मैनालीलाई तत्काल रक्तदान नगर्न निर्देशन
काठमाडौं — कोरोना महामारीको नौ महिनाको अवधिमा ११ लिटर रगत तथा प्लेटलेट दान गर्ने नेपालका अभियन्ता अर्जुन मैनालीलाई अमेरिकाको न्युयोर्क ब्लड सेन्टरले तत्काल रक्तदान नगर्न निर्देशन दिएको छ ।
हाल अमेरिकामा रहेका काभ्रे सिपालीका मैनालीका अनुसार उनले यो अवधिमा गरेको रक्तदानको सीमा पुगेकाले उनको स्वास्थ्यलाई असर पर्न सक्ने कारण देखाउँदै न्युयोर्क ब्लड सेन्टरले पत्रमार्फत सूचित गराएको हो ।
‘जनवरी २१ मा न्युयोर्क ब्लड सेन्टरबाट पत्र पाएँ,’ मैनालीले कान्तिपुरसँग भने, ‘त्यसमा २८ जुन २०२१ पछि मात्र रक्तदान गर्नुहोला लेखिएको थियो । अमेरिकाको खाद्य र औषधि प्रशासनद्वारा स्थापित नियमअनुसार सेन्टरले मेरा हरेक रगत र प्लेट्लेट्स दानलाई अनुगमन गरिरहेका रहेछ ।’
उनले एक वर्षको अवधिमा आफ्नो शरीरबाट निकाल्न मिल्ने जति परिमाण आठ महिनाकै अवधिमा निकालिकाले तत्काललाई रक्तदान नगर्न भनिएको बताए ।
‘करिब ११ लिटर दान गरिसकेको रहेछु । यहाँ कति पटकभन्दा पनि कति परिमाणमा तरल पदार्थ निकालिएको छ भन्ने कुराले अर्थ राख्दोरहेछ । यो सामान्य रक्तदानमात्रै थिएन । एक किसिमको असाधारण कार्य हुन गएछ,’ ३३ वर्षदेखि रक्तदान गर्दै आएका मैनालीले भने ।
मैनालीले कोरोनाका बेला २० अप्रिल २०२० देखि २०२१ जनवरी १२ तारिखसम्म २३ पटक रक्तदान गरेका थिए । काठमाडौंको न्युरोडबाट रक्तदान थालेका मैनालीले हालसम्म १ सय ९५ पटक रक्तदान गरिसकेका छन् । विश्वका ६ वटा महादेशका १७ वटा मुलुकमा रक्तदान अभियान गरिसकेका मैनालीको रगतले कम्तीमा ५ सय ८४ जना बिरामीको ज्यान जोगाउन मद्दत पुगेको छ ।
प्रकाशित : माघ ११, २०७७ २२:३४