायतमा दर्ता भएको एनजिए यूके सदस्यहरूबाट मात्रै किन्न पनि अनुरोध गरे ।

प्रकाशित : पुस १६, २०७८ २१:३३
प्रतिक्रिया
पठाउनुहोस्

जुम्ल्याहा दाइभाइलाई तेक्वान्दोको स्वर्ण

कान्तिपुर संवाददाता

काठमाडौँ — जुम्ल्याहा गोले दाइभाइ राम र लक्ष्मणेले प्रथम राष्ट्रिय मेयर कप तेक्वान्दो प्रतियोगितामा शुक्रबार स्वर्ण पदक जितेका छन् । वाग्मती प्रदेश तेक्वान्दो संघद्वारा आयोजित प्रतियोगिताको सिनियर पेयर पुम्सेमा नेपाल प्रहरीका राम र लक्ष्मणको जोडीले स्वर्ण जितेको हो ।

एपीएफका चन्दु शाही र मनोज श्रेष्ठको जोडी दोस्रो भयो । लुम्बिनी प्रदेशका एलिजा रोकाया र भेषराज सुनार तथा नेपाल आर्मीका रोशनी श्रेष्ठ र अस्मिन राईको जोडी तेस्रो भए ।

लक्ष्मणले सिनियर पुरुष एकल पुम्सेमा पनि स्वर्ण जिते । उनले लुम्बिनीका युवराज लामालाई हराए । आयोजक ‘ए’ र ‘बी’ का क्रमश: पुष्पप्रसाद गौतम र मुहम्मद उमर खान संयुक्त रूपमा तेस्रो बने । सोही स्पर्धाको महिलामा आर्मीकी रश्मी श्रेष्ठ पहिलो, एपीएफकी चन्दु शाही दोस्रो तथा लुम्बिनीकी सुनीता विष्ट र आयोजक ‘ए’ की रंगिला रोका तेस्रो स्थानमा रहे ।

त्रिपुरेश्वरस्थित राष्ट्रिय खेलकुद परिषद्को कभर्डहलमा भएको प्रतियोगिताको सिनियर ग्रुप पुम्सेमा आर्मीका रोशनी श्रेष्ठ, अस्मिन राई र स्मृति थापासम्मिलित टोली विजेता भयो । प्रहरी दोस्रो भयो भने आयोजक ‘ए’ र लुम्बिनी तेस्रो बने ।

जुनियर ग्रुप पुम्सेमा आयोजक ‘ए’ का मोनिका मगर, मोनिका रम्तेल र स्मृति नेपालीले पहिलो स्थान कब्जा गरे । आयोजक ‘बी’ दोस्रो र गण्डकी प्रदेश तेस्रो भए ।

जुनियर पुरुष एकल पुम्सेमा आयोजक ‘बी’ का श्रृजल श्रेष्ठले स्वर्ण, आर्मीका सुजन श्रेष्ठले रजत तथा कर्णाली प्रदेशका दिनेश मगर र प्रदेश १ का निङमा तामाङले कांस्य हात पारे ।

जुनियर महिला एकल पुम्सेमा आयोजक ‘बी’ की जैनव खातुन पहिलो, आयोजक ‘ए’ की मोनिका रम्तेल दोस्रो तथा प्रदेश १ की शान्ति राई र एपीएफकी रोशनी सिलवाल तेस्रो भए ।

जुनियर पेयर पुम्सेमा आयोजक ‘ए’ का अब्बास अन्सारी र जैनव खातुन पहिलो, प्रदेश १ का निङमा तामाङ र शान्ति राई दोस्रो तथा आयोजक ‘बी’ का योगुन राई र हिमाल अधिकारी तथा आर्मीका रिता श्रेष्ठ र सुजन श्रेष्ठ तेस्रो भए ।

प्रतियोगिताको वाग्मती प्रदेशका युवा तथा खेलकुदमन्त्री रत्नप्रसाद ढकालले उद्घाटन गरे । प्रतियोगितामा आयोजक, सातै प्रदेश र तीन विभागीय टोलीका ३ सय ३० खेलाडीले २४ स्पर्धामा प्रतिस्पर्धा गरिरहेको आयोजक संघका अध्यक्ष केशव पुरीले जनाएका छन् । प्रतियोगिता शनिबारसम्म चल्नेछ ।

प्रकाशित : पुस १६, २०७८ २१:२५
पूरा पढ्नुहोस्
प्रतिक्रिया
पठाउनुहोस्
×