स्विडेनको तीजमा नेपाली झल्को- प्रवास - कान्तिपुर समाचार

स्विडेनको तीजमा नेपाली झल्को

कान्तिपुर संवाददाता

स्विडेन — नेपाली महिलाको महत्त्वपूर्ण चाडको रुपमा रहेको तीजमा स्वदेशमात्र नभइ विदेशमा पनि विभिन्न कार्यक्रम गरी मनाउन थालिएको छ । स्विडेनमा रहेका नेपाली चेलीलाई तीजको दर खुवाउने र नेपाली कला संस्कृतिलाई फैलाउने उद्देश्यले स्विडेनमा पनि धुमधामका साथ तीज मनाइएको छ ।

स्विडेनस्थित जनसम्पर्क समिति र इन्डेन प्यालेस रेस्टुरेन्टले आइतबार लोकगायिका सम्झना लामिछाने मगरको विशेष आतिथ्यतामा तीज विशेष कार्यक्रम आयोजना गरेको हो ।

राज खरेल र नरेन्द्र जोशीको पहलमा भएको कार्यक्रममा गायिका लामिछानेले एकल प्रस्तुति दिएकी थिइन् । उनले तीजका चर्चित गीतहरू गाएर स्विडेनको विभिन्न क्षेत्रमा रहेका नेपाली महिलालाई स्वदेशको तीज अनुभूति दिलाइन् । त्यसबाहेक गायिकाले आफ्नो चर्चित लोकगीत 'फूल फूलेर पहेँलै भयो, घरमा पराल बारीमा बन्सो' लगायत बोलका गीत पस्केकी थिइन् । गायिका सम्झनाले विदेश भूमिमा आफ्नो देशका महिला दिदीबहिनीलाई गायनबाट खुसी पार्न सकेकामा खुसी प्रकट गरिन् ।


स्विडेनमा पहिलोपटक तीज विशेष कार्यक्रम भएको हो । यसलाई आगामी वर्षमा पनि निरन्तरता दिने आयोजकले जनाएको छ ।

प्रकाशित : भाद्र २१, २०७८ १९:५३
प्रतिक्रिया
पठाउनुहोस्

अध्यादेशकाे असर : निर्वाचन आयोगमा दर्ता मात्र भएकाे पार्टी पनि फुट्याे

कान्तिपुर संवाददाता

काठमाडौँ — एमाले र जसपाको असन्तुष्ट समूहलाई अर्को दल गठन सहज बनाउन सरकारले जारी गरेको अध्यादेशले साना दल पनि फुट्न थालेका छन् । राजनीतिक दल सम्बन्धी ऐन संशोधन गरी २० प्रतिशत केन्द्रीय सदस्य वा संघीय सांसदका आधारमा पार्टी फुटाउन सकिने प्रावधान राखेर सरकारले अध्यादेश जारी गरेको थियो । 

रामशरण पाण्डे नेतृत्वको नयाँ नेपाल पार्टीको असन्तुष्ट युवराज पौडेलको समूहले निर्वाचन आयोगमा नयाँ दल दर्ताको लागि निवेदन दिएका हुन् । ४९ जना केन्द्रीय सदस्यमध्ये १७ जनाले अर्को नयाँ दल दर्ताको निवेदन दिएका थिए । नयाँ नेपालमा पौडेल उपाध्यक्ष थिए ।

उनीहरूले प्रस्ताव गरेको समाजवादी केन्द्र नेपाल नाम गरेको नयाँ दल दर्ताको प्रक्रिया अघि बढाउन आयोगले आइतबार सनाखत समेत गराइसकेको छ । ‘सनाखत भइसक्यो । नयाँ दलको मान्यता दिन निर्णय हुन मात्रै बाँकी छ,’ प्रमुख निर्वाचन आयुक्त दिनेश थपलियाले भने । नयाँ नेपाल पार्टीबाट अलग हुन १७ जनाले निवेदन दिएपनि १२ जनाको मात्रै सनाखत भएको आयोगले जनाएको छ । यो पार्टीलाई मान्यता दिन आयोगले निर्णय गर्न बाँकी छ ।

नयाँ नेपाल ०६९ मा दर्ता भएको थियो । विवेकशील साझा पार्टीका नेताहरूबीच द्वन्द्व बढेपछि यो असन्तुष्ट समूहले छुट्टै पार्टी गठनको आन्तरिक छलफल सुरू गरिसकेको छ ।

सरकारले जारी गरेको अध्यादेश अनुसार नै यसअघि एमालेबाट असन्तुष्ट माधवकुमार नेपाल नेतृत्वमा नेकपा एकीकृत समाजवादी र जसपामा असन्तुष्ट महन्थ ठाकुर समूहले लोकतान्त्रिक समाजवादी पार्टीको मान्यता पाइसकेको छ ।

प्रकाशित : भाद्र २१, २०७८ १९:४३
पूरा पढ्नुहोस्
प्रतिक्रिया
पठाउनुहोस्
×