१७.१२°C काठमाडौं
काठमाडौंमा वायुको गुणस्तर: १६३

न्युजिल्यान्ड र अस्ट्रेलियामा ‘एभरेष्ट डे’ को तयारी

नारायण खड्का

अस्ट्रेलिया — अस्ट्रेलिया तथा न्युजिल्यान्डमा रहेका नेपालीले यसवर्ष विभिन्न सहरमा ‘एभरेष्ट डे’ मनाउने भएका छन् । न्युजिल्यान्डको राजधानी वेलिंगटनमा आयोजना हुने कार्यक्रममा प्रधानमन्त्री जसिन्था आर्डन सहभागी हुने भएकी छन् ।

न्युजिल्यान्ड र अस्ट्रेलियामा ‘एभरेष्ट डे’ को तयारी

तेन्जिङ नोर्गे शेर्पा र एडमण्ड हिलारीले पहिलोपटक सगरमाथाको सफल आरोहण गरेको सम्झनामा न्युजिल्यान्डमा एभरेष्ट डे मनाइँदै आएको छ । यसवर्ष न्युजिल्यान्डको राजधानी वेलिंगटनसहित विभिन्न ६ सहरमा कार्यक्रमको आयोजना गरिँदैछ । राजधानीमा आयोजना हुने कार्यक्रम न्युजिल्यान्डको संसद् भवनमा आयोजना हुनेछ जसमा प्रधानमन्त्री जसिन्था आर्डनले सम्बोधन गर्ने कार्यक्रम रहेको आयोजकले जनाएको छ । संसद् भवनमा आयोजना हुने कार्यक्रममा प्रधानमन्त्री आर्डनका साथै यातायातमन्त्री माइकल वुड र सामाजिक तथा बहुसंस्कृतीमन्त्री प्रियंका राधाकृष्णनसहित २२ जना सांसदले सहभागिता जनाउने छन् ।

आयोजक नेप्लिज सोसाइटी अफ वेलिंगटनका अध्यक्ष रमेश सापकोटाले यसवर्षको सगरमाथा दिवस अकल्याण्ड, हेमिल्टन, बे अफ प्लेन्टी, क्राइस्ट चर्च र साउथल्याण्डमा समेत आयोजना हुने जानकारी दिए । उनले वेलिंगटनस्थित संसद् भवनको कार्यक्रम सत्तारुढ दल लेबरका सांसदद्वय भानुसी वाल्टर र डा. गौरव शर्माले समन्वय र स्वागत गर्ने कार्यक्रम तय गरिएको जानकारी दिए । उक्त कार्यक्रममा एडमण्ड हिलारीका छोरा पिटर हिलारी, ६ पटक सगरमाथाको सफल आरोहण गरिसकेका पर्वतारोही आंककाजी शेर्पाका साथै विभिन्न दल, संघसंस्थाका प्रतिनिधिको सहभागिता रहनेछ । ‘सगरमाथा दिवसको माध्यमबाट नेपाल र न्युजिल्यान्डको दुई देशीय सम्बन्धलाई अझ दरिलो बनाउने विश्वास लिएका छौं,’उनले कान्तिपुरसँग भने ।

न्युजिल्यान्डको संसद्‌मा नेपालीले आयोजना गर्ने यो अहिलेसम्मको ठूलो कार्यक्रम हुने जनाइएको छ । अस्ट्रेलिया तथा न्युजिल्यान्ड हेर्ने दूतावासमा राजदूत पद महिनौंदेखि खाली रहेकाले नेपालको तर्फबाट प्रभावकारी कूटनीतिक उपस्थिती रहने छैन । कार्यक्रममा अस्ट्रेलियाको क्यानबेरास्थित दूतावासबाट प्रतिनिधि सहभागी हुने छन् ।

यसवर्ष अस्ट्रेलियामा रहेका नेपालीले समेत मे २९ तारिखका दिन सगरमाथा दिवस मनाउने भएका छन् । फेडेरेसन अफ नेप्लिज कम्युनिटी एसोसिएसन अफ अस्ट्रेलिया (फेन्का) को आयोजनामा अस्ट्रेलियाका सबै राज्य तथा टेरिटोरीमा सगरमाथा दिवस आयोजना हुने भएको हो ।

पहिलोपटक सबै राज्यमा हुन लागेको यस कार्यक्रमले सगरमाथा र नेपालको पर्वतारोहणका बारेमा यहाँ रहेका अन्य समुदायलाई थप जानकारी दिने आयोजकले बताएको छ । आयोजक संस्थाका अध्यक्ष कृष्ण हमालले कार्यक्रम मार्फत नेपालको हिमाली पर्यटनको प्रचारप्रसार गर्नुका साथै हिमाल सफा राखौं भन्ने मुख्य सन्देश दिइने जानकारी दिए ।

कार्यक्रममा सगरमाथाको सफल आरोहण गरेका पर्वतारोही, अस्ट्रेलियाली राजनीतिक दलका नेता, नेपाली दूतावास, एनआरएनएलगायतका अन्य संघसंस्थाका प्रतिनिधी समेत सहभागिता हुने आयोजकको भनाइ छ ।

प्रकाशित : वैशाख २९, २०७९ १४:५९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?