नेपाली युवा वैज्ञानिकलाई चीनको राष्ट्रिय स्तरको ‘रिसर्च ग्रान्ट’- प्रवास - कान्तिपुर समाचार
कान्तिपुर वेबसाईट
AdvertisementAdvertisement

नेपाली युवा वैज्ञानिकलाई चीनको राष्ट्रिय स्तरको ‘रिसर्च ग्रान्ट’

लक्ष्मी लम्साल

बेइजिङ — चीनमा कार्यरत एकजना नेपाली वैज्ञानिकले चीनकै प्रतिष्ठित राष्ट्रिय स्तरको अनुसन्धान ‘ग्रान्ट’ प्राप्त गरेका छन्। झापाको महारानीझोडाका डा.जनकलाल पाठकलाई चीनको राष्ट्रिय प्राकृतिक प्रतिष्ठानले यस वर्षको विदेशी युवा अनुसन्धान अनुदान प्रदान गरेको हो।

चीनको क्वाङ्चौ चिकित्सा विश्वविद्यालयमा सहप्राध्यापकका रुपमा कार्यरत पाठकले ६ पटकको प्रयासपछि यस्तो उपलब्धी हासिल गरेको कान्तिपुरलाई सुनाए। पाठक विगत ४ वर्षदेखि क्वाङ्चौ मेडिकल युनिभर्सिटीमा कार्यरत छन्।

क्याथोलिक विश्वविद्यालय लुभेन बेल्जियम र भ्रिज विश्वविद्यालय एम्स्टर्डम नेदरल्यान्डबाट विद्यावारिधि गरेका पाठक विगत ६ वर्षदेखि चीनमा स्टेम सेलमा आधारित हड्डी पुनर्जनन(बोन रिजेनेरेसन)को अनुसन्धान गरिरहेका छन्।

युनिभर्सिटीमा मास्टर, पीएचडी, पोस्ट डक रिसर्चलगायत ग्रुपका प्रमुख पनि रहेका छन्। चीनमा सहर तह, प्रान्तीय तह र राष्ट्रिय तहका ग्रान्ट रहेकोमा एक मात्र नेपालीको रुपमा उनले ४ लाख चिनियाँ युआनको २ वर्षे रिसर्च ग्रान्ट पाएका हुन् । ‘प्राप्त ग्रान्टले २, ४ जनालाई पीएचडी गराउन र केही प्याटेन्ट लिन सकिन्छ, तर त्यो भन्दा पनि राष्ट्रिय तहको प्रथम श्रेणीको ग्रान्ट पाउनु नै महत्त्वपूर्ण खुट्किलो पार गरेको जस्तो लागेको छ’, उनले भने। सम्बन्धित क्षेत्रका नेपाली अनुसन्धाताहरू इच्छुक भएमा यथोचित सहयोग गर्न सकिने सम्भाव्यता औंल्याउँदै उनले कैयौं विदेशीहरूबीच प्रतिष्पर्धा जित्न सकेकोमा नेपाली हुनुको हिसाबले गौरवाान्वित भएको बताए।

यसैवर्ष चीनको विज्ञान तथा प्रविधि मन्त्रालयबाट पाठकले विदेशी युवा वैज्ञानिकको पदक पनि प्राप्त गरेका छन्।

प्रकाशित : पुस १६, २०७८ १३:४३
प्रतिक्रिया
पठाउनुहोस्

अग्रिमो आउनुअघि प्रस्तावित राजदूतहरूको ‘अन्तरक्रिया कार्यक्रम’ पूरा

कान्तिपुर संवाददाता

काठमाडौँ — प्रस्तावित तीन मुलुकका राजदूतहरूले सम्बन्धित मुलुकहरुबाट अग्रिमो (सहमति पत्र) आउनुअघि नै परराष्ट्र मामिला अध्ययन प्रतिष्ठानले आयोजना गर्ने अन्तरक्रिया कार्यक्रममा भाग लिइसकेका छन् ।

भारतका लागि प्रस्तावित राजदूत शंकर शर्मा, अमेरिकाका लागि प्रस्तावित राजदूत श्रीधर खत्री र बेलायतका लागि प्रस्तावित राजदूत ज्ञानचन्द्र आचार्यले प्रतिष्ठानले आयोजना गरेको चार दिने ‘नवनियुक्त राजदूतहरुका लागि अन्तक्र्रिया कार्यक्रम’ मा सहभागिता जनाएका हुन् । उक्त अन्तरक्रिया कार्यक्रम बिहीबार पूरा भएको हो । ‘उहाँहरु तीन जना प्रतिष्ठानले आयोजना गरेका कार्यक्रमको सबै सत्रहरुमा सहभागी भएर अन्तरक्रियालाई सफल बनाउनु भयो,’ प्रतिष्ठानका एक अधिकारीले कान्तिपुरलाई भने ।

तीन प्रस्तावित राजदूतहरुको अग्रिमा आउने लगभग पक्का भएपछि उनीहरुलाई राजदूत नियुक्त हुनुअघि नै प्रतिष्ठानले अन्तरक्रिया कार्यक्रम गराएको हो । साधारणतया राजदूतमा नियुक्त भएपछि मात्र उक्त कार्यक्रममा सहभागी गराइन्छ । प्रस्तावित राजदूतको सम्बन्धित मुलुकबाट अग्रिमो स्वीकृत भएर आएन भने नयाँ राजदूत फेरि प्रस्तावित गर्नु पर्ने हुन्छ । २०६२/६३ पछि भारतका लागि माओवादी केन्द्रका प्रस्तावित राजदूत सुरेन्द्र कार्कीको अग्रिमो अस्वीकृत भएको थियो । र, पछि फेरि अर्को राजदूत नियुक्त गरेर बनाउनु पर्‍यो ।

सरकारले राजदूतमा प्रस्तावित गरेपछि परराष्ट्र मन्त्रालयअन्तर्गत रहेको प्रतिष्ठानले सम्बन्धित मुलुकमा जिम्मेवारी सम्हाल्न जानुअघि राजदूतहरूसँग अन्तरक्रिया कार्यक्रम गर्छ । उक्त कार्यक्रममा राजदूत भएर सम्बन्धित मुलुकमा के–के काम, कसरी गर्नेदेखि विदेशीसँग कसरी खाना खानेसमेत विषयमा राजदूतहरुलाई विज्ञहरुले जानकारी दिन्छन् ।

शर्मा, खत्री र आचार्यलाई सरकारले कात्तिक ११ गते सम्बन्धित मुलुकको राजदूतमा सिफारिस गरेको थियो । प्रस्तावित राजदूतहरूको मंसिर २० गते संसदीय सुनुवाइ भएको थियो । उनीहरुलाई समितिले सोही दिन अनुमोदन गरेपछि परराष्ट्र मन्त्रालयले सम्बन्धित मुलुकहरुमा अग्रिमो लिनका लागि पत्राचार गरेको गरिसकेको छ । मन्त्रालय स्रोतका अनुसार तीन प्रस्तावित राजदूतहरूको शुक्रबारसम्म कुनै पनि मुलुकबाट अग्रिमो आइपुगिसकेको छ । कानुनअनुसार अग्रिमो आइसकेपछि राष्ट्रपति विद्यादेवी भण्डारीले राजदूतहरुलाई नियुक्त गर्ने छिन् । र, राजदूतहरू सम्बन्धित मुलुकमा पुगेर आफ्नो ४ वर्षे कार्यकाल थाल्ने छन् ।

प्रस्तावित राजदूतसामु परराष्ट्र मन्त्री नारायण खड्का, मुख्य सचिव शंकरदास बैरागी, परराष्ट्र सचिव भरतराज पौड्यालदेखि अन्तर्राष्ट्रिय, अर्थतन्त्र र परराष्ट्र मामिलालगायतका जानकारहरुले अन्तरक्रिया गरेका थिए । अहिलेको विश्वको राजनीति, नेपालले विज्ञान र प्रविधि कूटनीतिमा ध्यान दिनु पर्नेदेखि शिष्टाचारका बारेमा पनि राजदूतहरूसँग अन्तरक्रिया भएको थियो । उनीहरुलाई ‘टेबल म्यानर’ भने मेरियट होटलमा गराइएको थियो ।

उक्त अन्तरक्रिया कार्यक्रममा भाग नलिएर पनि राजदूतको जिम्मेवारी सम्हाल्न जाने पनि छन् । पूर्व मुख्यसचिव लोकदर्शन रेग्मीले भने आफू बेलायतका लागि राजदूतमा सिफारिस भएपछि उक्त अन्तरक्रियामा भाग लिन अस्वीकार गरेका थिए । उनले सुरुआतमा आफ्नो अग्रिमो आइनसकेको भन्दै उक्त कार्यक्रममा गएनन् । पछि अग्रिमो आइसकेपछि उनी तालिम नै नलिइकन बेलायत उठेका थिए । रेग्मीको उक्त गतिविधिका कारण कूटनीतिक रुपमा गलत सन्देश गएको मन्त्रालय र प्रतिष्ठानकै पदाधिकारीहरुले बताएका थिए ।

प्रकाशित : पुस १६, २०७८ १३:३८
पूरा पढ्नुहोस्
प्रतिक्रिया
पठाउनुहोस्
x
×